Bihain liklik long 1940, papamama bilong mi i stadi long Baibel wantaim Ol Witnes Bilong Jehova. Bihain ol i lusim stadi, tasol mama bilong mi i save kisim yet ol nius Wastaua na Kirap! Long 1950, wanpela intenesenel kibung i kamap long Niu Yok Siti, na famili bilong mi go long dispela kibung.

Bihain long dispela, Brata Lawrence Jeffries i wok long kam lukim mipela. Em i laik helpim mi. Pastaim mi no wanbel long tingting ol Witnes Bilong Jehova i holim olsem ol i no save insait long wok politik na joinim militeri. Mi tokim em olsem sapos olgeta man long Amerika i no laik insait long woa, ol birua bai kam na kisim kantri olgeta. Isi tasol Brata Jeffries i tokim mi olsem: “Yu ting God Jehova bai mekim wanem sapos olgeta manmeri long Amerika i lotuim Em na ol birua i kam pait long ol?” Ol tok em i mekim long dispela na ol narapela samting tu em i stori long en i helpim mi long luksave olsem tok mi mekim i no gat as bilong en. Dispela i kirapim laik bilong mi long kisim sampela save moa long tok i tru bilong Baibel.

Mi save lusim planti aua long ritim ol olpela nius Wastaua na Kirap! em mama i bin putim i stap long rum i stap daunbilo long haus. I no longtaim, mi luksave olsem mi wok long kisim save long tok i tru, olsem na mi orait long Brata Jeffries i stadi wantaim mi long Baibel. Na mi wok long go oltaim long ol miting. Mi laikim ol tok i tru mi kisim skul long en na mi kamap pablisa bilong autim gutnius. Mi senisim ol mak mi laik winim taim mi kliagut olsem “bikpela de bilong Jehova i kam klostu pinis!” (Sef. 1:14) Mi no laik go long yunivesiti, nau mi laik helpim ol man long kisim save long tok i tru bilong Baibel.

 Mi grediuet long haiskul long Jun 13, 1956, na 3-pela de bihain mi kisim baptais long wanpela kibung sekit. Mi no bin save olsem mi bai kisim planti blesing taim mi givim laip bilong mi long kisim save long Jehova na skulim ol narapela long Em.

Sikspela mun bihain long mi kisim baptais, mi kamap painia oltaim. Long Wok Kingdom bilong Disemba 1956, i gat dispela atikol, “Can You Serve Where The Need Is Greater?” Dispela singaut i stret long mi tu. Mi laik i go helpim wok long hap we i no gat planti man bilong autim gutnius.​—Mat. 24:14.

Mi go stap long Edgefield, South Carolina. Kongrigesen long hap i gat 4-pela pablisa tasol. Mi go na nau kongrigesen i gat 5-pela pablisa. Mipela save mekim miting long fran rum long haus bilong wanpela brata. Long olgeta mun, mi save lusim 100 aua long autim tok. Mi bisi tru long lukautim wok autim tok na mekim ol tok insait long kongrigesen. Taim mi lusim bikpela haptaim moa long mekim olsem, mi kisim bikpela save moa long Jehova.

Wanpela meri em mi stadi wantaim em long Baibel, em i gat fiuneral hom long Johnston, em taun i stap sampela kilomita longwe. Em i givim haptaim wok long mi em mi nidim tru, na em i larim mipela yusim wanpela liklik bilding bilong em olsem Haus Kingdom.

Brata Jolly Jeffries, em pikinini man bilong brata i bin stadi wantaim mi long Baibel, em i lusim Brooklyn, Niu Yok, na muv i kam stap wantaim mi olsem painia poroman bilong mi. Mipela i save slip long wanpela liklik haus kar bilong wanpela brata.

Pe bilong ol wokman long hap Saut i liklik tru. Ol i save peim mipela 2 dola o 3 dola tasol long wok bilong wanpela de. Wanpela taim, mi yusim ol laspela koins bilong mi long baim kaikai long stua. Taim mi kam ausait, wanpela man i kam bungim mi na tok: “Yu laik wok? Mi bai peim yu 1 dola long wanpela aua.” Em i givim mi wok insait long 3-pela de long klinim eria bilong konstraksen. Mi luksave olsem Jehova i helpim mi long stap long Edgefield. Tasol mi bin go long intenesenel kibung i kamap long Niu Yok Siti long 1958.

Long de namba 2 bilong kibung, wanpela spesel samting i kamap. Mi bungim Ruby Wadlington, em i mekim wok painia oltaim long Gallatin, Tennesse. Mitupela wantaim i gat laik long mekim wok misineri so mipela go long miting bilong Skul Gileat i kamap long dispela kibung. Bihain mitupela i raitim pas i go i kam long narapela narapela. Wanpela taim ol brata i singautim mi long givim pablik tok long Gallatin. Mi yusim dispela rot i op bilong askim em long maritim mi. Mi muv i go stap long kongrigesen bilong Ruby na mitupela i marit long 1959.

Taim mi gat 23 krismas, ol i makim mi long kamap kongrigesen sevan (nau yumi kolim olsem kodineta bilong lain elda) long Gallatin. Kongrigesen bilong mipela em fes kongrigesen em Charles Thompson i bin visitim taim em i mekim wok  wasman sekit. Em i gat bikpela ekspiriens, tasol em i askim long tingting bilong mi long wanem samting ol brata i nidim na wanem ol wok em ol wasman sekit i mekim bilong lukautim kongrigesen. Mi kisim skul long em olsem em i bikpela samting long mekim ol askim na save gut long stori olgeta paslain long yumi mekim wanpela disisen.

Long Me 1964, ol i singautim mi long insait long Skul Bilong Wok Kingdom, em skul i save stap inap wanpela mun, long South Lansing, Niu Yok. Ol brata i mekim wok tisa long dispela skul i helpim mi long kisim strongpela laik bilong kisim planti save moa long Jehova na pas gut wantaim em.

Ol brata i singautim mitupela Ruby long mekim wok sekit kirap long Janueri 1965. Namba 1 sekit asainmen bilong mipela i karamapim bikpela eria, kirap long Knoxville, Tennesse, i go klostu long Richmond, Virginia. Mi mekim wok long kongrigesen bilong ol blak skin bratasista tasol, long wanem, long dispela taim hap saut bilong Amerika i holim yet lo gavman i putim long ol blak skin na wait skin i no ken bung wantaim. Ol brata i no gat planti samting bilong skin, olsem na mipela i lain long serim ol liklik samting mipela i gat wantaim ol lain i nidim helpim. Wanpela brata i mekim wok wasman sekit inap longpela taim i skulim mi long wanpela bikpela lesen, olsem: “Stap olsem brata. No ken go insait long wanpela kongrigesen olsem yu wanpela bos. Yu inap helpim ol sapos ol i tingim yu olsem brata bilong ol.”

Taim mipela i go visitim wanpela liklik kongrigesen, Ruby i kirap stadi long Baibel wantaim wanpela yangpela meri i gat liklik bebi gel na dispela bebi i gat 1-pela krismas. Taim i no gat wanpela long kongrigesen inap mekim dispela stadi, Ruby i save stadi wantaim em long rot bilong raitim ol pas. Long neks visit bilong mipela, dispela meri i kam long olgeta miting. Bihain tupela spesel painia sista i muv i kam long dispela kongrigesen, na ol i wok yet long stadi wantaim em, na i no longtaim em i kisim baptais. Inap 30 yia bihain, long 1995, long Patterson Betel, wanpela yangpela meri i kam bungim Ruby na toktok wantaim em. Em dispela liklik pikinini meri bilong dispela meri em Ruby i bin stadi wantaim em. Dispela pikinini meri na man bilong em i insait long namba 100 klas bilong Skul Gileat.

Namba 2 sekit bilong mipela i karamapim sentral Florida. Long dispela taim, mipela i nidim wanpela kar so mipela baim wanpela long gutpela prais tru. Tasol sori tru, long fes wik, wanpela samting long ensin i bruk. Mipela i no gat mani bilong stretim. Mi ringim wanpela brata em mi ting em i ken helpim mipela. Em i tokim wanpela wokman bilong em long stretim kar na em i no laik kisim mani long dispela wok. Em i tok: “Yu no gat wok long baim.” Em i givim sampela mani long mipela tu olsem presen! Dispela em wanpela gutpela eksampel tru long hau Jehova i save lukautim ol wokman bilong em. Dispela i kirapim mipela long serim samting wantaim ol narapela.

Taim mipela i visitim wanpela kongrigesen, mipela i save slip long haus bilong ol brata. Dispela i mekim na mipela i gat planti gutpela pren. Wanpela taim mi taipim ripot bilong kongrigesen na mi no pinisim yet na i stap yet long taipraita bilong mi. Long apinun taim mi go long pinisim ripot, mi kisim save olsem liklik pikinini boi bilong famili i gat 3-pela krismas, em i “helpim” mi na pinisim dispela ripot. Inap planti yia mi tok pani long em long dispela samting.

Long 1971, mi kisim wanpela pas i tokaut long asainmen bilong mipela olsem wasman distrik long Niu Yok Siti. Mipela kirap nogut tru! Taim mipela muv i go long hap, mi gat 34 krismas tasol. Mi fes blak skin i mekim wok wasman distrik long dispela hap, so ol brata i amamas na welkamim mipela.

Mi mekim wok wasman distrik na mi amamas long skulim ol manmeri long Jehova long olgeta wiken long ol kibung sekit. Planti wasman sekit i gat bikpela ekspiriens moa winim mi. Wanpela bilong ol i bin mekim tok bilong baptais long taim mi bin kisim baptais. Narapela brata em Theodore Jaracz, bihain em i kamap memba bilong Gavening Bodi. Na tu, i gat planti ekspiriens brata em ol i mekim wok long Brooklyn Betel. Mi amamas tru olsem ol wasman sekit na ol lain i wok long Betel i mekim gutpela pasin long mi. Mi lukim tru olsem ol dispela gutpela wasman i save bihainim stret Tok Bilong God na ol i sapotim gut oganaisesen. Pasin daun  bilong ol i mekim na mi pilim isi long mekim wok wasman distrik.

Long 1974, Gavening Bodi i makim sampela narapela wasman sekit long kamap wasman distrik, na mi kirap gen long mekim wok wasman sekit long South Carolina. Long dispela taim, ol blak skin na wait skin i ken bung wantaim, dispela i mekim na ol brata i amamas tru.

Long 1976, ol i salim mi long go mekim wok sekit long Georgia namel long Atlanta na Columbus. Mi tingim klia tru mi bin mekim fiuneral tok long 5-pela blak skin pikinini em ol i bin dai taim ol man nogut i tromoi paia bom na kukim haus bilong ol. Mama bilong ol i slip long haus sik bikos long bagarap em i bin kisim. Planti Witnes Bilong Jehova em ol blak skin na wait skin wantaim i kam long haus sik long mekim gut bel bilong papamama. Mi lukim bikpela pasin laikim tru bilong ol bratasista. Kain gutpela pasin sori olsem i ken helpim lain bilong God long karim ol bikpela hevi i painim ol.

Long 1977, ol i askim mipela long kam long Brooklyn Betel long mekim wok inap sampela mun bilong helpim wanpela projek. Klostu long wok i pinis, tupela memba bilong Gavening Bodi i bung wantaim mi na askim sapos mitupela Ruby bai amamas long wok fultaim long Betel. Mipela i orait long mekim olsem.

Inap 24 yia, mi wok long Sevis Dipatmen, em hap we planti taim ol i mas stretim ol hevi na bekim ol strongpela askim. Insait long ol yia i kam na i go, Gavening Bodi i kamapim ol stiatok we i stret wantaim ol stiatok bilong Baibel. Ol dispela tok i stap olsem astok em mipela i mas bihainim bilong bekim ol askim, na tu, ol i bilong trenim ol wasman sekit, ol elda, na ol painia. Dispela trening tul i helpim planti long kamap strong long bilip. Dispela i strongim tru oganaisesen bilong Jehova.

Kirap long 1995 i go inap long 2018, mi visitim planti brens ofis olsem mausman bilong hetkota, em pastaim yumi kolim olsem son-ovasia. Mi save bung wantaim ol Brens Komiti, ol bratasista i wok long Betel, na ol misineri bilong strongim ol na helpim ol. Mitupela Ruby i amamas tru long ol ekspiriens em ol narapela serim wantaim mipela. Olsem, mipela i go long Ruanda long yia 2000. Mipela i pilim tru long bel stori bilong ol bratasista na famili Betel long hau ol i bin abrusim dispela bikpela hevi long 1994 we ol i bin kilim i dai planti manmeri tru. Planti wanfamili bilong ol i bin dai. Maski ol i bin karim bikpela hevi tru, ol dispela bratasista i soim olsem ol i gat strongpela bilip, ol i wetim gutpela samting i kamap bihain, na ol i stap amamas.

Nau mitupela i winim pinis 80 krismas. Inap 20 yia nau mi mekim wok olsem wanpela memba bilong Brens Komiti Bilong Amerika. Mi no bin go long yunivesiti, tasol mi kisim bikpela skul tru i kam long Jehova na oganaisesen bilong em. Dispela i helpim mi long skulim ol narapela long ol tok i tru bilong Baibel em bilong helpim ol inap oltaim oltaim. (2 Kor. 3:5; 2 Tim. 2:2) Mi lukim tru hau ol tok bilong Baibel i bin helpim ol manmeri long mekim i stap bilong ol i kamap gutpela na kisim pasin bilong pas gut wantaim Man Bilong Wokim olgeta samting. (Jems 4:8) Taim rot i op, mitupela Ruby i save wok yet long strongim ol narapela long tingim tru save ol i kisim long Jehova na tingim tu wok bilong skulim ol narapela long ol tok i tru bilong Baibel, em nambawan gutpela samting wanpela wokman bilong Jehova i ken mekim!