1940-იან წანეფიშ დაჭყაფუს ჩქიმ მშობლეფქ ბიბლიაშ გურაფა ქიდიჭყეს იეჰოვაშ მოწმეეფწკუმა. მართალ რე, თინეფს ბიბლიაშ გურაფა ვა გუგრძელებნა, მარა დიაჩქიმ ირიათო ეჭოფუნდჷ ახალ გიშაშქუმალეფს ჟურნალეფიშ „გინაჯინალ კოშკი“ დო „გეგშაკურცხით!“. 1950 წანას მთელ ოჯახით ვოსწრუდით ნიუ-იორკიშ საერთაშორისო კონგრესის.

თეშ უკულ ხეთეშე ჯიმა ლოურენს ჯეფრიქ ჩქინდა მოკითხირ ქიდიჭყჷ დო ოცადუდ, ჭეშმარიტებაშ გურაფას ქიმმეხვარკო. დუდშე მანგარო ვა მობწონდჷ, ნამდა იეჰოვაშ მოწმეეფ მონაწილებას ვა ღებულენდეს პოლიტიკურ საკითხეფს დო ვართ ჯარშა მიშეს. ჯიმა ლოურენსის ურაგადუდ, ნამდა ამერიკას არძა ჯარიშ ულაშ გურშენ ვარიას ქოთქუანდ-და, ნტერეფ ჩქინ ქიანას ხეშა ქაშეჸოთანდეს. თინა მოთვინებათ ემინწყუნდჷ: „მუჭო ფიქრენქ, ამერიკას არძაქ იეჰოვაშ მსახურება ქიდიჭყ-და, მუთუნს ვა გაკეთენსო იეჰოვა, მუშ მსახურეფს ნტერეფ ქიგიანთხუნან?“. თიშ თეცალ პასუხიქ დო ხოლო შხვა საკითხეფქ ქუმოძირუ, ნამდა არასწორო ფიფქრენდჷ, მუდგაქ ბიბლიურ ჭეშმარიტებაშ ინტერეს გომრჩქინ.

საათობით ბკითხულენდჷ ჟურნალეფიშ „გინაჯინალ კოშკი“ დო „გეგშაკურცხით!“ ჯვეშ გუშაშქუმალეფს, ნამუთ დიაჩქიმს პადვალს აფუდ ჩუალირ. ჭიჭე ხანშა ქიმეფხვად, ნამდა მუდგას ბკითხულენდჷ, ჭეშმარიტება რდჷ. ათეშენ ქიდვეთანხმჷ ჯიმა ლოურენსის, თიწკუმა ართო ბიბლიაშ გურაფა ქიდიბჭყიკო. თეს გეძინელ, ქიდიბჭყჷ კრებაშ შეხვალამეფშა რეგულარულო დასწრება. მიჸორდჷ, მუდგას ბგურაფლენდჷ, ათეშენ სახიოლო ამბეშ მაუწყებელო გინიფრთჷ. ჩქიმ მიზნეფქ დითირ, მუჟამსით ქიგებგჷ, ნამდა „იეჰოვაშ დიდ დღა“ ხოლოს რდჷ (სოფ. 1:14). ასე უკვე ჩქიმ მთავარ მიზან უნივერსიტეტის განათლებაშ მეღება ვარინ, შხვეფშა ბიბლიურ ჭეშმარიტებაშ გურაფა რდჷ.

 1956 წანაშ 13 ივანობას სკოლა გუვათე დო სუმ დღაშ უკულ დიმნათ. თიმწკუმა წარმოდგენილ ვა მაფუდ, მუსხი კურთხევა მაჸუნუდ თის, ნამდა ჩქიმ ცხოვრება იეჰოვაშ გურშენ მეტიშ გაგებას დო თიშ გურშენ შხვეფშა გურაფას მეუძღვინ.

ნათუაშე ამშვ თუთაშ უკულ პიონერო მსახურება ქიდიბჭყჷ. 1956 წანაშ დეკემბერიშ „სამეფო მსახურებას“ მოჩამილ რდჷ თეცალ სტატია: „შეილებნო იმსახურე თექ, სოდეთ მაქადაგებელეფიშ საჭიროება რე?“. თე მოწვევა მა ხოლო მოხუდ. მოკოდ, იფქადაგკო თიცალ ადგილს, სოდეთ ბრელ მაქადაგებელ ვა რდჷ (მათ. 24:14).

გეგნოფრთჷ ეჯფილდშა, სამხრეთ კაროლინაშა. თექიან კრებას გვალო ხუთ მაუწყებელ ვორდით. შეხვალამეფს ართ ჯიმაშ ჸუდეს ვატარენდით. ირთუთას 100 საათის ვმსახურენდჷ. მანგარ დაკავებულ ვორდჷ, მუშენდა თი ტერიტორიას ქოთ სამქადაგებლო საქმეს ფხემძღვანელენდჷ დო ქოთ კრებაშო მოხსენებეფს ვამზადენდჷ. მუთ უმოს მეტის ვორთუდ იეჰოვაშო, თით უმოს მეტის ბგურაფლენდჷ თიშ გურშენ.

ბიბლიას ვოგურუანდჷ ართ ქომონჯღურელ ოსურკოჩის, ნამდგას ჯონსტონს სამგლოვიარო დარბაზ უღუდ. თე ქალაქშა მუსხირენ კილომეტრ მემძუდ. თიქ სიკეთე გეგმირჩქინ დო მარაშე მუსხირენ დღას მუშობა ქუდმოჭყაფუ, მუთ მანგარო მოსაჭირუდ. თეწკუმა ართო, უფლება ქომჩეს, თე ჭიჭე შენობას შეხვალამეფშო ეკიფშაყარითკო.

ჯიმა ჯოლი ჯეფრიქ, თი ჯიმაშ სქუაქ, მით ბიბლიას მოგურუანდჷ, ნიუ-იორკშა, ბრუკლინშა, გეგნორთჷ, სოდეთ ართო ვმსახურენდით პიონერეფო. ჩქი ჭიჭე ვაგონს ფცხოვრენდით, ნამუთ ართ ჯიმაქ დამთმეს.

სამხრეთ კაროლინას დაბალ ხელფასეფ რდჷ. მთელ დღაშ მუშობაშენ ჟირ ვარდა სუმ დოლარს მარზენდეს. ართშა, მუჟამსით ჩქიმ ბოლო ხურდეფით პჸიდულენდჷ ოჭკუმალს, მაღაზიაშე გიმულაშ დროს მიდგარენ კოჩიქ გუმაჩერ დო ბკითხჷ: „გოკონო სამუშა? საათშე ართ დოლარს გინოიგანქ“. თიქ სუმ დღაშ სამუშა ქომუჩ; სამშენებლო ტერიტორია ოკო დუვონწყიკო. არგამა რდჷ, ნამდა იეჰოვა მოხვარუდ, ქუდოფსქიდკო ეჯფილდის. ჩქიმ ეკონომიკურ მდგომარეობაშ უმკუჯინუო, იშენით შემალებუ 1958 წანას ნიუ-იორკშა, საერთაშორისო კონგრესშა, მიდაფრთკო.

კონგრესიშ მაჟია დღაქ ჩქიმო განსაკუთრებულქ იჸუ, მუშენდა თიმ დღას ქეშეფხვად რუბი ვედლინგტონს, მით პიონერო მსახურენდჷ გალატინს, ტენესიშ შტატის. ჩქი ჟირხოლოს მისიონერობა მოკოდესინ თიშ გურშენ, კონგრესის ქიდვესწრით შეხვალამას, ნამუთ თინეფშო რდჷ, მიდგას გალაადის გურაფა ოკოდ. ჭიჭე ხანშა ართიანშა მეჭარუა ქიდიბჭყით. უკულ გალატინიშ კრებაშა მოხსენებათ ქუდომძახეს. თე საშვალება გეგმიბრინე, ნამდა რუბიშა ხე ქომთხუდკო. უკულ თიშ კრებაშა გეგნოფრთჷ დო 1959 წანას დეფქორწინით.

23 წანერ ვორდინ, გალატინიშ კრებას დებნიშნჷ კრებაშ მსახურო (ასე უხუცესეფიშ საბჭოშ კოორდინატორ ჯოხო). ჩქი პირველ კრება ვორდით, ნამუთ ჩარლზ ტომსონქ რაიონულ  ზედამხედველო დანიშნებაშ უკულ იძირუ. თინა გამოცდილ ჯიმა რდჷ, მარა იშენით ირიათო ელმაკითხანდჷ, მუ ოსაჭირდეს და დო ჯიმალეფს დო მუჭო ზრუნენდეს შხვა რაიონულ ზედამხედველეფ თინეფშე. თიშე დიბგურე, ნამდა ჯგირ რე, გადაწყვეტილებაშ მეღებაშახ შხვეფს ხოლო ქელაკითხუე დო მიღე არძა ინფორმაცია.

1964 წანაშ მესის მემწვის ართ თუთიან სამეფო მსახურებაშ სკოლაშა, ნამუთ საუთ-ლანსინგის, ნიუ-იორკის, იტარებუდ. თე სკოლაქ გინმოჭყვიდირაფუ, უმოსო გეფჩინებაფეკო იეჰოვა დო სულიერო წიმი მიდაფრთკო.

1965 წანაშ იანარს ფილიალქ ფთხუეს, ქიდიბჭყითკო რაიონულ მსახურება. ჩქინ პირველ რაიონ მანგარ დიდ რდჷ; თინა იჭყაფუდ ნოკსვილშე, ტენესიშ შტატშე, დო დახე რიჩმონდშახ, ვირჯინიაშახ, ანჭუდ. თეშა მიშეშ ჩრდილოეთ კაროლინაშ, კენტუკიშ დო დასავლეთ ვირჯინიაშ კრებეფ. ხვალე თი კრებეფს იბძირუანდჷ, სოდეთ უჩაკანამ და დო ჯიმალეფ რდეს, მუშენდა კანონ უჩაკანამეფს ვარზენდჷ უფლებას, ჩეკანამეფწკუმა ართო ეკიშაყარესკო. და დო ჯიმალეფს ეკონომიკურო უჭირდეს, ათეშენ ჩქი ქიდიბგურეთ, მუთ მიღდესინ თინა, შხვეფშა ხოლო გამნაწილებდესკო. გამოცდილ რაიონულ ზედამხედველქ ართ მნიშვნელოვან გაკვეთილ ქუდმოგურუ. თიქ მიწუ: „კრებას იძირუანქინ, და დო ჯიმალეფს ქაგინებაფე, ნამდა თინეფიშ ჯიმა რექ დო ვართ ხოლო — უნჩაშ. ხვალე თი შემთხვევას შეგალებე თინეფიშ მოხვარა, მუჟამსით ჯიმათ მეირჩქინანა“.

მუჟამსით ართ ჭიჭე კრებას იბძირუანდით, რუბიქ ბიბლიაშ გურაფა ქიდიჭყჷ ახალგაზრდა ოსურკოჩწკუმა, მიდგას ართ წანერ ბაღანა ჸუნდჷ. თი კრებას მითინ ვა რდჷ თიცალ, მით თე ოსურკოჩწკუმა ბიბლიაშ გურაფას ჩატარენდჷ, ათეშენ კინ რუბიქ გაგრძელ ელექტრონულ ფოსტაშ საშვალებათ. ჩქინ უკულიან მონახულებაშ დროს თე ოსურკოჩ რეგულარულო ოსწრუდ კრებეფს. მუჟამსით თი კრებაშა ჟირ სპეციალურ პიონერ დაქ გეგნორთჷ, თინეფქ გაგრძელეს თე ოსურკოჩშა ბიბლიაშ გურაფა. ჭიჭე ხანიშ უკულ თიქ დინათ. სოდგარენ 30 წანაშ უკულ, 1995 წანას, მუჟამსით პატერსონიშ ბეთელს ვორდით, ართ ახალგაზრდა დაქ რუბის დუდ გაჩინებაფუ. თენა თი ოსურკოჩიშ სქუა ჸოფე, მიდგას რუბი ოგურუანდჷ. თე და მეუღლეწკუმა ართო გალაადიშ სკოლაშ მა-100 კლასის მიკიშ.

ჩქინ მაჟია რაიონ რდჷ ცენტრალურ ფლორიდა. თე დროშო მანქანა მოსაჭირდეს, მუდგაქ გვალო ჯგირ ფასშა ქეშამიოლეს. პირველ მარას მატორიშ მუდგარენ ნაწილქ გილელ, მარა ფარა ვამღუდეს თიშ ოკეთებელო. ართ ჯიმას ქიდვეკავშირ, ნამდგაშე ფიფქრენდჷ, ნამდა შეიალებედ ჩქიმ მოხვარა. თიქ მუშ ართ თანამშრომელს ქოთხუ ჩქიმ მანქანაშ გარემონტება, მარა თე პიროვნებას ჩქიმდა ფარა ვეგწუღალ. თიქ მიწის: „ჩქიმ მუთუნ ვეგერძუნა“ დო აშო ფარა ხოლო ქუმაჩუქეს. თენა მართალო ჯგირ მაგალით რდჷ თიშ, მუჭო ზრუნენს იეჰოვა მუშ მსახურეფშე, მუდგაქ ქუგმოშინეს, ნამდა ჩქი ხოლო ოკო ვორდათ გურხვეეფ.

მუჟამსით კრებეფს იბძირუანდით, და დო ჯიმალეფიშ ჸუდეს ფჩენდუდით, შედეგო ბრელ ჯგირ მეგობარ ქიფშით. ართშა ობეშტალ მანქანას ქინიბტე ართ-ართ კრებაშ ანგარიშ, ნამდგაშ ბეშტუა გვერდო თებულ მაფუდ. დიფრთინ, ქიგებგჷ, ნამდა თე ოჯახიშ ბაღანას, ნამუთ 3 წანერ რდჷ, „ქუმუხვარებ“ ჩქიმდა თე ანგარიშიშ თებას. თის ობეშტალ მანქანაშ კლავიშეფშა გენჭირა ქუდუჭყაფ დო ნაჭარა გილულუაფ. თეს წანეფიშ დინახალე გუვოშინანდჷ.

1971 წანას მიბღით ნიუ-იორკის საოლქო ზედამხედველო ჩქიმ დანიშვნაშ წერილ. თეს ვეველუდით. თიმწკუმა გვალო 34 წანერ ვორდჷ. ჯიმალეფქ მა, პირველ უჩაკანამ ზედამხედველ, მთელ გურით მემღეს.

მუჭოთ საოლქო ზედამხედველ, ირმარას რაიონულ კონგრესეფს ხიოლით ვოგურუანდჷ ხალხის იეჰოვაშ გურშენ. ბრელ რაიონულ ზედამხედველს ჩქიმდე ბრელით უმოს დიდ გამოცდილება უღუდ. მაგალთო, ართის ჩქიმ ნათუაშ მოხსენება აფუდ ნაკითხირ. შხვა ჯიმაქ, თეოდორ იარაჩიქ, უმოს გვიანო ხემძღვანელ საბჭოშ წევრო დენიშნჷ. თეს გეძინელ, რდჷ ბრელ გამოცდილ ჯიმა, მით ბრუკლინიშ ბეთელს მსახურენდჷ. მანგარ მარდულ ვორდჷ თიშენ, ნამდა რაიონულ ზედამხედველეფ დო ბეთელელეფ დუდის თავისფალო მოგინაფუანდეს. პირადო ქობძირ, მუჭო ონდუდეს თე მოჸოროფე ჭყიშეფ ღორონთიშ სიტყვას დო მუ ართგურო უკინენდეს ხუჯის თიშ ორგანიზაციას. თინეფიშ თანდაბლობაშ ჭყოლოფათ  უმოსო გემეადვილ ჩქიმ პასუხიშმგებლობაშ შესრულებაქ.

1974 წანას ხემძღვანელ საბჭოქ რაიონულ ზედამხედველეფიშ შხვა ჯგუფ დანიშნჷ საოლქო მსახურებას დო მა კინ რაიონულ ზედამხედველო გომტეს სამხრეთ კაროლინაშა. საბედნეროთ, თე დროშო უკვე უჩაკანამ დო ჩეკანამ და დო ჯიმალეფს შეულებდეს ართო აკოშაყარუა, მუთ მანგარ სახიოლო რდჷ თინეფშო.

1976 წანაშ ბოლოს დუმანიშნეს ჯორჯიას, ნამუთ ატლანტა დო კოლუმბუს შქას რე. თოლშა ეწომრე თი დღა, მუჟამსით ხუთ უჩაკანამ ბაღანაშ დაკრძალვაშ მოხსენებაქ მაჸუ ოკითხექ. თინეფქ თიმწკუმა ღურეს, მუჟამსით მიდგარენქ თინეფიშ ჸუდეს დაჩხირ ათუნტუ. დიდაქ საავადმყოფოშა იჸუ გინაჸუნაფალქ. მუჭოთ უჩაკანამ თეშ ჩეკანამ და დო ჯიმალეფ ირიათო მიშეს დო მიშეს საავადმყოფოშა, ნამდა გურშა ელუკინესკო თის. ქობძირ, მუშმადიდა ჸოროფა რდჷ თინეფ შქას. თეცალ რთულ მდგომარეობას ინოლაფირ ადამიანიშ ოწუხებელს გურშა ქიმიბღანთ-და, მივეხვარებუთ თის, ქუგურზას მუშ გაჭირებას.

1977 წანას ართ-ართ პროექტის მონაწილება მიბღითკონ თიშენ, ბრუკლინიშ ბეთელშა მუსხირენ თუთათ მემწვის. თე პროექტ ითებუდუნ თეშ ხემძღვანელ საბჭოშ ჟირ წევრიქ ქეშეფხვად დო მიწუ, ქეშემლებდეს დო ვარ მა დო რუბის ქუდოფსქიდითკო ბეთელს. ჩქი დევეთანხმით თე მოწვევას.

24 წანას ვმსახურენდჷ სამსახურებრივ განყოფილებას, სოდეთ ჯიმალეფს ხშირას რთულ საკითხეფ აფდეს გინაჭყვიდირალ. წანეფიშ დინახალე ხემძღვანელ საბჭო მარზენდეს მითითებეფს, ნამუთ ბიბლიურ პრინციპეფწკუმა რდჷ შეთანხმებულ. თე მითითებეფიშ მოხვარათ გინობჭყიდუნდით საკითხეფს დო ვოგურუანდით რაიონულ ზედამხედველეფს, უხუცესეფს დო პიონერეფს. თეშნერო ბრელქ მირდჷ სულიერო, მუდგაქ კინ იეჰოვაშ ორგანიზაცია გამანგარ.

1995 წანაშე მოჸუნაფილ 2018 წანაშახ ბრელ ფილიალ იბძირე, მუჭოთ მთავარ სამართველოშ წარმომადგენელქ, ნამდგას თი დროს სამხარეო ზედამხედველს უძახდეს. შეფხვადუდ ფილიალიშ კომიტეტეფს, ბეთელელეფს, მისიონერეფს, ნამდა გურშა ელუკინკო დო ქიმვეხვარკო თინეფს. თე და დო ჯიმალეფიშ შემთხვევეფიშ მორჩქილაფა მა დო რუბის ხოლო გურშა ელამკინანდეს. მაგალთო, მუჟამსით 2 000 წანას რუანდაშა გენოფრთით, ჩქინდა მანგარო იმოქმედ თიშ გაგებაქ, მუჭო გინასქიდეს ჩქინ და დო ჯიმალეფქ დო ბეთელიშ ოჯახიშ წევრეფქ 1994 წანაშ გენოციდის. თიმწკუმა ბრელქ საჸოროფო ადამიანეფ მიოდინუ. თე ირფელიშ უმკუჯინუო, თინეფს ვა უდინუაფნა რწმენა, იმენდ დო ხიოლ.

ასე 80 წანას გინოჩილათირეფ ვორეთ. ბოლო 20 წანა რე, მუთ შეერთებულ შტატეფიშ ფილიალიშ კომიტეტის ვმსახურენქ. მართალ რე, განათლება უნივერსიტეტის ვემემღებ, მარა იეჰოვაშე დო თიშ ორგანიზაციაშე არძაშ უმოს დიდ განათლება მიბღჷ. თექ მუმამზად, შხვეფს ვოგურუე ბიბლიურ ჭეშმარიტება, ნამუთ თინეფს მარადიულ სიცოცხლეს მუღანს (2 კორ. 3:5; 2 ტიმ. 2:2). ქობძირ, მუჭო ოხვარ ბიბლიურ ცნობა ადამიანეფს, გაუჯგუშან მუნეფიშ ცხოვრება დო გევითარან გუმაჭყაფალწკუმა ხოლოშიან ურთიერთობა (იაკ. 4:8). მა დო რუბი ხეშე ვა უტენთ საშვალებას, ელუჩათ შხვეფს, ნამდა დაფასან იეჰოვაშენ მეტიშ გაგებაშ დო შხვეფშა ბიბლიურ ჭეშმარიტებაშ გურაფაშ პატი — არძაშ უმოს დიდ პატი, ნამდგათ იეჰოვაშ მსახურს შეულებ გეხარას.