Һәвари Булус 1 Коринфлиләрә 15:8 ајәсиндә белә дејир: «Лап ахырда исә вахтындан тез доғулмуш ушаға бәнзәјән мәнә ҝөрүндү». Бу ајәдә һәвари Булус Иса Мәсиһи сәмави ҹалалында ҝөрән заман өзү илә баш верәнләрдән данышыр. Бәс о, «вахтындан тез доғулмуш ушаға» бәнзәдијини дејәндә нә нәзәрдә тутурду? Әввәлләр бу ајәни белә баша дүшүрдүк: Булус бу сөзләрлә демәк истәјирди ки, руһани һәјата доғулмаг вә ја дирилмәк шәрәфи она санки вахтындан әввәл, јәни ҝөјләр һәјатына дирилмә башламаздан әсрләр өнҹә нәсиб олуб. Амма бу ајә илә бағлы сонракы арашдырмаларымыз ҝөстәрди ки, бу изаһата дүзәлиш етмәк лазымдыр.

Бәс онда о, һансы мәнада өзүнү «вахтындан тез доғулмуш ушаға» бәнзәдирди? Буна бир нечә еһтимал вар.

Онун мәсиһи олмасы ани вә травмалы олмушду. Вахтындан әввәл доғуш адәтән ҝөзләнилмәз олур. Саул (сонралар Булус ады илә танынды) мәсиһиләри тәгиб етмәк үчүн Дәмәшгә ҝедәндә дирилмиш Исанын ҝөрүнтүдә она ҝөрүнәҹәјини ҝөзләмирди. Булусун мәсиһилији гәбул етмәси тәкҹә онун үчүн јох, һәмин шәһәрә һәдәләмәјә ҝетдији мәсиһиләр үчүн дә ҝөзләнилмәз иди. Үстәлик, бу, травматик бир һадисә иди; о, бир мүддәт ҝөрмә габилијјәтини итирмишди (Һәв. 9:1—9, 17—19).

О, мәсиһилији «јанлыш вахтда» гәбул етмишди. «Вахтындан тез доғулмуш» кими тәрҹүмә олунан јунан сөзүнү «вахтсыз», «јанлыш вахтда доғулмуш» кими дә тәрҹүмә етмәк олар. «Јерусәлим Мүгәддәс Китабы»нда бу ајә белә сәсләнир: «Һеч кәсин ҝөзләмәдији вахтда доғулан ушаға бәнзәјән мәнә ҝөрүндү». Булус әввәлки ајәләрдә бәзи инсанлардан данышыр. Бу инсанлар Исаны дириләндән сонра ҝөрмүшдүләр. Булус мәсиһилији гәбул едәндә исә Иса Мәсиһ артыг ҝөјә гајытмышды, буна ҝөрә о, Исаны ҝөрә билмәмишди (1 Кор. 15:4—8). Исанын Булуса гәфил ҝөрүнмәси она бу имканы јаратды. Бир нөв, о, Исаны «јанлыш вахтда», башга сөзлә, һеч кәсин ҝөзләмәдији вахтда ҝөрдү.

О өзү һагда тәвазөкарлыгла данышырды. Бәзи алимләрин фикринҹә, Булус бу сөзләрлә өзүнә тәнгиди јанашмышды. Әҝәр Булус бу сөзү бу мәнада ишләтмишдисә, бунунла өзүнүн һәвари олмаға лајиг олмадығыны нәзәрдә тутурду. Белә ки, о, сөзүнә белә давам етмишди: «Мән һәвариләрин ән кичијијәм вә һәвари адланмаға лајиг дејиләм, чүнки Аллаһын јығынҹағына зүлм етмишәм. Лакин инди бу мөвгеји Аллаһын лүтфү сајәсиндә тутурам» (1 Кор. 15:9, 10).

Беләликлә, ҝөрүнүр, Булус бу сөзләрлә ја Исанын она ҝөзләнилмәдән, гәфил ҝөрүндүјүнү, ја мәсиһи олмасынын ҝөзләнилмәз вахтда олдуғуну, ја да ки, белә бир мөһтәшәм вәһј алмаға лајиг олмадығыны нәзәрдә тутурду. Һәр бир һалда ајдындыр ки, јашадығы бу һадисә Булус үчүн чох гијмәтли иди. Исанын дирилдијинә онда зәррә гәдәр дә шүбһә галмады. Елә буна ҝөрә дә о, Исанын дирилмәси һаггында тәблиғ едәндә бу һадисәдән тез-тез данышырды (Һәв. 22:6—11; 26:13—18).