Uyon sa 1 Corinto 15:8, sinabi ni Pablo: “Ultimo, nagpahiling man siya sa sako, siring sa pagpahiling sa saro na namundag na mayo pa sa panahon.” Kaidto, ipinaliwanag niyato na minalataw na an sinasabi digdi ni Pablo iyo an personal na eksperyensiya niya kan magkaigwa siya nin bisyon manungod ki Jesus sa mamuraway na kamugtakan kaini sa langit. Minaluwas na garo baga tinawan siya kan onra na mamundag, o mabuhay liwat, bilang espiritu bago pa an itinalaan na panahon—mga siglo pa bago mangyari an klase nin pagkabuhay liwat na iyan. Minsan siring, bilang resulta kan urog pang pagsiyasat sa bersikulong ini, kaipuhan na liwaton an paliwanag manungod digdi.

Totoo na an sinasambit digdi ni Pablo iyo an nangyari kan makumbertir siya. Pero ano an buot sabihon niya kan sabihon niyang “namundag [siya] na mayo pa sa panahon”? May nagkapirang posibilidad.

An pagkumbertir sa saiya biglaan asin nakakatrauma. An pagkamundag na mayo pa sa panahon sa parati nakakabigla. Kan si Saulo (kan huri namidbid bilang Pablo) pasiring sa Damasco tanganing persegiron an mga Kristiyano diyan, dai niya inaasahan na makakahiling siya nin bisyon kan binuhay liwat na si Jesus. An pagkakumbertir ki Pablo nakakabigla bako lang saiya kundi pati man sa mga Kristiyano na plano niyang persegiron sa siyudad na iyan. Apuwera kaiyan, nakakatrauma man na marhay an eksperyensiyang ini mala ngani ta temporaryo siyang nawaran nin paghiling.—Gibo 9:1-9, 17-19.

Nakumbertir siya sa “salang panahon.” An orihinal na Griegong tataramon na itrinadusir na “namundag na mayo pa sa panahon” puwede man na itradusir na “saro na namundag sa salang panahon.” Arog kaini an sabi sa The Jerusalem Bible: “Garo man sana namundag ako sa panahon na dai inaasahan nin siisay man.” Kan panahon na makumbertir si Pablo, nagbalik na kaidto sa langit si Jesus. Bakong arog kan mga sinambit ni Pablo sa nainot na mga bersikulo, dai niya nahiling an binuhay liwat na si Jesus bago ini magsakat sa langit. (1 Cor. 15:4-8) Dahil sa dai inaasahan na pagpahiling ni Jesus ki Pablo, nagkaigwa si Pablo kan oportunidad na iyan, maski ngani garo baga sa “salang panahon” iyan.

Nagtataram siya manungod sa saiyang sadiri sa mapakumbabang paagi. Sigun sa nagkapirang iskolar sa Bibliya, an mga tataramon na ginamit digdi ni Pablo puwedeng magtao kan ideya na minemenos niya an sadiri niya. Kun iyan an nasa isip ni Pablo, inaako niya na bako siyang maninigo sa pribilehiyong itinao sa saiya. Sa katunayan, sinabi niya pa: “Ako an pinakahamak sa mga apostol, asin dai ako angay na apudon na apostol, dahil pinersegir ko an kongregasyon nin Diyos. Alagad kun ano ako ngunyan, huli iyan sa daing kapantay na kabuutan nin Diyos.”—1 Cor. 15:9, 10.

Kaya garo baga an pinapanungdan digdi ni Pablo posibleng iyo an dai inaasahan asin biglang pagpahiling saiya ni Jesus, an dai inaasahan na pagkumbertir sa saiya, o an pagigin dai niya maninigo na magkaigwa kan siring kapambihirang kapahayagan. Arin man diyan, malinaw na pinahalagahan na marhay ni Pablo an eksperyensiyang ini. Huli kaiyan, napatunayan nanggad niya na siguradong binuhay liwat si Jesus hali sa mga gadan. Bakong makangangalas na parati niyang sinasambit an dai inaasahan na pangyayaring ini pag naghuhulit siya manungod sa pagkabuhay liwat ni Jesus.—Gibo 22:6-11; 26:13-18.