E kalate 1 Becorinthien 15:8, Paul a jô na: “Mvuse ya bese, aval ane be mon a bialé nsolôkan, a nga yené fe be ma.” Melu mvus, bi mbe bi jô’ô na Paul a nga jô mejô mete asu na a kate été a nga tebe éyoñ a nga bi ñyenan a nga yene Yésus a too étôto’o jé yôp été. A mbe ve ane nge a nga bi mvome ya bialé nge wômô mfa’a ya nsisim mintet mimbu ôsusua na avale ñwômane miñwuan ete da taté. Ve éyoñe bi nyoñeya éyoñe ya tu’a fas éfus éte, bi nga yene na bia yiane sôan atinane ya été.

É ne été na Paul a mbe a kobô ajô ya jam e nga boban éyoñ a nga kôñelan asu na a bo Kristen. Ve jé a mbe a kômbô’ô jô éyoñ a nga jô na a nga “bialé nsolôkan”? Mejô mete me ne bi abui metinan.

Nkôñelan wé ô nga bo atemetem a e nji be tyi’ibi asu dé. Mon a bialé nsolôkan a so atemetem. Avale te fe Saul (be nga su’ulane loone na Paul) a mbe a kele’e Damas na a ke tibili Bekristen, a nji be a yeme’e na é bi avale ñyenan ete. Sa ke Paul étam nnye a nga vembe nkôñelane wé, Bekristen a mbe a kele’e tibili fe be nga vembe jam ete. Jam ete e nji be tyi’ibi asu dé, a nga ku ndim abim éyoñ éziñ.​—Mam. 9:1-9, 17-19.

A nga kôñelan “mbia éyoñ.” Bifia ya nkobô Grec be nga kôñelane na e “bialé nsolôkan” bi ne fe tinane na e “bialé mbia éyoñ.” La Bible de Jérusalem a kôñelan éfus éte na: “A ne ve ane me nga bialé éyoñ môt éziñ a nji be a buna’an.” Éyoñe Paul a nga kôñelan, Yésus a mbe a bulaneya yôp. Paul a selan a bôt a kobô be bifuse ya ôsu, a nji yene Yésus éyoñ a nga wômô ôsusua na a bete yôp. (1 Bec. 15:4-8) Ñyenan ôte ô nga ve Paul fane ya yene Yésus mvuse ñwômane miñwuane wé, akusa bo éyoñ éte é mbe ve yené ane “mbia éyoñ.”

A mbe a kobô’ô ajô dé a éjote nyul ése. Beyeme mam béziñ ba simesane na, bifia Paul a belane bie va bi ne yené ane ébiasé nge ke meta. Nge nde Paul a mbe a fase’e nalé, yeme na a mbe a yene’e na a nji be a yiane mvome ya bo nlôman. Ajô te a nga jô na: “Ma dañe minlôman mise tyôtyoé, ma me ne te yiane loobane na nlôman, amu me nga kpwe’ele [akônda] Zambe. Ve amu mvame Zambe, me nto ane me né.”​—1 Bec. 15:9, 10.

Nde bi ne jô na mejô Paul a nga jô ma tinane na, ñyenan a nga yene Yésus a too yôp été ô nga so atemetem, nge ke na a nga kôñelan éyoñ bôte be nji be be buna’an, nge ke amu a mbe a simesa’ane na zezé môt ane nye é nji yiane bi aval étua ñyenane ete. To’o na jam avé nde e nga tindi Paul na a jô mejô mete, jam bia yem e ne na, Paul a mbe a nyane’ étua ñyenan a nga bi. Ñyenan ôte ô nga yemete ndi nleme jé na Yésus a nga wômô miñwuan. Teke bisô na Paul a mbe a kobô’ô bôt ajô ñyenan ôte éyoñ a mbe a kañete’e be ajô ya ñwômane miñwuane Yésus.​—Mam. 22:6-11; 26:13-18.