Ngu kuya ngu 1 Vakorinto 15:8, Paulo a wombile tiya: “Se ngu magwito ka totshe ati wonekisile kwango ni ku mwanana wa tshole a nga velekiswa kuhawulwa.” Makhatoni hi txi pfisisa ti to Paulo ti nga maha atxi womba-womba ngu ngene apune, mbimo yi a ngava ni muwoniso wa Jesu Kristu ati ka wudhumo wakwe nzumani. Se hi txi pfisisa ti to ti txi woneka nga a to ko pfa txibaka txa kuva a di wusilwe e ya hanya nzumani kota m’thu wa moya, yi sise hoka mbimo yi a nga di no wuswa ngu yona. Hambi keto, msana ka kumaha wuxolisisi ka ndimana yiya, hi woni ti to i txhuko kutshukwatisa mapfisiselo athu. Ditshuri ti to ahawa Paulo, atxi womba-womba ngu mbimo yi a nga hunduluka.

Kambe ene ati lava kuwomba txani mbimo yi a nga khene ‘a velekisilwe kuhawulwa?’ Ku ni titxhamuselo to tala, kuhunduluka kwakwe ku vile ko mbi rinzelwa ni ku kuvile ka txi dhukisa.

Ene a hindukile konaha-ni konaha ngu txi dhukisa. Mwanana awu wo velekiswa kuhawulwa a ta ti sa rinzelwa. Mbimo yi Sawule awu a nga gwita e ta va Paulo, a nga txi enda eya Dhamasku, kasi kuya xanisa Makristu kheya, ene a sa rinzela ti to a nga thuka he manana ni muwoniso wa Jesu awu a ngati wusilwe. Ngu ditshuri Paulo a sa rinzela ti to a nga hunduluka konaha ni konaha, ni ku Makristu ni ona ma sa rinzela ti to Paulo a nga thuka e hunduluka. Ene a ti ma xanisa ngutu Makristu a didhoropa dile. I si ngeto basi, tximahakalo txiya txi vile txa txi dhukisa ngutu kwakwe, ati ti nga maha ti to e zumba masiku o kari a si woni.—Mith. 9:1-9, 17-19.

Ene a hundulukile “ngu mbimo ya walo.” Dipswi da Txigriki adi di nga hunduluxelwa di va “kuvelekiswa ku hawulwa.” Di nga tshumela di womba to “kuvelekwa ngu mbimo ya walo.” A Bíblia de Jerusalem di hunduluxela ngu nzila yiya: “Ti ti woneka nga ni to velekwa ngu mbimo a yi yi nga sa rinzelwa.” Mbimo yi Paulo a nga hunduluka ngu yona, Jesu se ati tshumete eya nzumani. Kuhambana ni vamwani ava mpostoli Paulo a nga va womba to va mu woni Jesu na a si se ya nzumani, ene a ti ta mu wona Jesu se na ati tshumete e ya nzumani. (1 Vak. 15:4-8) Tximahakalo txiya txi ningile mkhanjo Paulo ti to e wona Jesu, hambiku ti nga txi woneka nga ti vile “ngu mbimo ya walo.”

Paulo atxi wombawomba ngu ngene ngu nzila yo ti veka hahatshi. Ngu kuya ngu vagondi vamwani, mapswi ya Paulo a nga ma thumisa hawa, ma txi kombisa ti to ene atxi tipfa i si nga wa txilo. I di toneto, Paulo a txi ti pfisisa ti to ene asi fanelwi ngu lungelo yile a ngati ningilwe. Ngu ditshuri, ene a tshumete e womba tiya: “Ani ni m’dotho ka votshe vapostoli; kha ni fanekelwi ngu kudhanwa ngu ditina da mpostoli, nguko ni xanisile dibanza da Txizimu. Kambe konakuwa, ngu mtamo wa kateko ya Txizimu ni phindukile ni maha txi ni ku txona.”—1 Vak. 15:9, 10.

Ngu magwito ti woneka nga mpostoli Paulo, a txi wombawomba ngu nzila yi kuhunduluka kwakwe ku nga va ko mbi rinzelwa ni kuva ka txi dhukisa. Ni ku ene a txi ti wona asi faneleki ka lungelo yile a nga ti yi mani. Hambi i di ti to ku ni titxhamuselo timwani, ti hakubasani ti to Paulo a txi ninga lisima tximahakalo txiya. Atiya ti mahile Paulo e tsaniseka ti to ngu ditshuri Jesu a wusilwe ngu ka va kufa. Ene a txi ninga ngutu lisima tximahakalo txiya, ha ko za mbimo yi a nga txi txhumayela atxi wombawomba ngu kuwuswa ka Jesu.—Mith. 22:6-11; 26:13-18.