Sumala sa 1 Corinto 15:8, si Pablo miingon: “Ulahi sa tanan siya nagpakita usab kanako nga daw ngadto sa usa nga natawong ahat.” Kaniadto, nagtuo ta nga si Pablo posibleng naghisgot sa iyang nasinatian dihang nakita niya sa panan-awon si Jesus nga tua sa langit. Sama bag gihatagan siyag kadungganan nga abanteng matawo, o mabanhaw, ngadto sa espirituhanong kinabuhi mga siglo una pa nahitabo ang maong matang sa pagkabanhaw. Pero human sa dugang pagtuon, nakita nga kinahanglang usbon ang atong pagsabot niini nga bersikulo.

Tinuod nga ang gitumong ni Pablo dinhi mao ang nahitabo panahon sa iyang pagkakombertir. Pero unsa may iyang gipasabot dihang miingon siya nga siya “natawong ahat”? Naay pipila ka posibilidad.

Kalit ang iyang pagkakombertir, ug ang iyang nasinatian adtong panahona grabeg epekto niya. Ang ahat nga pagpanganak sagad wala damha. Samtang si Saulo (nga sa ulahi nailhang Pablo) nagpaingon sa Damasco aron lutoson ang mga Kristohanon didto, wala siya magdahom nga makita niya ang nabanhawng si Jesus diha sa panan-awon. Wala magdahom si Pablo nga makombertir siya, ug wala pod ni damha sa mga Kristohanon nga iya untang lutoson nianang siyudara. Ug grabe kaayo ang iyang nasinatian nga siya temporaryong nabuta.​—Buh. 9:1-9, 17-19.

Nakombertir siya sa “sayop nga panahon.” Ang orihinal nga Gregong pulong nga gihubad “usa nga natawong ahat” puwede pod hubaron nga “usa nga natawo sa sayop nga panahon.” Ingon ani ang hubad sa The Jerusalem Bible: “Mora kog natawo sa panahon nga walay si bisan kinsang nagdahom.” Dihang nakombertir si Pablo, si Jesus mibalik na sa langit. Dili parehas niadtong mga gihisgotan ni Pablo sa nag-unang mga bersikulo, wala siya makakita sa nabanhawng si Jesus sa wala pa si Jesus mosaka sa langit. (1 Cor. 15:4-8) Si Pablo nahatagan sa maong kahigayonan dihang sa wala damha, si Jesus nagpakita kaniya, bisan pag daw kadto “sayop nga panahon.”

Iyang giisip nga ubos siya nga tawo. Sumala sa ubang eskolar, migamit si Pablo dinhi ug ekspresyon nga morag gipakaubos niya ang iyang kaugalingon. Kon kanay gipasabot ni Pablo, iyang giila nga dili siya angayan sa pribilehiyo nga gihatag kaniya. Gani siya miingon: “Ako ang labing ubos sa mga apostoles, ug dili ko angayng tawgon nga apostol, kay gilutos nako ang kongregasyon sa Diyos. Apan pinaagi sa dili hitupngang pagkamaayo sa Diyos nahimo kong apostol.”—1 Cor. 15:9, 10.

Busa posible nga ang gitumong ni Pablo mao ang kalit ug wala damha nga pagpakita ni Jesus kaniya, ang daw sayop nga panahon sa iyang pagkakombertir, o ang iyang pagkadili-angayan nga makakita sa maong katingalahan nga panan-awon. Bisan unsa may rason, klaro nga gipabilhan ni Pablo kini nga kasinatian. Tungod niini, wala gyod siya magduhaduha nga gibanhaw si Jesus. Dili ikatingala nga sagad hisgotan ni Pablo kining wala damha nga kasinatian dihang magsangyaw sa uban bahin sa pagkabanhaw ni Jesus.—Buh. 22:6-11; 26:13-18.