Paul ọkọdọhọ ke 1 Corinth 15:8 ete: “Ke akpatre enye owụt mi n̄ko idem nte n̄kpọ eke owụtde eyen emi amanade ke ini mîkemke.” Ikesidọhọ ke etie nte Paul eketịn̄ aban̄a se iketịbede ini enye okokụtde Jesus emi ẹkenamde eset ke n̄kukụt. Eketie nte n̄kpọ eke ẹkenamde Paul amana m̀mê eset nte spirit ata ediwak isua mbemiso utọ ediset ke n̄kpa oro etịbede. Edi ke ima iketịm idụn̄ọde itie Bible oro, imokụt ke edi se ikpụhọde se ikesitịn̄de oro.

Ke itie Bible oro, Paul eketịn̄ aban̄a se iketịbede ini enye akakabarede edi mbet Christ. Edi enye ndikọdọhọ ke imọ ‘ikamana ke ini mîkemke’ ọkọwọrọ nso? Se nsio nsio n̄kpọ emi ẹkemede ndiwọrọ mi.

Paul akakabade edi mbet Christ inikiet inikiet, ikonyụn̄ idịghe we-we-we. Esikpa mme owo idem eyen akpamana ini ọfiọn̄ mîkemke. Saul (emi ẹkedidiọn̄ọde nte Paul) ikodorike enyịn ndikụt Jesus emi ẹkenamde eset ke n̄kukụt ini enye okosụk akade Damascus ndikọkọbọ mme Christian. Idem ama akpa Paul nte enye akakabarede edi mbet Christ, ama onyụn̄ akpa mme Christian emi enye akakade ndikọbọ ke obio oro. N̄kpọ en̄wen edi ke Paul ikodụkke esop Abasi eyen-eyen, enye ama akam akabade nnan ke usen ifan̄.​—Utom 9:1-9, 17-19.

Enye akakabade edi mbet Christ “ke idiọk ini.” Ikọ Greek oro ẹkabarede nte “eyen emi amanade ke ini mîkemke” ekeme n̄ko ndiwọrọ “eyen emi amanade ke idiọk ini.” The Jerusalem Bible esịn enye ntem: “Eketie nte n̄kpọ eke n̄kamanade ke ini owo ndomokiet mîkodorike enyịn.” Ini Paul akakabarede edi mbet, Jesus ama eseset ọnyọn̄ heaven. Mbon emi Paul eketịn̄de aban̄a ke ufan̄ikọ ifan̄ mbemiso ufan̄ikọ itiaita oro ẹma ẹkụt Jesus mbemiso enye ọnyọn̄de heaven, edi enye Paul ikekwe. (1 Cor. 15:4-8) Jesus ndikowụt Paul idem ke ini Paul mîkodorike enyịn ama anam Paul ekeme ndikụt Jesus emi ẹkenamde eset okposụkedi eketiede nte enye okokụt Jesus “ke idiọk ini.”

Nsụhọdeidem akanam enye etịn̄ ikọ ntre aban̄a idemesie. Ndusụk ntaifiọk emi ẹnamde ndụn̄ọde ẹban̄a Bible ẹdọhọ ke ikọ Paul oro ekeme ndiwọrọ ke enye ikadaha idem ke n̄kpọ. Ekpedi Paul okoyom an̄wan̄a mme owo ntre, ọwọrọ enye akada ke imọ ikodotke ndidi se imọ idide. Enye ama akam ọdọhọ ete: “Ami n̄kpri n̄kan ke otu mme apostle, nnyụn̄ ndotke se ẹkotde apostle, koro mma n̄kọbọ esop Abasi. Edi oto ke mfọnido Abasi oro owo mîdotke ke ami ndi se ndide emi.”​—1 Cor. 15:9, 10.

Ntre, etie nte Paul eketịn̄ aban̄a nte Jesus okowụtde enye idem inikiet inikiet ye nte enye mîkodorike enyịn ndikụt Jesus, utọ ini emi enye akakabarede edi mbet, m̀mê nte enye mîkodotke ndikụt utọ utịbe utịbe n̄kukụt oro. Se ikpakananam Paul etịn̄ ikọ oro, imokụt ke enye ikadaha se iketịbede oro efere efere sia ama anam enye enen̄ede enịm ke Jesus ama eset. Imosụk ise nte enye ekesiwakde nditịn̄ mban̄a n̄kpọntịbe oro ini enye ọkwọrọde ọnọ mme owo ke ẹma ẹnam Jesus eset.​—Utom 22:6-11; 26:13-18.