Paul kae wɔ 1 Corinthfo 15:8 dɛ: ‘Hɔn nyinara ekyir no, oyii noho kyerɛɛ mo so a metse dɛ obi a wɔwo no ber a ɔnnsoe mu.’ Dza nna Paul reka ho asɛm wɔ ha nye enyido-adzehu a onyae faa Jesus a ɔwɔ n’enyimnyam mu no ho. Naaso aber a ɔkaa dɛ ɔtse dɛ “obi a wɔwo no ber a ɔnnsoe mu” no nna ɔrepɛ akyerɛ dɛn? Ber bi a abɛsen kɔ no, yɛkaa dɛ nna ɔtse dɛ mbrɛ Paul enya hokwan ma wɔawo no, anaa woenyan no kɔ sor ber mpo a nna owusoɛr a ɔtse dɛm no ne ber nnsoe koraa. Naaso ber a yɛhwehwɛɛ kyerɛwsɛm yi mu kɔr ekyir no, yeebohu dɛ ohia dɛ yɛyɛ nsakyer wɔ ntseasee a yɛwɔ no mu.

Ɔyɛ nokwar dɛ nna Paul reka dza osii ma ɔbɛyɛɛ Christiannyi no ho asɛm dze, naaso ka a ɔkaa dɛ ɔtse dɛ “obi a wɔwo no ber a ɔnnsoe mu” no, nna ɔrepɛ akyerɛ dɛn? Obotum akyerɛ dza odzidzi do yi mu bi.

Ɔbɛyɛɛ Christiannyi aber a nna ɔnnhwɛ kwan, na dza ɔfaa mu no so, nna ɔyɛ hu. Sɛ abofra bi ne ber annso na wɔwo no a, ɔyɛ nwanwa kakra osiandɛ obiara nnhwɛ kwan. Aber a nna Saul (a ekyir yi wɔbɛfrɛɛ no Paul) nam kwan do rokɔ Damascus akɛtseetsee Christianfo a wɔwɔ hɔ no, nna ɔnnhwɛ kwan dɛ obenya Jesus a woenyan no no ho enyido-adzehu. Nna Paul nnhwɛ kwan dɛ ɔbɛyɛ Christiannyi. Dɛmara na Christianfo a nna Paul abɔ ne tsir mu dɛ ɔrekɛtseetsee hɔn no so nnhwɛ kwan dɛ ɔbɛyɛ Christiannyi. Bio so, dza ɔfaa mu no nna ɔyɛ hu paa. N’enyi mpo furae nda kakra.​—Andw. 9:1-9, 17-19.

Ber a ɔdze bɛyɛɛ Christiannyi no “nnyɛ ber pa.” Greek kasafua a wɔkyerɛɛ ase “obi a wɔwo no ber a ɔnnsoe mu” no, obotum so akyerɛ “obi a wɔannwo no ber pa mu.” The Jerusalem Bible so ka no dɛ: “Ɔtse dɛ mbrɛ wɔwoo me aber a obiara nnhwɛ kwan.” Aber a Paul bɛyɛɛ Christiannyi no, nna Jesus kɔ sor dada. Hɔn a Paul dzii kan bobɔɔ hɔn edzin no dze, wohun Jesus ana ɔrokɔ sor, naaso Paul nankasa dze oennhu no. (1 Cor. 15:4-8) Jesus daa noho edzi kyerɛɛ Paul aber a nna Paul nnhwɛ kwan. Iyi maa Paul nyaa hokwan dze hun Jesus a woenyan no no. Ɔwɔ mu, nna ɔtse dɛ mbrɛ dɛm aber no “nnyɛ ber pa.”

Dza ɔkae no kyerɛ dɛ nna ɔmmpɛ dɛ ɔmema noho do. Abemfo bi ka dɛ, nsɛmfua a Paul dze dzii dwuma wɔ ha no botum akyerɛ asɛm a obi ka dze bu noho, obi anaa biribi tootooba. Sɛ nna dɛmara na ɔwɔ Paul n’adwen mu a, ɔnodze dza nna ɔpɛ dɛ ɔkyerɛ nye dɛ, ɔmmfata hokwan a ne nsa kae dɛ ɔsomafo no. Ɔdze kaa ho mpo dɛ: “Emi nye asomafo no mu ekumaba a mennsɛ dɛ wɔfrɛ me ɔsomafo, osiandɛ mihiahiaa Nyankopɔn asɔr ho. Naaso ɔnam Nyankopɔn adom do na metse [dɛ] mbrɛ metse yi.”​—1 Cor. 15:9, 10.

Sɛ yɛhwɛ dza yɛaka yi nyinara a, obotum aba dɛ nna Paul reka ber a ɔnnhwɛ kwan a Jesus daa noho edzi kyerɛɛ no anaa ber a ɔdze bɛyɛɛ Christiannyi a nna ɔnnyɛ ber pa no ho asɛm. Afei so obotum akyerɛ dɛ nna ɔtse nka dɛ ɔmmfata dɛ onya enyido-adzehu a ɔyɛ nwanwa a onyae no. Mbrɛ ɔtse biara no, ɔda edzi dɛ nna Paul n’enyi sɔ hokwan soronko yi. Asɛm yi maa n’adwen sii no pi dɛ woenyan Jesus efi ewufo mu. Ɔnnyɛ nwanwa dɛ nna ɔtaa ka dza osii no ho asɛm ber a ɔrekyerɛkyerɛ Jesus no wusoɛr mu no.​—Andw. 22:6-11; 26:13-18.