Yɛ 1 Korintobii 15:8 lɛ, Paulo wie akɛ: “Amɛ fɛɛ amɛsɛɛ lɛ, ejie ehe kpo etsɔɔ mi hu tamɔ mɔ ko ni be shɛɛɛ ni afɔ lɛ.” Be ko ni eho lɛ, wɔwie akɛ etamɔ nɔ ni sane ni Paulo wie nɛɛ kɔɔ na ni ena Yesu yɛ ŋwɛi yɛ ninaa mli lɛ he. Wɔtsɔɔ mli akɛ, eyɛ mli akɛ bɔfoi lɛ agbele sɛɛ afii ohai abɔ dani mɛi ni baaya ŋwɛi lɛ agbohiiashitee lɛ je shishi moŋ, shi ninaa nɛɛ hewɔ lɛ, efee tamɔ nɔ ni atee Paulo shi kɛtee ŋwɛi, loo kɛ́ wɔɔwie lɛ, afɔ lɛ be ni nakai be lɛ shɛko. Shi be ni wɔtao nii amli saŋŋ yɛ ŋmalɛ nɛɛ he lɛ, wɔna akɛ esa akɛ wɔtsake bɔ ni wɔgbala mli wɔhã lɛ.

Eyɛ mli akɛ nɔ ni Paulo wie lɛ kɔɔ nibii ni tee nɔ be ni etsake ebatsɔ Kristofonyo lɛ ahe moŋ, shi mɛni tuuntu yɔɔ ejwɛŋmɔ mli be ni ewie akɛ, etamɔ “mɔ ko ni be shɛɛɛ ni afɔ lɛ” lɛ? Eeenyɛ efee akɛ, nibii ni nyiɛ sɛɛ nɛɛ eko ji nɔ ni yɔɔ ejwɛŋmɔ mli.

Etsakemɔ lɛ ba be ni akpaaa gbɛ, ni nɔ ni mli ni etsɔ lɛ naa wa. Bei pii lɛ, bii ni afɔɔ amɛ be ni amɛbe shɛko lɛ afɔmɔ lɛ baa trukaa be ni akpaaa gbɛ. Nakai nɔŋŋ be ni Saul (mɔ ni sɛɛ mli lɛ abale lɛ akɛ Paulo lɛ) fãa gbɛ kɛyaa Damasko koni eyawa Kristofoi lɛ ayi lɛ, no mli lɛ ekpaaa gbɛ akɛ ebaana Yesu Kristo ni atee lɛ shi kɛtee ŋwɛi lɛ he ninaa. No hewɔ lɛ, etsakemɔ lɛ ba be ni lɛ, kɛ agbɛnɛ hu, Kristofoi ni kulɛ eyaawa amɛ yi yɛ nakai maŋ lɛ mli lɛ kpaaa gbɛ. Kɛfata he lɛ, nɔ ni mli ni etsɔ dani etsake lɛ naa wa aahu akɛ, eshwila po kɛyashi be ko.​—Bɔf. 9:1-9, 17-19.

Etsakemɔ lɛ baaa yɛ “be ni sa” mli. Abaanyɛ atsɔɔ Greek wiemɔ ni atsɔɔ shishi akɛ “mɔ ko ni be shɛɛɛ ni afɔ lɛ” lɛ shishi hu akɛ “mɔ ko ni afɔɔɔ lɛ yɛ be ni sa mli.” The Jerusalem Bible lɛ tsɔɔ nɔ ni Paulo wie lɛ shishi akɛ: “Tamɔ nɔ ni afɔ mi be ni mɔ ko mɔ ko kpaaa mi gbɛ.” Be ni Paulo tsake ebatsɔ Kristofonyo lɛ, no mli lɛ Yesu etee ŋwɛi momo. Shi mɛi ni ewie amɛhe yɛ kukuji ni tsɔ hiɛ lɛ amli lɛ na Yesu be ni atee lɛ shi lɛ dani etee ŋwɛi. (1 Kor. 15:4-8) Jiemɔ ni Yesu jie ehe kpo etsɔɔ Paulo lɛ hã ená hegbɛ ena Yesu yɛ eshitee lɛ sɛɛ, eyɛ mli akɛ efee tamɔ nɔ ni enɛ baaa yɛ “be ni sa” mli loo be ni mɔ ko mɔ ko kpaaa gbɛ akɛ nɔ ko nakai baaba.

Enaaa ehe akɛ mɔ ko ni kulɛ esa akɛ ená hegbɛ ebatsɔ Yesu bɔfo. Biblia he nilelɔi komɛi kɛɔ akɛ, wiemɔi ni Paulo kɛtsu nii yɛ biɛ lɛ tsɔɔ akɛ, enaaa ehe kwraa akɛ mɔ ko ji lɛ. Kɛ́ enɛ ni yɔɔ Paulo jwɛŋmɔ mli lɛ, belɛ ewiemɔi lɛ tsɔɔ akɛ enaaa ehe akɛ mɔ ni kulɛ esa akɛ ebatsɔ Yesu bɔfo. Anɔkwa, be ni ewie wiemɔi nɛɛ sɛɛ nɔŋŋ lɛ, ekɛfata he akɛ: “Miji bibioo kwraa yɛ bɔfoi lɛ ateŋ, ni misaaa mɔ ni atsɛɔ lɛ bɔfo po, ejaakɛ miwa Nyɔŋmɔ asafo lɛ yi. Shi Nyɔŋmɔ dromɔ naa miji mɔ ni miji nɛɛ.”​—1 Kor. 15:9, 10.

No hewɔ lɛ, eeenyɛ efee akɛ be ni Paulo wie akɛ etamɔ “mɔ ko ni be shɛɛɛ ni afɔ lɛ” lɛ, nɔ ni yɔɔ ejwɛŋmɔ mli ji, etsakemɔ lɛ ba be ni akpaaa gbɛ ni nɔ ni mli ni etsɔ lɛ naa wa, loo etsakemɔ lɛ baaa yɛ be ni sa mli, loo ejeee mɔ ko ni kulɛ esa akɛ Yesu ajie ehe kpo atsɔɔ lɛ yɛ ninaa mli be ni atee lɛ shi lɛ. Shi ekɔɔɔ he eko nɔ ni hã Paulo wie nɔ ni ewie lɛ, wɔle faŋŋ akɛ, ehiɛ sɔ hegbɛ ni ená akɛ ebaana Yesu be ni atee lɛ shi lɛ, ejaakɛ no hã ená hemɔkɛyeli ni mli wa akɛ atee Yesu shi. Ebɛ naakpɛɛ mɔ akɛ bei pii kɛ́ Paulo miiwie Yesu shitee lɛ he lɛ, ewieɔ hegbɛ ni ekpaaa gbɛ kwraa ni ená nɛɛ he.​—Bɔf. 22:6-11; 26:13-18.