N 1 I-Korinto 15:8, ao e taekina aei Bauro: “Ni kabaneana raoi, e a kaoti naba nakoiu ae te aomata ngai ae kaanga e aki koro unana.” Ngkoa ao ti kabwarabwaraa bwa e taraa n ae e kaineta aei Bauro ma te baere e rinanona ngke e nora Iesu n te miitara ma mimitongina i karawa. Ai aron ae e karineaki n te aro are e a moantaai ni bungiaki ke ni kautaki nakon te maiu n taamnei, bubua ma bubua te ririki imwain raoi te aeka ni kautiuti anne. Ma imwin te ukeuke n reirei riki i aon te kibu aei, e a taraa n riai ni karaoaki te bitaki nakoni kabwarabwaraana.

E boni kaineta aei Bauro ma te baere e riki nakoina ngke e a rairaki nakon te Aro ni Kristian. Ma tera are e nanonna ngkanne ngke e taekinna bwa “e aki koro unana”? Aikai kabwarabwaraana tabeua.

E karina n riki rairakina nakon te Aro ni Kristian ao e karuanikai. E kona ni kakubanako bungiakin te teei ae e aki koro unana. E mwananga Tauro (are e a ataaki imwina bwa Bauro) n nako Tamateko, ao e aki kantaningaia bwa e na nora te miitara ae kaotaki iai Iesu are e a tia ni kautaki. E boni kubanako Bauro n rairakina aei ao ai uana naba ma Kristian ake e iangoiia bwa e na bwainikirinia n te kaawa anne. Irarikina, e rangi ni korakora rotakini Bauro n te baere rinanona ao e a aki noraaba i nanon tabeua te tai.—Mwa. 9:1-9, 17-19.

E “bure te tai” are e rairaki iai. Te moan taetae ni Kuriiti ibukin “te aomata . . . ae . . . e aki koro unana,” e kona naba n nanonaki iai “te aomata ae tuai riai ni bungiaki.” E taekinaki aei n The Jerusalem Bible: “Ai aron ae I bungiaki n te tai are e aki kantaningaaki.” N te tai are e rairaki iai Bauro, ao Iesu e a kaman okira karawa. E kaokoro Bauro ma naake e taekinia ni kiibu ake mai mwaina, bwa e aki ngaia nora Iesu are e a tia ni kautaki imwaini waerakena nako karawa. (1Kor. 15:4-8) Ngaia are kaotin Iesu are e aki kantaningaia Bauro, e a reke iai ana tai n nora Iesu imwini kautana, e ngae naba ngke e taraa ni “bure te tai” anne.

E kabwarabwaraa taekana n te aro ae mangori. Ni kaineti ma taan rabakau tabeman, te taeka are e kamanena Bauro ikai, e kona n taraa n tiribure iai. Ngkana anne ae e iangoia Bauro, e a boni kaotia iai bwa e ataia ae e aki tau n anganaki te mwioko arei. Ao e reitia ni kangai: “Ngai te kabanea ni mangori i buakoia abotoro, ao I aki tau n aranaki bwa te abotoro ibukina bwa I a tia ni bwainikirina ana ekaretia te Atua. Ma n ana akoi ae rianako te Atua, ao I a riki n ai arou aei.”—1Kor. 15:9, 10.

Ngaia are ana taeka Bauro aei e kona ni kaineti ma kaotin Iesu nakoina n te aro ae karina, ana tai n rairaki are e aki kantaningaaki, ke e bon aki tau n anganaki te kaotioti ae rangi ni kamimi aei. Ma e mataata raoi n aei bwa e bon iangoa te baere e rinanona Bauro bwa te bwai ae rangi ni kakawaki. E a kakoauaa iai bwa e a tia Iesu ni kautaki mai buakoia maate. Maroaka are e a bon okioki naba n tataekina te baere rinanona, nakoia aomata ngke e uarongorongoa mangautin Iesu!—Mwa. 22:6-11; 26:13-18.