Pọ́ọ̀l beè kọ́ mm̀ 1 Kọ́rìnt 15:8 kọọ̀: “Dee dee nvée nda beè gbóó mònnàe gé​—náa kal ló bée kọọ̀ nda dì belí nen ea è mèà tṍó e dee gáà egaẹ́ ló.” Tṍó ea kil nvéeá, e beè baatẽ́ kọọ̀ Pọ́ọ̀l géè ló bel kilma ló Jíízọ̀s tṍó ea beè di mm̀ a ka gbẹá káála. A beè belí kọọ̀ a ié nèà deè ge mèà, àbèè ge kẽ̀èà aa kemà ú bã mm̀ nyómá vaá gã́bug gbáá à tení besĩ́ì íb nakà kẽ̀èà aa kemà úá à kalá naaá. Sõò, tṍó e kpáà nó gã́ belí, e beè mòn kọ à dú bíi gè nyaaná bá ló bààtẽ́á.

À dú kà kà kọọ̀ Pọ́ọ̀l géè kọ́ nú ea beè naaáé ló besĩ́ à kalá dú neǹ Kráìst. Sõò, éé ní ea géè kọ̀ tṍó ea kọ́ọ̀ a beè “mèà tṍó e dee gáà ègàẹ̀ẹ́ ló” é? À íé gã́bug nú ea beè láá naa kọ á kọ́ vó.

A gè dú neǹ Kráìst beè naaá mm̀ bùló. À ólò dú nu bọ̀ọ̀ló tṍó e nen meà e dee gáà egáé ló. Tṍó e Sọ́ọ̀l (ea beè kọlà Pọ́ọ̀l tṍó e tṍó téní) géè àà kil Dàmáskọ̀s boo béè ge biigè ló gbò nyòòne nvéè Kráìst e ba beè di kĩá, náa beè ẹ̀bmà dẽe kọọ̀ àé monìè Jíízọ̀s ea beè kẽ̀èà aa kemà úá mm̀ mòà nù dẽe gbẹá èèlè. Bé e Pọ́ọ̀l nè Jíízọ̀s beè loá bel naa beè palàge bọọ́ ló ẹlẹ nè gbò níí Kráìst ea beè noo gè biigè lóá. Gbá ló vó, nú ea beè naaáí beè aga bá naa ní e náa beè mòn nu mm̀ sìgà tṍó.​—Tóm 9:​1-9, 17-19.

A beè kììa kẽ “lọ̀ tṍó.” Moǹ bel Gríìk e bà tab naamá “nen ea meà tṍó e dee gáà egaẹ́ ló é” é láá dú gè tàb nàgé naamá “nen ea mea lọ̀ tṍó.” The Jerusalem Bible kọọ̀: “Aẹ̀ belí kọọ̀ m beè meà tṍó e tọ́ọ̀ nen náa beè ẹ̀bmà dẽe.” Pọ́ọ̀l beè dú neǹ Kráìst tṍó e Jíízọ̀s ni kil káála. Pọ́ọ̀l náa beè mòn Jíízọ̀s besĩ́ à kalá kil káála belí bé e gbò ea ló bel kilma ló mm̀ gbò gã́belí beè mònìè naa. (1 Kór. 15:​4-8) Ge kọọ̀ Jíízọ̀s bùló silà ló Pọ́ọ̀l tṍó e náa géè ẹ̀bmà dẽe beè naa kọ á ié nèà deè ge mònìè, náa kal ló béè kọọ̀ a beè belí kọ à nááá “lọ̀ tṍó.”

À géè ló bel kilma ló a bá boo bá ea bọ́ló. Sìgà gbò nò kpá ẹb kọọ̀ bel e Pọ́ọ̀l lóí zógè kọọ̀ náa beè nvèè ka ló a bá. Be níà nú ea beè di bùlà Pọ́ọ̀lẹ, à zógè kọọ̀ nèà deè ea íèè ge dú neǹ tómá náa bọ́ẹ̀ẹ ló. A beè kọọ̀: “Boo bée kọ nda ní ea dú nen ea kil kẽ zẹ̀ẹ̀ dénè gbò e Jíízọ̀s lẹẹlà ẹ​—kàsĩ́ náa bọ́ló kọ bà á kolí nda nen e Jíízọ̀s lẹẹlà, boo bée kọ nda beè biigè ló bõ̀òna ló Bàrì. Sõò sàn nyíe Bàrì ní ea túm naamá nen em dúù é.”​—1 Kọ́r. 15:​9, 10.

Vóà naa, à belí kọọ̀ Pọ́ọ̀l géè ló bel kilma íb sĩ́deè e Jíízọ̀s silàẹ̀ẹ́ ló e náa beè ẹbmàè dẽe, bé ea nyááá vaá dú neǹ Kráìst naa, àbèè kọọ̀ náa bọ́ẹ̀ ló ge ié íb mòà nù dẽe ea dú dũ̀ùnèá. Kọ̀láá bé ea meà naa, Pọ́ọ̀l beè palàge nvèè ka ló nú ea beè naaáí. A beè palàge àgala boo kọọ̀ Jíízòṣ beè kẽ̀èà aa kemà ú. Níà nú ea náa vaá à ólò bọ̀ọ̀gẹ̀ ló bel kilma ló bùló nú ea beè naaáé ló tṍó ea gé ló bel ea kil ló kẽ̀èà aa kemà ú Jíízọ̀s nè gbò nen ẽ́.​—Tóm 22:​6-11; 26:​13-18.