Apóstol Pablo heʼi 1 Corintios 15:8-pe: “Ipahaitépe ojechauka avei chéve, upévare che ajogua peteĩ mitã onase vaʼekuépe og̃uahẽ mboyve itiémpo”. Anteve ñande ñantende kuri ko versíkulope apóstol Pablo oñeʼẽha haʼe ohechárõ guare peteĩ visiónpe Jesús ogovernamaha yvágape. Haʼetévaicha ku onase jey vaʼekue térã orresusitáva oikove hag̃ua yvágape hetaiterei tiémpo oiko mboyve peichagua rresurreksión. Péro ojestudia porãve rire ko versíkulo, ojehecha tekotevẽha ñakambia upe ñantende lája.

Añetehápe ningo koʼápe Pablo oñeʼẽ oikórõ guarére chugui kristiáno. Péro, ¿mbaʼépa heʼise raʼe heʼírõ guare ojoguaha “peteĩ mitã onase vaʼekuépe og̃uahẽ mboyve itiémpo”? Jahechamína koʼág̃a mbaʼéichapa ikatu ñantende upéva.

Derrepentete oiko chugui kristiáno ha omondýi chupe upéva. Onase jave peteĩ mitã itiempopeʼỹ ningo siémpre oporosorprende. Saulo (upe rire ojekuaáva apóstol Pábloramo) oho kuri Damáscope opersegi hag̃ua umi kristianokuérape, ha noimoʼãiete kuri ohokuévo ohechataha peteĩ visión rupive Jesúspe orresusita rire. Pablo oñesorprendeterei vaʼekue oikórõ guare chugui kristiáno, ha avei umi kristiáno haʼe opersegisévape hína upe siudápe. Ko mbaʼe oiko vaʼekue tuichaiterei omondýi Páblope ha peteĩ tiémpore opyta ndohechavéi mbaʼevete (Hech. 9:1-9, 17-19).

Oiko chugui kristiáno “oñeimoʼãʼỹ jave”. Griégope pe fráse “peteĩ onaséva itiempopeʼỹ” ikatu avei ojetradusi “peteĩ onaséva oñeimoʼãʼỹve jave”. La Biblia de Jerusalén oexplika kóicha: “Haʼete ku anaséva avave nohaʼarõi jave”. Páblogui oikórõ guare kristiáno, Jesús ja oĩ jeýma kuri yvágape. Unos kuánto versíkulo upe mboyve, apóstol Pablo oñeʼẽ kuri umi ohecha vaʼekuére Jesúspe oikove jey rire. Péro haʼe ndoguerekói kuri la oportunida ohechávo Jesúspe oho mboyve yvágape (1 Cor. 15:4-8). Jesús ojehechaukárõ guare Páblope, omeʼẽ chupe la oportunida ohecha hag̃ua chupe orresusita rire.

Ikatu kuri oñeʼẽ ijehe umíldemente. Según umi expérto umi mbaʼe Pablo heʼi vaʼekue ko versíkulope ikatu ohechauka haʼe ojeapoʼiha oñeʼẽvo ijehe. Oiméramo Pablo opensa raʼe upéicha, haʼe orrekonose nomereseiha pe priviléhio oservi hag̃ua apóstolramo. Upévare haʼe heʼi voi vaʼekue: “Che ningo pe michĩvéva umi apóstol apytépe ha namereséi voi ojeʼe cherehe haʼeha apóstol, pórke yma apersegi vaʼekue Ñandejára kongregasiónpe. Péro Ñandejára imbaʼeporãiterei rupi, koʼág̃a che peteĩ apóstol” (1 Cor. 15:9, 10).

Upéicharõ umi mbaʼe apóstol Pablo heʼi vaʼekue ko versíkulope ikatu hína heʼise derrepentete Jesús ojehechauka hague chupe, oñeimoʼãʼỹ jave oiko hague chugui kristiáno térã haʼe nomereséi hague oguereko pe priviléhio ohechávo peichagua visión ijojahaʼỹva. Tahaʼe haʼeháicha, Pablo omombaʼeterei kuri umi mbaʼe oiko vaʼekue hese. Upéva ohechauka porã kuri chupe Jesús orresusitáma hague. Upévare ndajahecharamói Pablo pyʼỹinte imanduʼa hague ko mbaʼe ohasa vaʼekuére opredika jave umi héntepe Jesús oikove jeýma hague (Hech. 22:6-11; 26:13-18).