▪ Raws li 1 Kauleethaus 15:8, Paulus tau hais tias: “Thaum kawg nws los tshwm rau kuv pom, kuv zoo li tus menyuam uas yug thaum tseem tsis tau txog caij yug.” Yav thaum ub, peb xav hais tias yog Paulus hais txog lub caij uas Yexus tshwm ci lam lug los rau nws pom. Paulus pom li no zoo yam li nws sawv mus txog saum ntuj ceeb tsheej ib vuag. Tiam sis tau ntau pua xyoo tom qab nws mam li sawv mus saum ntuj ceeb tsheej thiab pom Yexus ci ntsa iab li ntawd. Thaum peb muab nqe no coj los mus ua zoo soj ntsuas, peb pom tau tias yuav tau muab tej uas peb ib txwm ntseeg ntawd hloov me ntswb me ntsis.

Thaum Paulus hais li no, twb yog nws hais txog lub caij nws hloov los ua ib tug ntseeg. Tiam sis ua li cas nws ho hais tias nws zoo li “tus menyuam uas yug thaum tseem tsis tau txog caij yug”? Tej zaum ntshe yog tim qho yam nws thiaj tau hais li no.

Qhov Yexus tshwm rau Xaulus pom ua rau nws ceeb nkaus. Zoo yam li ib tug me nyuam yug thaum tseem tsis tau txog caij, Xaulus uas tom qab no muab hu ua Paulus, taug kev mus tsim txom cov ntseeg rau ntawm lub nroog Damaxes. Nws tsis faj hais tias Yexus yuav los tshwm rau nws pom. Tiam sis thaum nws pom Yexus tag, nws txawm hloov hlo nws lub siab lub ntsws tag ua rau nws thiab cov ntseeg hauv lub nroog ntawd xav tsis thoob li. Txuas ntxiv ntawd, qhov uas nws ceeb ua rau nws txawm tsis pom kev tau ob peb hnub.​—Tes Haujlwm 9:1-9, 17-19.

Nws los ntseeg “tsis raws caij.” Cov neeg Kilis txhais lub ntsiab lus “tus menyuam uas yug thaum tseem tsis tau txog caij yug” tias “tus me nyuam yug tsis raws caij.” Phau Vajlugkub uas cov Kav Tos Liv txhais tau hais tias: “Zoo li yug tau kuv los tsis muaj neeg paub.” Thaum Paulus los ntseeg, Yexus twb rov mus rau saum ntuj ceeb tsheej lawm. Nws twb tsis pom Yexus mus saum ntuj ceeb tsheej li cov nws hais tag los lawm pom. (1 Kauleethaus 15:4-8) Txawm li ntawd los, Yexus haj tseem los tshwm rau Paulus pom ib vuag.

Tej lus nws hais qhia tias nws tsis tsav hwj chim. Ib txhia neeg tshawb fawb Vajlugkub tau hais tias Paulus hais tau tshawv tshawv. Yog tias muaj raws li no tiag, tej zaud ntshe Paulus xav tias nws tsis tsim nyog tau los ua ib tug tub txib. Paulus tau hais tias: ‘Kuv yog tus uas muaj lub hwjchim qis dua cov timthawj huv tibsi, kuv tsis tsimnyog tau lub npe hu ua timthawj, rau qhov kuv tau tsimtxom cov ntseeg Vajtswv lawm. Tiamsis vim Vajtswv txoj koob hmoov, kuv thiaj tau ua ib tug timthawj.’​—1 Kauleethaus 15:9, 10.

Raws li hais tas los no, tej zaum Paulus hais txog thaum Yexus tshwm rau nws pom ua rau nws ceeb nkaus, nws los ntseeg tsis raws caij, los sis nws tsis tsim nyog tau los ua ib tug tub txib. Txawm yuav yog li cas los xij peem, Paulus yeej ntaus nqe hnyav rau qhov nws pom Yexus ib vuag. Qhov no qhia tau tias Yexus yeej sawv hauv qhov tuag rov qab los lawm tiag tiag. Yog li ntawd, nws thiaj nquag nquag piav rau txhua tus mloog txog qhov nws pom Yexus ib vuag kom sawv daws thiaj li paub tias Yexus yeej sawv rov los lawm tiag.​—Tes Haujlwm 22:6-11; 26:13-18.