Korinto Ginigunana 15:8 ese ia hahedinaraia, Paulo ia gwau: “Dokonai lau dekenai danu ia hedinarai, hegeregere lau be ena nega maorona ai ia vara lasi natuna ta bamona.” Guna ita laloa, unai siri be Paulo ese matahanai lalonai guba dekenai Iesu ia itaia neganai ia dekenai ia vara gauna ia herevalaia. Unai be hegeregere Paulo be guba ena toreisi lou ia abia, to unai toreisi lou karana be lagani momo murinai do ia vara gauna. To, unai siri idia stadilaia namonamo murinai, idia laloparara siri ena anina idia hahedinaraia namonamo be namo.

Paulo be matahanai ia itaia neganai ena mauri ia haidaua karana ia herevalaia. To ia gwau ia be “nega maorona ai ia vara lasi natuna ta bamona” neganai, iena hereva ena anina be dahaka? Mani gau haida ita herevalaia.

Paulo ena mauri ia haidaua karana be hoa gauna bona ia vara haraga. Beibi ta be ena nega maorona ai ia vara lasi karana be hoa gauna. Saulo (gabeai idia gwauraia Paulo) be Keristani taudia ia dagedage henia totona Damaseko dekenai ia lao lalonai, ia laloa lasi ia toreisi lou vadaeni tauna Iesu be matahanai lalonai do ia itaia. Paulo be ena mauri ia haidaua karana dekenai ia hoa bona unai siti dekenai ia ura dagedage henia Keristani taudia dekenai danu unai be hoa gauna. Danu, Paulo dekenai ia vara karana be ia vara haraga dainai, nega sisina lalonai gau ta ia itaia lasi.​—Kara 9:1-9, 17-19.

Iena mauri ia haidaua karana be “nega kererena” ai ia vara. Grik gado ai inai hereva, “nega maorona ai ia vara lasi natuna” be inai bamona idia hahanaia danu, “nega kererena ai ia vara natuna.” The Jerusalem Bible ese unai hereva be inai bamona ia gwauraia: “Unai be hegeregere ta ia laloa lasi negana ai lau vara.” Paulo ena mauri ia haidaua negana ai, Iesu be guba dekenai ia daekau vadaeni. Paulo be siri 5 ia lao 7 ai ia herevalaia taudia bamona lasi, badina ia ese Iesu, ia toreisi lou vadaeni tauna, be guba dekenai ia do daekau lasi neganai ia itaia lasi. (1 Kor. 15:4-8) Paulo ia laloa lasi dalanai Iesu be ia dekenai ia hedinarai, unai amo Paulo ese Iesu ia itaia, ena be unai be “nega kererena.”

Ia be mai manau ida sibona ia herevalaia. Diba bada taudia haida idia gwau, Paulo ese ia gaukaralaia herevana ese ta laloa maragi karana ia hahedinaraia. Bema Paulo ena hereva ena anina be unai bamona, vadaeni ia hahedinaraia ia be hegeregere lasi aposetolo tauna ta ai ia lao totona. Oibe, Paulo ia gwau: “Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna, badina lau ese Dirava ena kongrigeisen lau dagedage henia. To Dirava ena hebogahisi hereadaena dainai, inai gaukara lau abia.”​—1 Kor. 15:9, 10.

Unai dainai, Paulo be unai hereva ia gwauraia neganai, reana iena hereva anina be, ia laloa lasi dalanai Iesu be ia dekenai ia hedinarai, ena mauri ia haidaua karana be nega maorona ai ia vara lasi, eiava ia be hegeregere lasi hoa dalanai unai matahanai ia itaia. Herevana dahaka ia vara, to Paulo be ia dekenai ia vara gauna ia laloa bada. Bona unai ese ia durua ia abia dae momokani Iesu be mase amo ia toreisi lou vadaeni. Unai dainai, Paulo be ma haida dekenai Iesu ena toreisi lou sivaraina ia harorolaia neganai, nega momo ia dekenai ia vara gauna ia herevalaia.​—Kara 22:6-11; 26:13-18.