Nitihka 1 Korint 15:8, Paul madahka: “Ke penudi, iya mega mandangka diri ngagai aku, ke baka anak mit ke ada enda chukup bulan.” Suba kitai ngumbai Paul benung bejaku pasal pengalaman iya empu lebuh iya bisi genera pasal Jesus ba serega. Nya baka ke iya bisi peluang ada, tauka diangkatka idup baru nyadi melikat tumu agi ari maya ti udah ditetapka, iya nya beratus taun sebedau pengangkat ari mati ngagai serega amat deka nyadi. Tang, pengudah belajarka ayat tu enggau dalam agi, kitai engka patut ngubah penemu kitai pasal ayat tu.

Amat, utai ke dipadah Paul ditu ditujuka ngagai utai ke nyadi maya iya nyadi orang Kristian. Tang, nama reti ku Paul lebuh iya madahka diri “ada enda chukup bulan”? Engka bisi sekeda reti.

Iya enggau ngenyit nyadi orang Kristian, lalu nya utai ti tusah ba iya. Anak mit ke ada enda chukup bulan kesuah iya ada enggau ngenyit. Saul (ke udah nya dikumbai Paul) benung ba pejalai nuju ngagai Damaskus kena merinsa orang Kristian dia. Iya enda nyangka diri deka meda genera pasal Jesus ke udah diangkatka idup baru. Lebuh Paul nyadi orang Kristian, nya ukai ngasuh iya aja ke tekenyit tang mega orang Kristian ke deka diperinsaka iya ba kuta nya. Pia mega, utai ke nyadi nya amat tusah ba iya. Lalu, iya mega nyadi buta sementara.—SKR. 9:1-9, 17-19.

Iya nyadi orang Kristian ba maya ti salah. Salin Bup Kudus Baru madahka, Paul “ada salah maya.” Lebuh Paul nyadi orang Kristian, Jesus udah niki ngagai serega. Enda baka orang bukai ke disebut Paul ba ayat sebedau nya, Paul empu bedau kala meda Jesus ke udah diangkatka idup baru sebedau Jesus niki ke serega. (1 Kor. 15:4-8) Paul engka enda nyangka diri deka betemu enggau Jesus, tang utai ke nyadi nya meri Paul peluang meda Jesus ke udah diangkatka idup baru taja pan ba maya ti salah.

Paul ngayanka pemaruh ati lebuh bejaku pasal diri empu. Nitihka sekeda pakar, rambai jaku ke dikena Paul ditu ulih mai reti ti ngemaruhka. Enti nya ke bisi ba runding Paul, reti iya Paul ngumbai diri enda layak nyadi rasul. Nambahka nya, Paul mega madah: “Aku tu meh ke pemadu enda beguna entara semua bala rasul. Aku enda layak dikumbai rasul, laban aku kala merinsaka raban gempuru Petara. Tang ketegal pemanah ati Petara ti besai, aku ulih nyadi rasul.”—1 Kor. 15:9, 10.

Nya alai, Paul engka benung bejaku pasal chara ti ngenyit sereta enda dijangka lebuh Jesus ngayanka diri ngagai iya, pengalaman iya empu ke enda nyangka diri deka nyadi orang Kristian, tauka iya berasai enda layak nerima genera ti ngalitka ati nya sereta nyadi rasul. Enda ngira nama kebuah iya, pengalaman tu tentu amat penting ba Paul. Nya ngasuh iya amat yakin, Jesus udah diangkatka idup baru. Nya kebuah iya suah nyebut pengalaman tu lebuh nginjil ngagai orang bukai pasal pengangkat Jesus ari mati.—SKR. 22:6-11; 26:13-18.