Kinagi ni Pablo ta 1 Corinto 15:8: “Ta pangurianan, nappasingan gapa [yayya] niakan maski paga nu kagittà i tadday nga neyana ta ari nga hustu nga tiempo.” Ta nappasa, nipakanawag tam nga posible nga tukuyan taw ni Pablo i ekspiriensa na turi ta nakasingan yayya tu sirmata ni Jesus ta langi. Megafu tatun, gitta na neddan yayya tu pribilehio nga meyana, onu maginnolay bilang espiritu, ginatu nga dagun nige nga mesimmu i kunnatun nga klase na paginnolay. Ngem kabalin na mas aru paga nga paggigiammu, nasingan nga mawag tu moli i pangipakanawag tatun nga teksto.

Kurug nga tukuyan tatun ni Pablo i nesimmu turi ta nakumberte yayya. Ngem anni i kayà na nga kagian turi ta kinagi na nga ‘neyana yayya ta ari nga hustu nga tiempo’? Yaw ira i posible nga rason.

Lanna anna kappaganassing i pakkakumberte na. Kakkadda-kaddag nu egga i meyana ta ari nga hustu nga tiempo. Durante nga mabbiahe si Saul (nga nakilala bilang Pablo) mappange ta Damasco tapenu persigian i Cristiano ira tari, ari na nga ekspektan nga makasingan yayya tu sirmata meyannung ta napaginnolay nga si Jesus. Ari laman tu si Pablo i nakaddag ta nikakumberte na. Nakaddag gapa maski danuri Cristiano nga plano na nga persigian tatun nga siudad. Kappaganassing gapa yatun nga naekspiriensa na megafu ta temporario yayya nga nabbalin tu vuling.​—King. 9:1-9, 17-19.

Nakumberte yayya ta “ari nga hustu nga tiempo.” Kunnaw i translation tatun na The Jerusalem Bible: “Gitta na neyana ngà ta tiempo nga awan tu magekspekta tatun.” Turi ta nakumberte si Pablo, nakatoli ngana si Jesus ta langi. Ari tu kagitta na disipulos nga tinukoy ni Pablo ta nappasa ira nga versikulo, ari na mismu nasingan i napaginnolay nga si Jesus nige na nga minay ta langi. (1 Cor. 15:4-8) Ngem megafu ta sirmata, neddan tu chansa si Pablo nga masingan i napaginnolay nga si Jesus, maski nu gitta na nesimmu yatun ta “ari nga hustu nga tiempo.”

Mapakalinno i pagimamma na ta baggi na. Segun ta karuan nga iskolar, i uvovug ira nga inusa taw ni Pablo ay awayya na tu mangiyalalinno ta baggi na. Nu kunnatun gafu i kayà kagian ni Pablo, rekunnisian na nga ari yayya nga mepappangngo ta pribilehio nga neyawa ta nisa. Kakurugan na, kinagi na paga lagu: “Sakan i kalinnakkan ta paddia-paddian ta ngamin nga apostol. Ari ngà paga lagu nga mepangngo nga magalan tu apostol ta zinara-darum ku i iglesia na Dios. Ngem megafu ta allo na Dios, nabbalin ngà tu apostol.”​—1 Cor. 15:9, 10.

Posible gafu nga tuku-tukuyan ni Pablo i lanna nga pappasingan ta nisa ni Jesus, i gavva nga pakkakumberte na, onu i parrekunnisi na nga ari yayya nga mepappangngo nga makasingan tatun nga kappabbaw nga sirmata. Maski anni paga tatun i rason ni Pablo, tagibaloran na yatun nga ekspiriensa na. Megafu gare tatun, napakurug na mismu nga talaga napaginnolay si Jesus. Yari tu kanayun na nga ikagi yatun nga ekspiriensa na kada ilayyagayya na i meyannung ta paginnolay ni Jesus.​—King. 22:6-11; 26:13-18.