Ná 1 Ndị Kọrịnt 15:8, Pọl sịrị: “Mụnwa bụkwa onye ikpeazụ ọ pụtara n’ihu ya, dị ka à ga-asị na m bụ nwa a mụkworo amụkwo.” N’oge gara aga, anyị kwuru na ihe Pọl na-ekwu ebe a bụ ihe mere ya mgbe ọ hụrụ ọhụụ ebe Jizọs dị ebube n’eluigwe. O yiri ka e meere ya ihe ọma mụọ ya, ma ọ bụ kpọlite ya n’ọnwụ, ya abụrụ mmụọ mgbe oge na-erubeghị, ọtụtụ narị afọ tupu a malite inwe ụdị mbilite n’ọnwụ ahụ. Ma, ka anyị na-amụkwu amaokwu a, anyị chọpụtara na e kwesịrị ịgbanwe otú anyị sibu akọwa amaokwu a.

O doro anya na Pọl na-ekwu gbasara ihe mere mgbe ọ ghọrọ Onye Kraịst. Ma, gịnị ka o bu n’obi mgbe ọ sịrị na ‘a mụkworo ya amụkwo’? E nwere ihe ụfọdụ o nwere ike ịbụ ha ka o bu n’obi.

Ọ ghọrọ Onye Kraịst na mberede, o sikwaara ya ike. Ọtụtụ mgbe, ịmụkwo nwa na-eme na mberede. Mgbe Sọl (bụ́ onye e mechara kpọwa Pọl) na-aga Damaskọs ka ọ gaa kpagbuo Ndị Kraịst, ọ tụghị anya ịhụ Jizọs, bụ́ onye a kpọlitere n’ọnwụ, n’ọhụụ. Otú o si ghọọ Onye Kraịst juru yanwa anya, jukwa Ndị Kraịst ndị ahụ ọ chọrọ ịga mesie ike n’obodo ahụ. Ihe ọzọ bụ na otú ahụ o si ghọọ Onye Kraịst mere ka ọ ghara ịna-ahụ ụzọ ruo ụbọchị ole na ole.​—Ọrụ 9:1-9, 17-19.

Ọ ghọrọ Onye Kraịst “n’oge na-adabaghị adaba.” Otú ọzọ e nwere ike isi sụgharịa okwu Grik a sụgharịrị “onye a mụkworo amụkwo” bụ “onye a mụrụ n’oge na-adabaghị adaba.” Otú Jerusalem Bible si kwuo ya bụ: “M dị ka onye a mụrụ mgbe ọ na-enweghị onye tụrụ anya ya.” Mgbe Pọl ghọrọ Onye Kraịst, Jizọs alaghachila eluigwe. Mgbe Jizọs si n’ọnwụ bilie tupu ya alaghachi eluigwe, Pọl ahụghị ya otú ahụ ndị o kwuru banyere ha n’amaokwu ndị bu ụzọ hụrụ ya. (1 Kọr. 15:​4-8) Otú Jizọs si pụta n’ihu ya na mberede nyere ya ohere ịhụ Jizọs mgbe a kpọlitechara ya n’ọnwụ, n’agbanyeghị na o yiri “oge na-adabaghị adaba.”

Ọ na-ekwu na ya erughị eru. Ụfọdụ ndị ọkà mmụta kwuru na ihe Pọl kwuru ebe a na-ada ka onye na-akatọ onwe ya. Ọ bụrụ ihe Pọl bu n’obi, ọ na-ekwu na ya erughị eru ịbụ onyeozi. O kwudịrị, sị: “N’ime ndịozi niile, ọ bụ m kacha nta, e kwesịghịkwa ịkpọ m onyeozi, maka na akpagburu m ọgbakọ Chineke. Ma, ọ bụ amara Chineke meere m ka m ji nwee ike ịna-arụ ọrụ a.”​—1 Kọr. 15:9, 10.

N’ihi ya, o yiri ka ihe Pọl bu n’obi bụ na otú Jizọs si pụta n’ihu ya dara ya na mberede, na oge ọ ghọrọ Onye Kraịst adabaghị adaba, ma ọ bụ na ya erughị eru ịhụ ọhụụ ahụ dị ịtụnanya. Nke ọ bụla ọ bụ, Pọl ejighị ọhụụ ahụ gwuo egwu. O mere ka obi sie ya ike na a kpọlitere Jizọs n’ọnwụ. Ka a sịkwa ihe mere o ji ekwukarị gbasara ihe ahụ ọ na-atụghị anya ya mere ya ma ọ gwawa ndị ọzọ gbasara mbilite n’ọnwụ Jizọs.​—Ọrụ 22:6-11; 26:13-18.