Sigun iti 1 Corinto 15:8, imbaga ni Pablo: “Siak ti kaudian a nagparanganna, a kaslaak nayanak a kurang ti bulanna.” Nailawlawag idi a posible a tuktukoyen ni Pablo ti mismo a kapadasanna idi nasirmatana ni Jesus a naipadayagen idiay langit. Kas man la nasaksakbay a nayanak, wenno napagungar, kas espiritu. Ngamin, ginasut pay idi a tawen sakbay a mapasamak dayta a panagungar. Ngem naadal manen a naimbag daytoy a bersikulo, isu a masapul a mabaliwan ti pannakailawlawag dayta.

Agpayso a ti tuktukoyen ditoy ni Pablo ket ti napasamak idi nakomberte isuna. Ngem ania ti kayatna a sawen idi imbagana nga isu ket “nayanak a kurang ti bulanna”? Dagitoy ti sumagmamano a posibilidad.

Di napakpakadaan ti pannakakombertena ken adda di nasayaat a napasamak. No ti maladaga ket mayanak a kurang ti bulanna, masansan a di ninamnama dayta. Bayat a mapmapan idiay Damasco ni Saulo (a pagaammo idi agangay kas Pablo) tapno idadanesna dagiti Kristiano sadiay, saanna a ninamnama a masirmatana ti napagungar a ni Jesus. Di ninamnama ni Pablo ti pannakakombertena, ken saan met a ninamnama dayta dagiti Kristiano a planona idi nga idadanes iti dayta a siudad. Adda met di nasayaat a napasamak iti dayta a kapadasanna ta temporario a saan a nakakita.​—Ara. 9:1-9, 17-19.

“Saan nga umiso a tiempo” ti pannakakombertena. Ti orihinal a Griego a sao a naipatarus a “nayanak a kurang ti bulanna” ket mabalin met nga ipatarus kas “nayanak iti saan nga umiso a tiempo.” Kastoy ti kuna Ti Baro a Naimbag a Damag Biblia: “Arigna a nayanakak a saan a naitiempo.” Idi nakomberte ni Pablo, nakasublin ni Jesus idiay langit. Saan a kas kadagiti tinukoy ni Pablo kadagiti immuna a bersikulo, saanna a nakita ti napagungaren a ni Jesus sakbay nga immuli idiay langit. (1 Cor. 15:4-8) Ngem naaddaan ni Pablo iti kasta nga oportunidad idi dina ninamnama nga agpakita kenkuana ni Jesus, uray no dayta ket kasla “saan nga umiso a tiempo.”

Naemma ti panangdeskribirna iti bagina. Sigun iti dadduma nga eskolar, ti sasao nga inusar ni Pablo ket mabalin a kaipapananna nga ipabpababana ti bagina. No kasta man idi ti pampanunoten ni Pablo, bigbigbigenna a saan a maikari iti pribilehio a naawatna. Kinapudnona, imbagana: “Siak ti kanunumuan kadagiti apostol, ken saanak a maikari a maawagan iti apostol ta indadanesko ti kongregasion ti Dios. Ngem gapu iti nagpaiduma a kinaimbag ti Dios, maysaak nga apostol.”​—1 Cor. 15:9, 10.

No kasta, mabalin a ti tuktukoyen idi ni Pablo ket ti di ninamnama ken ti di napakpakadaan a panagparang kenkuana ni Jesus, ti pannakakombertena iti saan nga umiso a tiempo, wenno ti panangibilangna iti bagina a saan a maikari a makakita iti dayta a nakaskasdaaw a sirmata. Aniaman kadagita, nalawag nga impateg ni Pablo dayta a kapadasan. Gapu iti dayta, kombinsido unay a talaga a napagungaren ni Jesus. Isu met la gayam a dayta a dina ninamnama a kapadasanna ket masansan a dinakamatna idi inkasabana ti panagungar ni Jesus.​—Ara. 22:6-11; 26:13-18.