Metwokumwe no 1 Ovakorinto 15:8, Paulus okwa ti: “Xuuninwa okwe ke lihololela nge ame ou nda dalwa nda fa okaana inaka fika okudalwa.” Monakudiwa, otwa li twa yelifa kutya Paulus okwa li ta ulike koshimoniwa shaye mwene, eshi a li a mona emoniko laJesus e li moshinge shomeulu. Okwa li a fa a pewa oufembanghenda wokudalwa, ile wokunyumuninwa omwenyo wopamhepo komesho yefimbo omido omafele, ofimbo enyumuko olo inali ningwa. Ashike konima eshi twa konakona moule ovelishe oyo, otwa mona kutya otwa pumbwa okupepaleka eyelifo letu li na sha nayo.

Oshoshili kutya apa Paulus otashi dulika a li ta ulike kwaasho sha li sha ningwa po, opo a ninge Omukriste. Ndele mbela okwa li a hala okutya shike, eshi a ti kutya okwa ‘dalwa a fa okaana inaka fika okudalwa’? Omwa kwatelwa oinima ihapu.

Okwa ninga Omukriste ombadilila nosha li shikumwifi. Okaana ka dalwa inaka fika, ohake uya po inashi teelelwa. Eshi Saul (oo lwanima a ka shiivika e li Paulus) a li molweendo ta i kuDamaskus a ka hepeke Ovakriste, ka li a teelela okumona emoniko li na sha nomunyumunwa Jesus. Paulus haye aeke a li ine shi teelela, eshi a ninga Omukriste, ndele nOvakriste ovo a li a lalakanena oku ka hepeka koshilongo osho, kava li ve shi teelela. Shikwao vali, oshimoniwa osho osha li shikumwifi, nomolwaasho a li a twika oule wokafimbo. — Oil. 9:1-9, 17-19.

Paulus okwa ninga Omukriste “pefimbo la puka.” Outumbulilo wopehovelo wOshigreka, oo wa tolokwa “nda dalwa nda fa okaana inaka fika okudalwa,” otau dulu yo okutolokwa “nda dalwa pefimbo la puka.” O-The Jerusalem Bible oye shi popya ngaha: “Onda dalwa eshi paha li oo e shi teelela.” Eshi Paulus a ninga Omukriste, Jesus okwa hangwa nale a shuna meulu. Mepingafano naavo Paulus a popya meevelishe da tetekela, Paulus ka li a mona omunyumunwa Jesus, ofimbo ina ya meulu. (1 Kor. 15:4-8) Eshi Jesus e lihololela Paulus inashi teelelwa, osha pa Paulus omhito, opo a mone Jesus konima eshi a nyumunwa, nonande osha li tashi monika sha fa sha ningwa “pefimbo la puka.”

Paulus okwa li te lipopi monghedi yelininipiko. Metwokumwe novahongwanhu vamwe, outumbulilo oo Paulus a longifa apa otau linyenge wa fa a li ta sheke. Ngeenge Paulus osho a li e na momadiladilo osho, okwa dimina kutya oufembanghenda, oo a li a pewa wokukala omuyapostoli, ina wana oku u pewa. Nomolwaasho a popya a ti: “Ame ondi dulike kovayapostoli aveshe, noinandi wana nokuli okwiifanwa omuyapostoli molwaashi onda hepekele eongalo laKalunga. Ndele ondi li omuyapostoli omolwefilonghenda laKalunga.” — 1 Kor. 15:9, 10.

Onghee hano, osha fa shi li ngaha kutya Paulus okwa li ta ulike konghedi inai teelelwa nosho yo yombadilila, omo Jesus a li e mu lihololela. Ile eshi a li e wete kutya ina wana pamhepo okulihololelwa monghedi ya tya ngaho. Kashi nee mbudi kutya Paulus okwa li e udite ngahelipi, okwa li a lenga neenghono oshimoniwa osho. Oshe mu ulikila filufilu kutya Jesus okwa nyumuka koufi. Nomolwaasho a li e hole okupopya luhapu kombinga yoshimoniwa osho a li ina teelela, ngeenge a li ta udifile vamwe kombinga yaJesus. — Oil. 22:6-11; 26:13-18.