Mu mukanda wa 1 Kolindu 15:8, poxolo Phawulu wambe: “Mu kusuka-ku wa ngi tukulukila we eme, kala ngi mona a muvwala ande dya kubhixila o kithangana kyatokala.” M’ukulu, twexile mulombolola kwila, nange poxolo Phawulu wexile muzwela yalungu ni ima yabhiti ni mwene kyoso kyamono mu kisuma, Jezú mu ungana wê ku dyulu. Kiki kyedile kala mwene watambula o kijingu kya kumuvwala dingi, mba ku mufukununa, phala kukala ni mwenyu mu nzumbi, mivu yavulu ande dya kubhita o difukunukinu dya athu mu ukexilu yú. Maji mu kutokwesa ni kuxinganeka dingi mu velusu yiyi, twamono kuma kwabhingile ku itendela dingi kyambote.

Mu kidi poxolo Phawulu wakexile muzwela yalungu ni kima kyabhiti kyoso kyakituka Kidistá. Maji ihi yamesenene kuzwela mwene, kyoso kyambe kuma “a muvwala ande dya kubhixila o kithangana kyatokala”? Tumone.

Kyoso Phawulu kya kituka Kidistá seku muthu wafikile kwila kiki kyeji bhita, mwene we wabhiti mu ibhidi. O kabwetele kyoso kya muvwala ande dya kithangana kyatokala, usasumukisa athu oso. Sawúlu (mu kubhita kithangana amwixana poxolo Phawulu) wayi ku Damasku phala kuzukutisa o Jikidistá kwenyoko, mwene kexile mukingila kumona Jezú, mu kisuma. Kyoso Phawulu kya kituka Kidistá seku muthu wafikile kwila kiki kyeji bhita. Kiki ki kyamusasumukisa ngó mwene, maji kyasasumukisa we o Jikidistá ja mukwá, mukonda ene exile mu kingila kyá o kizukutisu. Kiki kyamubhangesa we kubhita mu ibhidi, mukonda katenene kumona mu izuwa itatu.—Ika. 9:1-9, 17-19.

Poxolo Phawulu wakituka Kidistá “mu kithangana kakifikile.” O izwelu “a muvwala ande dya kubhixila o kithangana kyatokala,” mu dimi dya Ngeleku atena ku ilungulula kiki: “Muthu a muvwala mu kithangana kakifikile.” Sayi Bibidya yamba kiki: “Kyedile kala ngi mona a muvwala mu kithangana kakifikile né ngó ku muthu umoxi.” Kyoso Phawulu kyakituka Kidistá, Jezú wavutukile kyá ku dyulu. Ande dya velusu ya 8, poxolo Phawulu watumbula athu amwene Jezú kyoso kyexile mu ixi, maji mwene kamwene Jezú kyoso kyamufukununa ande dya kuya ku dyulu. (1 Ko. 15:4-8) Kuma Phawulu kexile mukingila Jezú ku mutukulukila, kiki kyamubhana o ujitu wa kumona Jezú kyoso kya mufukununa. Kiki kyabhiti “mu kithangana kakifikile.”

Ni kulenduka kwoso poxolo Phawulu wakexile muzwela yalungu ni mwene. Sayi athu ene mutokwesa o Bibidya yamba kuma, o izwelu ya poxolo Phawulu ilondekesa kwila mwene wexile mudibazela. Se kyene mwene kyexile mubhanga Phawulu, mwene wexile mulondekesa kwila kafwamene kutambula o ujitu wexile nawu, wa kukala poxolo. Kupholo mwene wambe: “Ku jipoxolo joso, eme ngala ngi ndenge, ki ngi fwama ku ngixana ngi poxolo, mukonda nga zukutisa o kilunga kya Nzambi. Maji mukonda dya ngalasa ya Nzambi, ngala ngi poxolo.”—1 Ko. 15:9, 10.

Kyenyiki, nange poxolo Phawulu wakexile muzwela yalungu ni ukexilu wa mutukulukila Jezú, o kithangana kakifikile kyoso kyakituka Kidistá. Mba nange mwene wexile muzwela kwila kafwamene kutambula o ujitu wakukala poxolo. Kabasa kima kyamesenene kulombolola poxolo Phawulu, mwene wexile mubhana valolo yavulu mukonda dya Jezú ku mutukulukila. Kiki kyalondekesa ni kidi kyoso kwila Jezú amufukunwine ku madifundu. Mukonda dya kiki, mivu ku pholo, kyoso kyexile mubokela o athu yalungu ni difukunukinu dya Jezú, mwene wexile mwatangela yalungu ni Jezú kumutukulukila mu kithangana mwene kakifikile.—Ika. 22:6-11; 26:13-18.