Паԝлосе шанди 1 Корьнтʹи 15:8-да, ӧса готьбу: «Ахьрийе, пәй һʹәмуйарʹа мьнва хӧйа бу, чаԝа йәки нә сәре хԝә жь дийа хԝә буйи». Гәло бь ван гьлийа әԝи чь дьхԝәст бьгота? Бәре, әм дьфькьрин кӧ гава Паԝлос Иса Мәсиһ бь рʹумәта әʹзмани дитьбу, әԝи ча бежи ԛәдьр станд кӧ пешда һатә буйине, демәк жь мьрьне рʹакьрьне, бона жийина сәр әʹзмана, кӧ бь ԛьрʹна шунда гәрәке бьԛәԝьмийа. Ле гава әм ве рʹезе һур бь һур дьньһерʹьн, әм дьвиньн кӧ гәрәке әв рʹез щурʹәки дьн бе фәʹмкьрьне.

Әԝ йәк рʹаст ә ԝәки ве рʹезеда Паԝлос бәʹса ве рʹоже дькьр, гава Иса сәр рʹийа Шаме ԝирʹа әʹйан бу. Ле әԝи чьрʹа хԝә бәрамбәри зарʹа «нә сәре хԝә жь дийа хԝә буйи» кьр? Чәнд мәʹни һәнә кӧ дьбәкә чьрʹа әԝи ӧса гот.

Баԝәрийа ԝи ньшкева у бь еш һатә гӧһастьне. Һьнә зарʹ ньшкева, демәк нә ԝәхте хԝәда тенә буйине. Гава Шаԝул (йе кӧ наве ԝи паше бу Паԝлос) дьчу Шаме, ԝәки ԝедәре Мәсиһийа бьзеринә, әԝи рʹева ньшкева хәԝн-хәйаләкеда Иса Мәсиһ дит. Паши ве йәке әԝи дәрберʹа баԝәрийа хԝә гӧһаст у бу Мәсиһи. Әв йәк һьм бона ԝи һьм жи бона шагьртед Шамеда тьштәки әʹщебмайи бу. Сәрда жи, чʹәʹвед ԝи дәмәкә кьн кор бун, чь кӧ жерʹа еш ани (Кʹаред Шандийа 9:1-9, 17-19).

Баԝәрийа ԝи «ԝәхтәки нәрʹастда» һатә гӧһастьне. Гава Паԝлос баԝәрийа хԝә гӧһаст, Иса Мәсиһ ида вәгәрʹийабу сәр әʹзмана. Әԝ мәрьв, дәрһәԛа кʹижана Паԝлос рʹезед дьнда готьбу, Иса дитьбун, паши кӧ әԝ жь мьрьне рʹабьбу у пешийа кӧ әԝ вәгәрʹийа әʹзмана, ле Паԝлос Иса нәдитьбу (1 Корьнтʹи 15:4-8). Ле паше, ԛәй «нә ԝәхтда» Иса ԝирʹа хӧйа бу, демәк ԝәʹдәки ӧса кӧ тʹӧ кәс һивийа ве йәке нибу, у әԝ йәк бона ԝи ԛәдьрәки мәзьн бу.

Әԝи бь мьлукти дәрһәԛа хԝә дьгот. Бь дитьна һьнә зандара, Паԝлос хԝә бь ван готьна һьнәки ньмьз кьр. Дьбәкә Паԝлос бь ван готьна дьхԝәст нишан кьра, кӧ әԝи һʹәсаб нәдькьр, ԝәки һежайи ви ԛәдьри йә кӧ бьбә шанди. Паше әԝи сәр хԝә ӧса гот: «Чьмки әз жь шандийа йе һәри паш ьм, кӧ нә лайиԛ ьм шанди жи бемә готьне, чьмки мьн щьвина Хԝәде зеранд. Ле әз бь кʹәрәма Хԝәде мә чь жи һәмә» (1 Корьнтʹи 15:9, 10).

Ләма жи, дьбәкә Паԝлос дьхԝәст бь ван готьнед хԝә нишан кьра, ԝәки Иса ньшкева у бь щурʹе кӧ әԝ һивийе нибу, жерʹа хӧйа бу, йан әԝи баԝәрийа хԝә нә ԝәхтда гӧһастьбу, йан жи кӧ әԝ жь алийе рʹӧһʹанива нә һежа бу, ԝәки хәйаләкә ӧса бьвинә. Чь жи һәбә, әшкәрә йә кӧ Паԝлос ве ԛәԝьмандьне гәләк ԛимәт дькьр. Әԝ ԛә нәдькʹәтә шьке кӧ Иса Мәсиһ жь мьрьне һатьбу рʹакьрьне. Ләма жи, гава әԝи дәрһәԛа мьзгинийа рʹабуна Иса мәрьварʹа гьли дькьр, әԝи гәләк щара бәʹса ве йәке дькьр (Кʹаред Шандийа 22:6-11; 26:13-18).