O 1 Kɔliŋtiaŋ 15:​8 niŋ, mi Pɔɔl dimi aa: “O mɛɛlulaŋ kpɔŋ, ya bɛɛ mbo fula ya o hɔl, ya cho hoo maa chɛlɛkpɛ nda velu teleŋ ndɔɔ ndoo fuuluu wɔ le wo.” O paandoo niŋ, miŋ dimi maa, Pɔɔl wa suɛi a nyɛ yɔŋnuŋ ndu wo okɔɔ teleŋ Chiisu fula ndu o hɔl, o naŋɔɔ ndɔ bɛndoo niŋndo. Nduyɛ maa, o wa ko maa dikeŋnaŋndo ndoo sɔla koŋ ni le mbo miiŋgu yoomu, tuupa mi teleŋ Mɛlɛka ndoo miŋgi niŋ waŋnda yoomu wo ndoo fuuluu. Kɛ, yaasiaa naŋ chɔɔlu tosa a bolle Baabuileŋ ndeŋ okɔɔ wo chɔm maa ŋ nɔ miŋ siŋga sinapɛŋgu naŋ nɔ a leŋ okɔɔ wo.

I cho tonya maa, Pɔɔl wa suɛi a teleŋ Chiisu fula ndu o hɔl mbo mulul yɔŋ ndɔ wɔɔŋndo kɔɔ wo okɔɔ. Kɛ yɛɛ ndoo yiyaŋ yɛ mɛɛ o dimi maa o cho ko “maa chɛlɛkpɛ nda velu teleŋ ndɔɔ ndoo fuuluu wɔ le wo”? Ŋ tofaŋndɔ sabulaŋ latiŋ.

O lepilɛ niŋ kpe o tosa siŋgaŋndo ni le simnɔŋndo Kilisiɔŋnɔɔ. Teleŋnda bɔɔbɔɔ, mi wanaa lafoliaa apum velu chɛlɛkpɛ teleŋ ndɔɔ fuuluu wɔ le wo, a ve kɔl te. Teleŋ Sɔɔl (ŋ veelu ndu hau aa Pɔɔl) wa kɔlaŋ Damasikɔɔ le Kilisiɔŋnda nyɛpalaa tusioo choo wo, o ve kɔl maa Chiisu cho ndu fula o hɔl te. Lelaŋ ndupila bɛɛ, o ve kɔl maa o cho siŋgaŋ mbo simnuŋ Kilisiɔŋnɔɔ le. Nduyɛ Kilisiɔŋaa o wa kɔlaŋ nyɛpalaa tusioo choo wa bɛɛ ve ndi kɔl lende le. Le handɔɔ lechoo, mi nyɛ yɔŋnuŋ ndu o nɛi Damasikɔɔ wo choo wo piiliaŋ ndu tau. Nduyɛ pɛŋ, mbo suma le teleŋ biŋgi.—Walta. 9:​1-9, 17-19.

Mbo siŋgaŋ le simnɔŋndo Kilisiɔŋnɔɔ a “teleŋ wɔɔŋndo.” Diomnda maKilikiila nda hivi le diomndaŋ ndaŋ “chɛlɛkpɛ nda velu teleŋ ndɔɔ ndoo fuuluu wɔ le wo” sim vɛlɛ le “chɛlɛkpɛ nda velu a teleŋ wɔɔŋndo wo.” Mi Baabuiyo hoo, “The Jerusalem Bible” dimi aa: “I wa ko maa mi vialuŋ a teleŋ wana o wana ve ya kɔl te wo.” Teleŋ Pɔɔl siŋgaŋ mbo simnuŋ Kilisiɔŋnɔɔ wo, Chiisu wa niŋ o choo choo niŋ. Mi che bɛɛ mi wanaa o soo a nda okɔɔ o 1 Kɔliŋtiaŋ 15:​5, 6, 7 niŋnda cha Chiisu teleŋ o fula o sɛiyo niŋndo, kɛ ndu chi Chiisu a teleŋ koŋ te. (1 Kɔliŋ. 15:​4-8) Fula Chiisu fula ndu o hɔl lo kinɛi mala ndu ni mbo cha Chiisu, mi che bɛɛ i wa ko maa “a teleŋ wɔɔŋndo” o fula ndu o hɔl ni.

Kaa tusiaŋndo o wa chɔmndo ni mɛɛ o dimi diomnda laŋ. A mɛɛ wanaa sinaa dɛniaa apum dimi yɛ, pɛɛsaa Pɔɔl wa ndupila ni. Te lende Pɔɔl ndoo yiyaŋ ni, mɛɛ dimioo o wa ni maa ndoo suliŋ kposoŋ le mbo simnuŋ kiilanɔɔ le. Nduyɛ pɛŋ, mbo hiau lachi a dimioo aa: “O kiilaa tɛɛŋ kpou, ya cho o sɔvɛ tau le ni. I cho bɛɛ o sɔvɛ le ya veeloo aa kiilanɔɔ le, kanifuule I wa kunda wanaa Mɛlɛkaa nyɛpalaa tusioo choo. Kɛ kɛndɛi bɛnduii Mɛlɛkɛi tosa ni mi wa hau nuaa.”—1 Kɔliŋ. 15:​9, 10.

Naapum, a mɛɛ Chiisu ndoo fula ndu o hɔl o nɛi, o ve ndi kɔl te yɛ o wa suɛi ni. Ɔɔ naapum a mɛɛ ndoo siŋgaŋ o lepilɛ ni kpe mbo simnuŋ Kilisiɔŋnɔɔ yɛ okɔɔ o wa suɛi ni ɔɔ le mɛɛ ndoo yiyaŋ maa o suliŋ le mbo che Chiisu le yɛ. O wa bɛɛ le sabulaŋ ndaŋ ɔɔ le la cheleŋ, mbo cha nyɛ ndoo yɔŋnuŋ ndu wo o sɔvɛ. Mi hei chɔm ndu kpendekele maa Chiisu miiŋgu yoomu. Nduyɛ wana che pɛ maa, mi ndoo soo a hei okɔɔ teleŋ o teleŋ o yooŋgu kɛndɔɔ dimioo niŋ.—Walta. 22:​6-11; 26:​13-18.