Na kutadila 1 Bakorinto 15:8, Paulo tubaka: ‘Kasi na nsuka na bau nionso, yandi monikaka diaka na munu lokola muntu yina butukaka mansombe.’ Na ntama, beto sasilaka ti Paulo vuandaka tubila nde mambu yina metadila ntangu yandi monaka Yesu na nkembo na yandi na dizulu na vizion mosi. Yavuandaka lokola bapesaka yandi nkembo ya kubutuka to ya kufutumuka na luzingu ya kimpeve na ntuala ya basiekle tekila mfutumukunu ya mutindu yina salama. Kasi, na manima ya kulonguka diaka mingi verse yango, yamemonana ti yakele mfunu kusoba nsasulu ya verse yango.

Yakele kedika ti awa Paulo kena kutubila mambu yina salamaka ntangu yandi balukaka samu na kukuma Muklisto. Yinki yandi zolaka monisa ntangu yandi tubaka yandi ‘butukaka mansombe’? Yakele na mitindu mingi.

Kubaluka na yandi samu na kukuma Muklisto salamaka na mutindu mosi ya pete ve mpe yavuandaka bangisa. Mbala mingi kubutuka ya muana mansombe kesalamaka na muntindu mosi ya kintulumukina. Lokola Saulo (yina na manima zabanaka na nkumbu ya Paulo) yandi salaka vuayaje na Damasi samu na kukuenda niokola Baklisto yina vuandaka kuna, yandi kanaka ve kumona Yesu yina futumukaka na vizion mosi. Kubaluka ya Paulo samu na kukuma Muklisto vuandaka diambu ya kukamua samu na yandi mosi kaka ve, kasi samu na Baklisto yina yandi vuandaka na makanisi ya kuniokola na mbanza yango. Diambu yina yandi kutanaka na yau vuandaka mpenza mpasi samu yandi vuandaka mona diaka ve samu na mua ntangu.—Bis. 9:1-9, 17-19.

Yandi balukaka samu na kukuma Muklisto na ‘ntangu ya yimbi.’ Mpova ya ebandeli ya Greki yina mebangulua na ‘muntu yina butukaka mansombe’ lenda tubila diaka muntu yina mebutuka na ntangu mosi ya yimbi.’ The Jerusalem Bible metubila yau mutindu yayi: ‘Yavuandaka lokola kaka munu butukaka na ntangu yina ata muntu mosi ve kanisaka.’ Na ntangu yina Paulo balukaka samu na kukuma Muklisto, Yesu vutukaka deja na dizulu. Na lusuasanu na bantu yina Paulo tubilaka na baverse yina lutaka, yandi monaka ve Yesu yina futumukaka tekila yandi vutuka na dizulu. (1 Bk. 15:4-8) Kumonana ya Yesu na Paulo na mutindu yina yandi kanaka ve, pesaka yandi diluaku ya kumona Yesu na manima ya kufutumuka na yandi, atako yamonanaka ti yavuandaka na ‘ntangu ya yimbi.’

Yandi vuandaka kukitubila na mutindu yina monisaka ti yandi zabaka bandilu na yandi. Na kutadila bantu yankaka ya mayele, bampova yina Paulo kena kusadila awa lenda monana ti yandi vuandaka kukitubila na mutindu mosi ya yimbi. Kana Paulo vuandaka kukitubila na mutindu yina, yandi zabaka ti yandi bongaka ve kubaka diluaku ya kukuma ntumua. Kutu, yandi tatamanaka kutuba: ‘Munu kele muntu yina meluta fioti na kati ya bantumua, mpe munu bonga ve ti babokidila munu ntumua, samu munu monisaka kimvuka ya Nzambi mpasi. Kasi samu na nlemvo ya nene ya Nzambi, munu kele muntu yina munu kele.’—1 Bk. 15:9, 10.

Na yau, yakena kumonana ti Paulo vuandaka tubila mutindu Yesu biminaka yandi na mutindu yina yandi kanaka ve mpe ya mpasi, na diluaku yina yandi bakaka samu na kubaluka lokola Muklisto yina bongaka ve samu na yandi, to yandi bongaka ve kubaka vizion ya kukamua na mutindu mosi ya kimpeve. Yavuanda samu na yinki mfunu, Paulo bakaka diluaku yango na valere. Yandimisaka yandi ti Yesu kufuaka mpe yandi futumukaka. Kondua ntembe, yandi vuandaka tubila mbala na mbala diambu yina kuminaka yandi na mutindu yina yandi kanaka ve, ntangu yandi vuandaka samunina bantu yankaka diambu metadila mfutumukunu ya Yesu.—Bis. 22:6-11; 26:13-18.