Mu 1 Bisi-Korente 15:8, Paulo watâ ti: “Mboko ha mansukina, wamoneka kwe meno [ntiana] muntu wasuluka.” Mu ntama mbo tweri tâka ti, mu verse yi, kampe Paulo mbo keri zonzelaka musamu wu kabwabana na wo bu kabaka timona-meso tia Yezu weri mu mukembo’andi wa ku mazulu. Weri ntiana yandi bahana bweso bwa vutu butuka, peleko bwa vumbuka kwe ba fwa mu luzingu lwa timpeve ntete ntangu yatula, mvula zazingi ntete mvumbukulu ya ku mazulu yabatika. Kâ, bu tavutulu tomo taluzula verse yo, tayizi mona ti tufweti tomesa ngwilu’eto mu mbangululu ya verse yango.

Wa matieleka wena ti Paulo mbo keri zonzelaka ntangu yi kayizi bika ndiatulu’andi ya mbi. Kâ, ngano bwe keri zolo tâka bu katâ ti wabutuka ntiana ‘muntu wasuluka?’ Mbangululu zazingi ze kô.

Mpila yi kasobela ndiatulu ya ta-pulukusu yeri mpe yamuzungasa mutu. Mbutukulu ya mwana wusulukaka mu ta-pulukusu yivulu bâka. Mu ntangu Sole (wu bayizi tâ nkumbu Paulo ha manima) yi keri kwendaka ku Damase mu kwe kwamisa Bakristo, keri’â kêlaka mu baka timona-meso ko tia Yezu wavumbuka kwe ba fwa. Nsobolo ndiatulu ya Paulo ya nzitukulu yeri kwe yandi beni na kwe Bakristo ba kaketi kwe kotesa mu ntontolo ku Damase. Mpe, mu bungu ti tinsamu tio tiatomo mu zungasa mutu, Paulo wafwa meso mwa ntangu fioti.​—Bis 9:1-9, 17-19.

Wayizi soba ndiatulu mu “ntangu ya mbi.” Ntelo ya Greke yi babangula mu “muntu wasuluka” balendi ya bangula mpe mu “muntu wabutuka mu ntangu ya mbi.” Mu bungu dia ntelo yo La Bible de Jérusalem mbo yitâka ti: “Wena ntiana me na butuka mu ntangu yi beri lembo kêlaka.” Mu ntangu Paulo yi kasoba ndiatulu, Yezu watikârila ku mazulu. Luswaswanu lwe ha kati dia yandi na dia bantu ba kazonzela mu verse za ku matu ni lwena’eti, Paulo ka mona Yezu ko mu ntangu yi kavumbuka kwe ba fwa mpe ntete kakâla ku mazulu. (1 Kor. 15:4-8) Timona-meso tio ti keri lembo kêlaka, tiamuhana bweso bwa mona Yezu ha manima ma mvumbukulu’andi kwe ba fwa ni bu sa ti weri ntiana mu “ntangu ya mbi.”

Mbo keri tizonzelaka na kondo kwa lulendo. Mu nzonzolo ya bantu ba mayela, ntelo ya sarila Paulo yilendi bâ na mbangululu ya musamu wa mbi. Tala ti Paulo mabanza ni mo meri nandi, mbo keri zabaka ti bweso bu kabaka ka bwamudelakana ko. Mpe wavutu tâ ti: ‘Meno ndiyôkele mu buke mu bantumwa; meno ka mfwanane’â nkumbu ya ntumwa ko mu bungu ti meno namwisini dibundu dia Nzambi mpasi. Mu bweso bwa Nzambi ndie bu bu ndiena.’​—1 Kor. 15:9, 10.

Kampe, Paulo mbo keri zonzelaka mpila yi keri lembo kekoloko, mpe ya ta-pulukusu ya mu monekena Yezu, bweso bwa soba ndiatulu, peleko mu bungu ti ka fwanakana ko mu timpeve mu baka timona-meso tia nzitukulu tia mpila yo. Mu mpila ni mpila, timona-meso tio nguria mfunu tieri kwe Paulo. Tiamuhana lukwikulu ti Yezu wavumbuka kwe ba fwa. Ntiangu keri vulu zonzelaka musamu wo wu kalembo kekolo bu keri zonzelaka mvumbukulu ya Yezu kwe bantu.​—Bis 22:6-11; 26:13-18.