Kwa 1 Makorinte 15:8, Paulusi naabulezi kuli: “Kwa mafelelezo abonahala ni ku na inge ku yanaapepilwe asika kola kale.” Kwamulaho, neluutwisisa kuli Paulusi uswanela kuba yanaaama kwa muinelo wanaaipumani ku ona hanaaboni Jesu mwa pono ali mwa kanya kwa lihalimu. Nekuswana feela inge kuli naafilwe tohonolo ya kupepwa sinca kamba kuzusezwa kwa lihalimu pili nako ya zuho yecwalo isika fita kale, ili kezahalo yeneka ezahala lilimo zeñata kwapili. Kono hamulaho wa kunyakisisa liñolo le ka butungi, lulemuhile kuli luswanela kucinca kutwisiso yaluna ka za teñi.

Ki niti kuli Paulusi naaama ku zeneezahezi ku yena hacinca kuba Mukreste. Kono naatalusañi hanaabulezi kuli ‘naapepilwe asika kola kale’? Ukona kuba yanaatalusa lika zelatelela.

Kucinca kwahae kuba Mukreste nekuezahezi ka nako yanaasika libelela mi nesi nto yebunolo. Hañata mbututu yepepilwe isika kola kale ikona kupepwa ka nako yesika libelelwa. Saule (yanaatilo bizwa Paulusi hasamulaho) hanaanzaa liba kwa Damaseka kuyo nyandisa Bakreste, ka kusalibelela, aba ni pono ya Jesu yanaazusizwe kwa bafu. Paulusi naasika libelela kuli naakacinca kuba Mukreste mi Bakreste ba mwa muleneñi wo banaalela kuyo nyandisa, nebakomokile hahulu kumubona hacinca. Kuzwa fo, muinelo wo neutahisize kuli atuhele kubona ka nakonyana.—Lik. 9:1-9, 17-19.

Naatusizwe kucinca ka “nako yesaswaneli.” Pulelo ya Sigerike yetolokilwe kuli “yanaapepilwe asika kola kale” hape ikona kutolokiwa kuli “yanaapepilwe ka nako yesaswaneli.” Mwa toloko ya Jerusalem Bible taba yeo itolokilwe kuli: “Nekuswana feela inge kuli nenipepilwe ka nako yene basalibeleli batu.” Paulusi hasikuluha kuba Mukreste, Jesu naasakutezi kale kwa lihalimu. Ka kushutana ni batu babañwi banaabulezi Paulusi kuli nebaboni Jesu yanaazusizwe kwa bafu, Paulusi yena naasika mubona hasaazusizwe kwa bafu ni kukutela kwa lihalimu. (1 Makor. 15:4-8) Jesu hanaabonahezi ku Paulusi ka nako yanaasika libelela, naamufile kolo ya kumubona hamulaho wa kuzusiwa kwa bafu, nihaike kuli nekubonahala inge kuli ki ka “nako yesaswaneli.”

Naaambola ka za hae ka nzila yebonisa buikokobezo. Ka kuya ka licaziba babañwi, pulelo yanaaitusisize Paulusi fa ikona kutalusa kunyaziseza nto yeñwi. Haiba ki zona zanaatalusa Paulusi zeo, uzibe fo naaikutwa kuli naasaswaneli kufiwa tohonolo yanaafilwe. Mane naazwezipili kubulela kuli: “Ki na yomunyinyani hahulu kwa baapositola, mi haniswaneli kubizwa muapositola, kakuli neninyandisize puteho ya Mulimu. Kono ki ka sishemo sa Mulimu hanili senili sona.”—1 Makor. 15:9, 10.

Kacwalo, kubonahala kuli Paulusi naaama kwa taba ya kuli Jesu naabonahezi ku yena ka nako yanaasika libelela, naacincize kuba Mukreste ka nako yanaasika libelela, kamba kwa taba ya kuli naaikutwa kuli naasaswaneli kuboniswa pono yemakaza yeo. Ibe kuli Paulusi naatalusañi, zanaabulezi libonisa hande kuli naaitebuha muinelo wanaaipumani ku ona. Taba yeo nei mukolwisize luli kuli Jesu naazusizwe kwa bafu. Ki lona libaka hanaaambolanga hahulu ka za muinelo wanaaipumani ku ona ka kusalibelela hanaakutazanga ku babañwi ka za zuho ya Jesu.—Lik. 22:6-11; 26:13-18.