Kukwatañana na 1 Bene Kodinda 15:8, Polo wānenene amba: “Ku mfulo waumwekela ne amiwa pamo bwa kudi mwana mubutulwe kitatyi kekyabwene.” Mafuku kunyuma twashintulwile amba, bimweka bu Polo wādi wisambila pa byāmutene aye mwine paāmwene kimonwa kya Yesu mu ntumbo ya momwa mūlu. Byādi pamo bwa aye wāpelwe dyese dya kubutulwa, nansha kusangulwa ku būmi bwa ku mushipiditu kumeso kwa kitatyi, myaka tutwa na tutwa kumeso kwa luno lusangukilo kushilula. Inoko, pa kupwa kwifunda uno vese na mushike, bimweka’mba tufwaninwe kujadika mwivwanino wetu wa uno vese.

Na bubine, Polo wisambilanga pano pa byālongekele kitatyi kya kushinta kwandi. Ino le i bika byaādi usaka kunena paānenene amba wābutwilwe “kitatyi kekyabwene”? Kubwanya kwikala bubinga buvule bwaānenene namino.

Kushinta kwandi kwādi kwa kibozo kadi kuzakaja. Mwana mubutulwe kitatyi kekyabwene, wiyanga divule mu kitulumukila. Solo (wāyukene mwenda mafuku bu Polo) paādi wenda ku Damakasa mwanda wa kukapangapanga’ko bene Kidishitu, kādipo ulanga’mba ukamona kimonwa kya Yesu musanguke. Kushinta kwa Polo kekwāmutulumwinepo enka aye mwine, ino kwātulumwine ne bene Kidishitu baādi ukimba kukapangapanga mu Damakasa. Kadi uno mwanda wāmuzakeje bininge, watunya enka ne kumona mu kitatyi kampanda.​—Bil. 9:1-9, 17-19.

Wāshintyile pa “kitatyi kyampikwa kufwaninwa.” Kishima kibajinjibajinji kya Kingidiki kyalamwinwe bu “mwana mubutulwe kitatyi kekyabwene,” kibwanya ne kwalamunwa bu “mwana mubutulwe pa kitatyi kyampikwa kufwaninwa.” Bible de Jérusalem i mwalamune’po amba: “Byadi pamo’nka bwa ami wabutwilwe kitatyi kekyadipo kilangila muntu nansha umo.” Kitatyi kyāshintyile Polo, Yesu wādi kala ke mujokele mūlu. Kwishila na boba baēsambīle’po mu mavese abadikile, Polo kāmwenepo Yesu musanguke kumeso kwa aye kukanda mūlu. (1 Ko. 15:4-8) Kumweka kwāmwekele Yesu mu kitulumukila kudi Polo, kwāmupele mukenga wa kumona Yesu musanguke, nansha byobyāmwekele bu i pa “kitatyi kyampikwa kufwaninwa.”

Wādi wīsambila pādi aye mwine na kwityepeja. Mungya befundi bamo, binenwa bingidije Polo pano, bibwana kwikala na mulangwe wa kwipēlula. Shi bino byo byādi na Polo mu ñeni, nabya wādi witabija’mba, kādipo ufwaninwe dyese dyāmupelwe. O mwanda, wāendeleje na kunena’mba: “Ami ne mutyetyetyetye mu batumibwa, kadi nkifwaninwepo nansha kwitwa bu mutumibwa, mwanda nadi mpangapanga kipwilo kya Leza. Ino pa kanye ka ku buntu bitupu ka Leza kendi mongikadile’mu.”​—1 Ko. 15:9, 10.

Nanshi bibamweka’mba, Polo ye uno wādi wīsambila pa muswelo wa kibozo ne wa mu kitulumukila wāmumwekēle Yesu, pa kitatyi kekyādipo kilangilwa kya kushinta kwandi, nansha bu kādipo mufwaninwe kumona kino kimonwa kya kutendelwa. Nansha shi byādi namani, Polo wākwete na bulēme uno mwanda wāmutene. Kino kyāmukulupije amba Yesu i musanguke mu bafwe. Ke kya kutulumukapo shi kitatyi kyaādi usapwila bantu bakwabo myanda ya lusangukilo lwa Yesu, wādi wisambila kyaba kyonso pa uno mwanda wāmutene mu kitulumukila.​—Bil. 22:6-11; 26:13-18.