Ka luwore gi 1 Jo-Korintho 15:8, Paulo nowacho kama: “Mogik chuth, nofwenyorena bende ka ng’at ma ne onyuol ka ndalone podi.” Kinde machon, wasebedo ka walero ni Paulo ne wuoyo e wi gima notimorene owuon ka ne Yesu ofwenyorene. Ne waleroga ni nomiye duong’ mar bedo ng’ama onyuol kata mochier mondo oyud ngima mar roho ka ndalo pok ochopo, tiende ni higni mang’eny ka chier ma kamano pok ochakore. Kata kamano, nonro mosetim e ndikoni nyiso ni dwarore ni walok yo ma wasebedo ka walerego.

En adier ni e ndikono, Paulo ne wuoyo kuom gima notimorene ka noloke mobedo Jakristo. Kata kamano, ang’o ma notemo wacho ka noluongore ni “ng’at ma nonyuol ka ndalone podi”? Nitie gik mang’eny ma ne nyalo miyo oluongre kamano.

Lokruokne notimore apoya kendo e yo malich miwuoro. Nyathi monyuol ka ndalone pok oromo, poyoga ji ahinya. Sama Saulo (ma bang’e nodwog oluong ni Paulo) ne nie yo ka dhi Damaski mondo osand Jokristo ma ne ni kuno, ne ok opar ni nonyalo romo gi Yesu ma nosechier. Lokruogno nopoyo Paulo kod Jokristo ma nodhi sando e taon mar Damaski. To e wi mano, lokruogno notimore e yo malich ahinya, mi noa kanyo ka en muofu kendo nobedo kamano kuom ndalo moko.​—Tich 9:1-9, 17-19.

Noloke e “sa marach.” E dho Grik machon, wach molok ni “ng’at ma nonyuol ka ndalone podi,” bende inyalo lok ni “ng’at monyuol e sa marach.” The Bible in Luo, 1976 oloko ndikono kama: “Nofwenyorana mana ka nyathi monywol apoya.” Sama niloko Paulo mondo obed Jakristo, Yesu nosedok e polo. Paulo ne ok oneno Yesu bang’ chierne kendo ka ne pok odok e polo kaka jomamoko ma nonene miwuoyoe e wes motelo ne wes mar 8. (1 Kor. 15:4-8) Fweny ma apoyano nomiyo Paulo oneno Yesu kata obedo ni nonene e “sa marach.”

Nowuoyo kuome owuon e yor bolruok. Ka luwore gi josomo moko, weche ma Paulo notiyogogo nyalo nyiso ni ng’ato ochare ahinya. Ka di po ni mano e gima Paulo ne nigo e paro, nyalo bedo ni Paulo ne neno ni ok owinjore neno Yesu. Paulo nodhi nyime wacho kama: “An e ma atinie mogik kuom joote, kendo ok awinjora mondo oluonga ni jaote nikech ne asando kanyakla mar Nyasaye. Kata kamano, kuom ng’wono mogundho mar Nyasaye an gima sani an.”​—1 Kor. 15:9, 10.

Kuom mano, nenore ni Paulo ne wuoyo kuom yo ma Yesu nofwenyorenego apoya, kaka noloke e sama ne ok opar, kata noneno ni ne ok owinjore neno Yesu. Bed ni en wach mane ma Paulo ne nigo e paro, nomor gi wach ma notimoreneno. Wachno nokonye ng’eyo ma onge kiawa ni Yesu nosechier moa kuom jomotho. Samoro mano e momiyo nowuoyo e wi wachno nyading’eny ka noyalo ne jomamoko e wi chier mar Yesu.​—Tich 22:6-11; 26:13-18.