Korinth thawn khat 15:8-naah Paula chuan: “A tâwp berah chuan a hun lova piang ang, keima hnênah pawh a inlâr a,” tiin a sawi a. Tûn hma chuan, he thu hi Paula’n inlârnaa vân ropuinaa inthuam Isua a hmuhna, ama thiltawn ngei a sawina niin kan hrilhfiah ṭhîn a. Chu chu a hnu kum zabi tam taka thleng tûr thlarauva thawhlehna, a nih loh leh pianna chu a hun hmaa dawngtîr ang maiin a awm tihna a ni. Mahse, chiang lehzuala he Bible châng zir a nih hnu chuan, hrilhfiahna chu siamrem a ngai niin a lang.

He thu hi Paula’n a chunga inthlâk danglamna thleng chungchâng a sawina chu a ni ngei mai. Mahse, “a hun lova piang” a nih thu a sawi khân, eng a sawi tumna nge? Thil ni thei tam tak a awm a ni.

Vawi leh khatah a inthlâk danglam thut a, a tân thiltawn hrehawm tak a ni. A hun lova piang, a nih loh leh thla kim lova piangte chu, beisei loh hunah an piang tlângpui ṭhîn a. Saula (a hnua Paula tia hriat) chu Damaska khuaa Kristiante tiduhdah tûrin a kal a; ani chuan inlârnaa tholeh Isua hmuh chu a beisei lo. Paula inthlâk danglamna chu ama tân chauhva mak a ni lo, tihduhdah a tum Damaska khuaa awm Kristiante tân pawh a mak hle a. Chu bâkah, a thiltawn chu hrehawm tak a ni a, hun rei lo te chhûng khua a hmu thei lo hial a ni.—Tirh. 9:1-9, 17-19.

Ani chu “a hun dik lova” thlâk danglamin a awm. A tîra Grik thu mal “a hun lova piang,” tih hi “a hun dik lova piang,” tih pawha lehlin theih a ni a. Chutiang kawng chuan The Jerusalem Bible-ah chuan: “Tu ma beisei loh hunah ka piang a ni,” tia lehlin a ni. Paula inthlâk danglam hun lai chuan Isua chu vânah a lâwn leh tawh a. Châng tîr lama a mi sawite ang lo takin, Paula chuan tholeh Isua chu vâna a lâwn hmain a hmu hman ve lo. (1 Kor. 15:4-8) ‘A hun chu dik lo’ angin lang mah se, Isua chuan Paula hnênah beisei lo taka inlârin, amah hmuh theihna hun remchâng a pe a ni.

Inngaitlâwm taka ama chungchâng a sawina a ni. Bible lama mi thiam ṭhenkhat chuan, Paula ṭawngkam hman hian inphahhniamna lam a kâwk thei niin an sawi a. Chu chu Paula sawi tum a nih chuan, tirhkoh nia rawngbâwl theihna chanvo hlu a dawn chu a phu lohzia a hria tih a sawina a ni ngei ang. Dik tak chuan, heti hian a sawi zawm a ni: “Kei zawng tirhkoh zînga tê ber, Pathian kohhranho ka tihduhdah avânga tirhkohva vuah tlâk loh ka ni si a. Nimahsela, Pathian khawngaihna avângin ka nih nih ka ni ta,” tiin.—1 Kor. 15:9, 10.

Chuvângin, 1 Korinth 15:8-na thu hi Paula’n beisei lo taka a hnêna Isua inlârna, a hun lova a inthlâk danglamna, a nih loh leh chutiang thil tawng tûra a phu lohzia chungchâng a sawina a ni thei a. A enga pawh chu ni se, Paula chuan a thiltawn chu a ngaihlu hle tih erawh a chiang a ni. Isua chu thihna ata kaihthawh a ni tih pawh a hre chiang hle bawk. Chuvângin, Isua thawhlehna chungchâng mite hnêna a zirtîrnaa ama thiltawn ngei a sawi nawn fo pawh chu a mak lo ve!—Tirh. 22:6-11; 26:13-18.