Tojosʼin faʼaitʼa ya 1 Corintios 15:8, je Pablo i kitso: “Xi fetʼani ngatsʼi, tsʼatsenna nga an, joni jngo ʼndí xi tokinjetaon [xi kitsin chjiʼndé]”. Nga kʼoakitso Pablo kui kinchja̱ni nga jngo sén kisakole nga tsabe jokji jeya tíjna je Jesús. Kʼoatsakixoán tsakai nga joxi tongini kitsin, xi tsonile, nga tongini jaʼáyanile ya ngʼajmi, siento nó tongini nga kjesa ʼya xi faʼáyajinle ya ngʼajmi. Nga nʼio nda kichotʼayajin ijngokʼa versículo jebi, kuinga tsʼantjaiyani josʼin majinná tsakai.

I̱ versículo jebi, je Pablo kui nchja̱ni jokoan kʼianga chjotale Cristo koan. Tonga ánni kʼoakitsoni nga kʼoakoan joma jngo ʼndí xi tsin chjiʼndé. Si̱kʼaxki̱la kʼa anni nga kʼoakitsoni.

Toxijña chjotale Cristo koan kʼoa ñaki tokʼoakoanle. Kʼianga tsin chjiʼndé jngo ʼndílee toxijña kʼoama. Kʼianga tífi Saulo ya Damasco, xi Pablo tsakʼin nga koanskanni kui xá tífini nga tífitjenngike je chjotale Cristo xi ya tsʼe kʼoa tsínkui koyale nga jngo sén sa̱kóle nga skoe̱ Jesús kʼianga jejaʼáyanile. Kʼianga chjotale Cristo koan je Pablo, ali tsa tojejin xi tokʼoakoanle, kʼoati tokʼoakoanle je chjotale Cristo xi tífitjenngike tsakai ya Damasco. Xi ijngosani, nga tokʼoakoanle nga kui sén kisakole saʼnda koanxkaa jngo jao nichxin (Hech. 9:1-9, 17-19).

Tsínkui tíkoyale nga chjotale Cristo koa̱n. Kʼianga én griego je xi “tokinjetaon” sʼin faʼatoya kʼoati “nga tsín tsa kʼia tsin nga nichxinle” sʼin faʼatoya. Je Traducción Kadosh Israelita Mesiánica de estudio, isʼin síkʼatoya: “Likui kʼia nichxinle nga kitsian”. Kʼianga chjotale Cristo koan je Pablo, je Jesús tokʼoa jekini ya ngʼajmi. Je chjotale Cristo xi kisikʼaxki̱ Pablo nga tongini tsabe nga jejaʼáyanile Jesús nga kjesa fijin ya ngʼajmi, tonga je Pablo alikui tsabe (1 Cor. 15:4-8). Je Pablo kʼiaa tsabe Jesús kʼianga toxijña jngo sén kisakole, ninga “tsínkui tíkoyale” nga skoe̱ je Jesús.

Nangitokon koan nga kʼoakitso. Tojo tso kʼa chjota xi kui kotʼayason tʼatsʼe jebi, kʼoatso nga kui kinchja̱ni Pablo i̱ versículo jebi nga tsín jokoa̱nnile nga chjotale Cristo koa̱nni. Tsa kʼoalani, je Pablo kʼoajinsʼin kisikjaʼaitsjen nga tsín bakinle nga pastro koa̱n. I kitsosa: “An nía pastro xi ngisa nangi tíjnasale xikʼa pastro, nga tsín tsa bakinna nga kʼoaʼmina pastro, nga̱ kontra kile je naxinandále Niná. Tonga kao kjoandale Niná kʼoakjoan jo kjoan” (1 Cor. 15:9, 10).

Nga kʼoakitso Pablo kuijin kinchja̱ni nga tokʼoakoanle nga jngo sén kisakole nga tsabe Jesús, nga toxijña chjotale Cristo koan kʼoa tsakuije̱ nga kʼoasʼin kisikjaʼaitsjen nga tsín bakinle nga kui sén sa̱kóle. Tojosʼinni, nʼio chjíle jmeni xi koan, nga̱ kui xi tsakʼéjngo kon Pablo nga jejaʼáyanile Jesús. Kuinga me tongantsjai nga kui kisikʼaxki̱ni jmeni xi koan kʼianga kitsoyale xi kjaʼaí nga jaʼáyanile Jesús (Hech. 22:6-11; 26:13-18).