Ipan 1 Corintios 15:8, Pablo kiijtok: “Kema panotoya miak más tonali, monextik noka na. Elki keja axnitlakatki ipan nopa tonali tlen kuali”. Achtouia, tikijtouayayaj kema Pablo kiijkuilok ni tlajtoli, kiilnamikiyaya kema kiitak Jesús ipan iluikak. Kejuak kikajtoyaj sampa ma tlakati o ma moyolkui pampa pejki tlaneltoka maske nojua poliuiyaya miak xiuitl kema yaskia iluikak. Maske kiampa tijkuamachiliyayaj, tikitstokej se keski tlamantli tlen kinextia moneki tijpatlasej kej tikixtomaj.

Maske ipan ni texto Pablo kena kamanaltiyaya tlen panok kema pejki kineltoka Jesús, ¿tlake kinekiyaya kiijtos ika nopa tlajtoli: “Axnitlakatki ipan nopa tonali tlen kuali”? Uelis kiijtosneki se tlen ni tlamantli:

Nima pejki tlaneltoka uan kichijki ya uan sekinok ma mosentlachilikaj. Kema se siuatl kitlakatiltia ikone kema amo kinamiki, pano kema amo kichia. Kema Saulo, katli teipa kiixmatkej kej Pablo, yauiyaya Damasco pampa kinekiyaya kintlaijiyouiltis toikniuaj, kiitak Jesús kejuak ipan se temiktli maske amo kichiayaya kiitas. Pablo amo moiljuijtoya tlaj tlaneltokaskia yon toikniuaj tlen Damasco. Pablo tlauel mosentlachilik ika tlen kipanok, yeka ayokmo uelki tlachia se keski tonali (Hech. 9:1-9, 17-19).

Amo pejki tlaneltoka kema kinamikiyaya. Ipan Traducción Kadosh Israelita Mesiánica de estudio, nopa tlajtoli kitlajtolkuepa: “Nitlakatki kema amo kinamikiyaya”. Kema Pablo pejki tlaneltoka, Jesús ya tlakuepilijtoya iluikak. Pablo amo elki kej nopa sekinok apóstoles tlen kiijtok ipan versículos 4-7 pampa ya amo kiitak kema Jesús moyolkuik uan ayamo yauiyaya iluikak (1 Cor. 15:4-8). Maske Pablo amo kichiayaya kiitas Jesús, ya monextik iixpa maske ayokmo kinamikiyaya.

Kema kiijtok ni tlajtoli, kinextik amo moueyimatiyaya. Sekij ixtlamatinij kiijtouaj nopa tlajtoli tlen Pablo kitekiuik, nojkia kinextia se akajya amo kipia ipati. Tlaj Pablo nojkia kiampa kitekiuik, kinextik amo kinamikiyaya elis apóstol, yeka nojkia kiijtok: “Na niitstok nopa tlen más pilsiltsi tlen nochi itlayolmelajkauaj uan axkinamiki para nechtokajtisej niitlayolmelajka toTeko keja kinnotsaj nopa sekinok, pampa nikintlaijiyouiltik tlen itstokej ipan iteopa toueyiTeko. Pero pampa ueyi iyolo noka na, toTeko nechmakak tekitl para nielis niitlayolmelajka” (1 Cor. 15:9, 10).

Uajka, uelis Pablo kinekiyaya kiijtos kenijkatsa Jesús monextik iixpa kema amo kichiayaya, kema nima pejki tlaneltoka o amo kinamikiyaya kiselis nopa tlateochiualistli. Maske amo tijmatij tlake kinekiyaya kiijtos, Pablo tlauel kipatiitak tlen kipanok pampa kiitak Jesús kena moyolkuitoya. Yeka, nochipa kinpouiliyaya sekinok tlen kiitstoya kema kinkamanaljuiyaya tlen Jesús (Hech. 22:6-11; 26:13-18).