Itech 1 Corintios 15:8, Pablo okijto: ‘Onechmonextili, kemi se konetl non [...] [ayamo oajsiaya] tonati para tlakatiskia’. Non okijto Pablo porque okitak Jesús okatka iluikak. Otikajsikamatiayaj non yetoskia ken Pablo okiyolitijkej ompa iluikak maski ayamo omonekiaya porque miak xiuitl satepan kinyolitiskiaj tlapejpenalmej ompa iluikak. Satepan okachi otimomachtijkej non versículo uan otikitakej moneki tikpatlaskej ken tikajsikamati.

Itech non versículo Pablo okijto tlen opanok ijkuak okipatlak inemilis. Pero, ¿tlen kijtosneki ijkuak okijto ayamo oajsiaya ‘tonati para tlakatiskia’? Xamo miak tlamantli kijtosneki.

San niman okipatlak inemilis. Ualeua se konetsintli nesi maski ayamo ajsi tonal ijkuak moneki nesis, ijkon panotikisa uan amo kichiaj. Saulo tlen satepan okixmatkej ken Pablo, ijkuak oyaya Damasco para kintlajyouiltis tokniuan tlen ompa ochantiayaj, amo omokuayejyekouaya kitaskia Jesús. Pablo san niman okipatlak inemilis, xamo hasta ye omotlajtlachialti uan noijki okintlajtlachialti tokniuan akinmej ochantiayaj Damasco porque yejuan okimatiayaj kintlajyouiltiskia. Tlen okipanok Pablo sapanoua okitlajtlachialti uan hasta seki tonal amo ueli otlachixki (Hech. 9:1-9, 17-19).

Maski ayamo omonekiaya, okipatlak inemilis. Tlajtoli tlen motlajtolkopa ika griego, ayamo oajsiaya ‘tonati para tlakatiskia’ noijki motlajtolkopa ken: “Ayamo okinamikiaya tlakatis”. Traducción Kadosh Israelita Mesiánica de estudios kitlajtolkopa ken: “Oneski ijkuak ayamo omonekiaya”. Pablo okipatlak inemilis ijkuak Jesús yokatka iluikak. Itech seki versículos achto, ye okijto intoka akinmej okitakej Jesús ijkuak yaskia iluikak, pero ye ayamo okitaya (1 Cor. 15:4-8). Jesús okimonextili Pablo, maski “ayamo omonekiaya”.

Tlen okijto okiteititi ye amo omoueyinekiaya. Sekimej ixtlamatkej kijtoua ijkon okijto Pablo porque omokuayejyekouaya amo okinamikiaya yetos apóstol, ik non, okijto: “Amo nechnamiki manechnotsakah nitlatematilti, porke yowejka onikintlaijyowiltijtínenki akimeh okineltokayah Cristo. Pero ken Dios onechtlasojtlak axa ni itlatematilti” (1 Cor. 15:9, 10).

Xamo Pablo ijkon okijto porque amo okimatiaya kox kimonextiliskia Jesús, uelis noijki omokuayejyekouaya amo okinamikiaya kitas. Pablo sapanoua okipatioitak porque okimatki toTajtsin Dios okiyoliti Jesús. Ik non, ijkuak okintlapouiayaj oksekimej, okinmiluiaya tlen okipanok uan ken toTajtsin Dios okiyoliti Jesús (Hech. 22:6-11; 26:13-18).