Kaya mbeti ti 1 Kɔrinto 15:8, Polo pa ya: “Na pɛ la zu, lo fa nga tɛrɛ lo na mbi mɛ mbi du nga ma nyi mɛ apia adú lo uzu ti ngoi tɛ lo lengbingɔ.” Ndó gã ko, e ndo kambisandó ya, Polo ndo tɛnɛ tɛnɛ ti ye mɛndó lo nvɛ̃ni lo tengbi nani na na ngoi mɛndó lo hũ Yezo ka ndozu na lége ti visiɔ̃. Nga ma se mɛndó e ndo kambisa na ni, alindó mabere ya, lo piandó lo lua nzɔ̃ tangɔ ligɛrɛ ti nɛngɔ ya, adũ lo bere lo lua songɔ kwá na tɛrɛ ti nyingɔ asiɛklɛ gba uzu ti nɛngɔ ya, songɔ kwá ti ngaso abanda. Kanda na pɛ mandangɔ na seni vɛrse mɛ ko, ayɔ ya, e gbinyangbi se mɛndó e ndo kambisa na tɛnɛ ni.

Adu biani ya, Polo ndo tɛnɛndó tɛnɛ ti ye mɛndó ali tɛrɛ lo uzu ti nɛngɔ ya, lo ti wakristo. Kanda lo yendó tɛnɛngɔ ya nɛ na ngoi mɛndó lo pa, mbi “nga ma nyi mɛ apia adũ lo uzu ti ngoi tɛ lo lengbingɔ” nɛ? Ni na lo ti aye gba.

Lo tindó wakristo bo na pɛ ngoi yakere nga na ndenge ti kpɛ̃nɛ. Ngoi gba nyingambi mɛ ndo dũ lo uzu ti ngoi tɛ lo lengbingɔ ko, lo ndo si bo mbalakaka. Na ngoi mɛndó Saulu (mɛ na gesi ahɛ̃lo ila ti Polo) ndo gwendó ka Damasi so hɛ̃ngɔ awakristo pɛnɔ ko, lo hũndó na lége ti visiɔ̃ Yezo Kristo mɛ aso kaya kwá, ye kɔi mɛndó asi na lo bo mbalakaka. Se mɛndó Polo ti wakristo ma mbalakaka ko, ta akamwisa bondó lo kɔi ma, ni kamwisa ngando awakrsito mɛndó lo ndo hɛ̃ la pɛnɔ. Aye mɛndó lo hũ adundó ti kpɛ̃nɛ nvɛ̃ni, ni la, ta lo di dɛndó lo hũ ndo na pɛ ngoi ma.​—Aw 9:1-9, 17-19.

Lo tindó wakrsito na ya “siɔ ngoi.” Tɛnɛ ti grɛkɛ mɛ agbinyangbi na ‘zo mɛ apia adũ lo uzu ti ngoi tɛ lo lengbingɔ’ ko, alengbi nga ti gbinyangbingɔ ya, ‘zo mɛ adũ lo na ya siɔ ngoi.’ Ngbangɔ kɔi ti anglais (The Jerusalem Bible) agbinyangbi tɛnɛ ni ngaso: “Ni li mabere ya, adũ mbi na ngoi mɛndó ta azi ndo kũ ni ma.” Na ngoi mɛndó Polo ti wakristo ko, Yézo dirindó ka ndozu wɛ. Ɔngbingɔ na azi mɛ lo tɛnɛ tɛnɛ tɛ la so ya vɛrse mɛ ko, ta Polo hũndó Yezo na ngoi mɛndó lo so kaya kwá uzu ti lo gwengɔ ndozu ma. (1 Kɔr. 15:4-8) Na ngoi mɛndó Yezo si gbɛ lo na mbalakaka ko, ni hɛ̃ndó Polo nzɔ̃ tangɔ ligɛrɛ ti hũngɔ lo na pɛ songɔ kwá tɛ lo, abɛse alindó mabere ya, ni si na ya “siɔ ngoi.”

Ta Polo ndo gindó ya, lɛ azi asa tɛrɛ lo ma. Na bangɔ dangɔ bɛ tɛ ambanga azi mɛ ndo ba kpale ti Ngbangɔ ko, tɛnɛ mɛ Polo salela ndo lo ndo fa, lo nvɛ̃ni ndo gulu tɛrɛ lo. Se adu ya, Polo ndó na dangɔ bɛ ti ngaso ko, afa ya, lo ndo hũndó ya, nzɔ̃ tangɔ ligɛre mɛndó lo lua ko, ta alengbi na lo ma. Kutu lo pandó ya: “Mbi ndo ndangba tɛ awa pangɔ kwa tɛ Yezo zu, ti biani ko, ta alengbi bɛ ti ilingɔ mbi ya, mbi wa pangɔ kwa tɛ Yezo ma, ta sanga ma, mbi hɛ̃ ndo pɛnɔ hɛ̃ azi ti Eklezia tɛ Nzapa. Kanda na lo ti nzɔ̃ bɛ mɛ Nzapa ali hɛ̃ mbi, la mbi ti zo nga ma se mɛ ĩ ndo hũ na mbi na olo.”​—1 Kɔr. 15:9, 10.

Ni la, ngoi mɛndɛ̃, Polo ndo tɛnɛndó tɛnɛ na ndo se mɛndó Yezo si gbɛlɛ lo na mbalakaka nga na ndenge ti kpɛ̃nɛ, bere se mɛndó lo ti wakristo na ngoi mɛ siɔni, bere lo ndo hundó ya, ta lo du zo mɛ lo lengbi ti hũngɔ viziɔ̃ ti ngaso ma. Abɛse adu ngasia ko, Polo ndo mundó kpale mɛndó lo tengbi na ni ya, adu ngbondoni. Ta kitɛ da ma, ni lindó ya, lo ye na bɛ lo kɔi ya, Yezo so ka popo tɛ azi mɛ akpili. Ta adu ye kamwangɔ ma na ndenge mɛndó lo ndo diri ndo tɛnɛ niko gba nvɛ̃ni na ngoi mɛndó lo ndo tɛnɛ tɛnɛ ti songɔ kwá tɛ Yezo hɛ̃ azi mɛndɛ̃.​—Aw 22:6-11; 26:13-18.