Momukanda 1 Ova Kolindu 15:8, Paulu wapopia okuti: “Mahi konyima ya aveho, tupu amonekela ame, nga una watyitwa tyihakolele.” Kohale ankho tupopia okuti, tyipondola hamwe Paulu ankho ukahi nokupopia emonekelo akalele nalio etyi amona Sesusi ukahi keulu. Ongatyina ankho atyitwa ine okututiliswa opo akakale keulu tyina nkhele omuvo oo wehenehikepo. Mahi pahe etyi tuelilongesa umwe nawa-nawa ovelesikulu ei, tuamona okuti hahe vali tupilulule etyi ankho tuihangununa.

Tyili Paulu ankho ukahi umwe nokupopia emonekelo akalele nalio etyi ankho ekahi nokuenda noko Ndamasiku. Mahi oityi mwene ankho ahanda okupopia etyi ati “natyitwa tyahakolele”? Matutale ovipuka vimwe.

Onkhalelo Paulu akala omukilisitau uhuvisa unene. Tyina omunthu amakala nolukembe momuvo ankho ahakevelela utumphuluka. Tupu etyi tyamonekele na Saulu (konyima pahe aihanwa okuti o Paulu) Puetyi ankho ekahi nokukamonesa ononkhumbi ovakilisitau mepundaumbo lyo Ndamasiku, tyemutumphulukisile. Paulu ankho kakevelela okuti mamono Sesusi watutiliswa. Onkhalelo Paulu akala omukilisitau katyemuhuvisile vala oe mwene mahi tupu tyahuvisile novakuatate ankho ahanda okukamonesa ononkhumbi. Otyipuka otyo tyamonekele na Paulu tyemuhuvisile umwe unene atee akala ononthiki mbumwe tyahamonopo. — Ovil. 9:1-9, 17-19.

Paulu wakala omukilisitau “momuvo ankho ahakevelela.” Ondaka yo Ngeleku yapitiyua okuti “watyitwa tyahakolele” tupu ipondola okupitiyua okuti “watyitwa momuvo ankho wahakevelelwa.” Ombimbiliya yo Selusalei ipopia okuti: “Ongatyina ame natyitwa momuvo ovanthu ankho vahakevelela-le.” Etyi Paulu akala omukilisitau Sesusi ankho wakondoka-le keulu. Mahi pahe vana apopia kono velesikulu mbo konyima, vakala ovakilisitau etyi Sesusi eheneende keulu. (1 Kol. 15:4-8) Sesusi wamonekela Paulu etyi ankho eliale keulu, otyipuka otyo tyamoneka “momuvo ankho wahakevelelwa.”

Ankho ukahi nokulipopia monkhalelo yapopila pokati. Vamwe vokuatanga unene vapopia okuti, onondaka Paulu apopia apa ongatyina ankho ekahi nokulipopia. Inkha otyo, opo Paulu ankho ukahi nokupopia okuti katelemo okukala omu Apositolu. Iya atee umwe, wapopia okuti: “Mokonda ame ndyikhelo yono apositolu, hatele-mo okuihanwa okuti o apositolu, mokonda namonesile ononkhumbi ewaneno lya Huku. Mahi mokonda yokankhenda okanene ka Huku, ame ndyi apositolu.” — 1 Kol. 15:9, 10.

Mokutala Movelesikulu ei Paulu ankho ukahi nokupopia ovipuka vitatu. Tyotete, okuamonekelwa na Sesusi monkhalelo ihuvisa. Tyavali, okuakala omukilisitau momuvo ankho ahakevela. Tyatatu, okuahatokalele okukala o Apositolu. Onthue katutyii nawa-nawa oityi Paulu ankho ahanda okupopia movelesikulu ei. Mahi etyi twii okuti ngwe wapandele unene otyipuka otyo tyemumonekelele mokonda tyemukuatesileko okukala nonthumbi yokuti tyili-tyili Sesusi watutiliswa umwe. Otyo apeho ankho tyina aivisa konthele ya Sesusi apopila otyipuka otyo tyamonekele nae. — Ovil. 22:6-11; 26:13-18.