Pa 1 Akolinto 15:8 mpostolo Paulo adalewa kuti: “Pakumalizira pace, adawonekerambo kwa inepano ninga tcece lomwe labadwa ntsiku zikanati kukwana.” Kale-kale, tikhakumbuka kuti pomwe mpostolo Paulo adalewa mafala yamweya iye akhathandauza mwayi wakuwona Jezu kudzulu. Ifepano tikhabva ninga kuti iye akhalewa bzakuti adapasidwa mwayi wakuti adzabadwe ayai kudzalamusidwa kuti akakhale na moyo kudzulu pomwe nthawe yakuti bzimwebzi bzicitike ikhanati kukwana. Tsono kupfunza bwino-bwino vesi limweri kwaticitisa kuti ticinje kabvesesedwe kathu.

N’cadidi kuti pa vesiri Paulo akhafotokoza bzomwe bzidacitika pomwe adatendeuka. Tsono n’ciyani comwe akhafuna kulewa pomwe iye adalewa kuti “[adabadwa] ntsiku zikanati kukwana”? Pana bzinthu bzizinji bzomwe pinango akhafuna kulewa. Mbatiwoneni bzinango mwa ibzo.

Kutendeuka kwace kudacitika mwakudzidzimusa na mwakudabwisa. Kubadwa kwa mwana omwe ntsiku zace zikanati kukwana kumbakhala kwakudzidzimusa. Mpsibodzi-bodzimbo na bzomwe bzidacitikira Saulo omwe adadzadziwika na dzina lakuti Paulo. Iye akhayenda ku Damasko kuti akazunze Akristau kumweko ndipo akhadikhirira lini kuwona Jezu omwe akhadalamusidwa m’masomphenya. Iye adatendeukiratu pa nthaweyi. Kutendeuka kwa Paulo kulibe kudabwisa iye yekha koma kudadabwisambo Akristau omwe iye akhayenda kukawazunza ku Damaskoko. Ndipo cinango n’cakuti, masomphenyayo yadamuzunguza. Iye adafa maso ndipo adamala ntsiku zitatu akuwona lini.  —  Mabasa 9:1-9, 17-19.

Iye adatendeuka pa “nthawe yakuphonyeka.” Mafala ya Cigerego yomwe yadasanduliziridwa kuti “tcece lomwe labadwa ntsiku zikanati kukwana” yangasanduliziridwembo kuti “tcece lakubadwa pa nthawe yakuphonyeka.” Bibliya linango lidasandulizira mafala yamweya tenepa: “Bzidakhala ninga kuti ndabadwa pa nthawe yomwe palibe omwe akhadikhirira.” Pomwe mpostolo Pauloyo adatendeuka Jezu akhadayenda kale kudzulu. Ndipo iye alibe kukhala na mwayi ninga wa wanthu omwe adawafotokoza m’mavesi ya m’mbuyo mwa vesi limweri, wa kuwona Jezu pomwe adalamusidwa. (1 Akolinto 15:4-8) Ndipopa kuwonekera kwa Jezu kwa mpostolo Paulo kudamupasa mwayi wa kuwona Jezuyo napo bzidawoneka ninga kuti ikhali “nthawe yakuphonyeka.”

Iye akhabzilewa yekha mwakubzicepesa. Adziwi winango wa Bibliya adalewa kuti mafala yomwe mpostolo Paulo adaphatisa basa pamwepa yakhalatiza kuti iye akhabzinyozera. Penu bziri tenepo, ndiye kuti iye akhazindikira kuti akhathemera lini kukhala na mwayi omwe adapasidwayo. Ndipopa iye adadzalewa pomwe kuti: “Inepano ndine mpostolo wakumalizira, ndipo ndikuthemera lini kucemeredwa mpostolo thangwe ndidazunza gwere la Mulungu. [Tsono] thangwe ra kudeka mtima kukulu kwa Mulungu, inepano ndine mpostolo.”  —  1 Akolinto 15:9, 10.

Tawona kuti pinango mpostolo Paulo akhalewa bza kuwonekera mwakudzidzimusa komwe Jezu adacita kwa iye, nthawe yakuphonyeka yomwe iye adatendeuka, ayai pinango akhafotokoza kuti akhathemera lini kuwona masomphenya yale. Napo kuti tikudziwa lini bwino-bwino bzomwe akhafuna kulewa, takwanisa kuwona kuti mpostolo Paulo adatenda kwene-kwene mwayi omwe adakhala nawo wa kuwona Jezu pomwe adalamusidwa kwa anyakufa. Bzimwebzi bzidamutsimikizirambo kuti Jezu akhadalamusidwadi kwa anyakufa. Ndipo iye akhambafotokoza bzimwebzi kwa wanthu wakusiyana-siyana omwe akhawapalizira.  —  Mabasa 22:6-11; 26:13-18.