Pɔɔlo hanle ye wɔ 1 Kɔlentema 15:8 kɛ: “Awieleɛ ne, ɔyele ɔ nwo ɔhilele medame noko mɔɔ mele kɛ awie mɔɔ ye mekɛ andwu na bɛawo ye la.” Dɛba ne, yɛhilehilele nuhua kɛ bie a ɛnee Pɔɔlo ɛlɛka mɔɔ ɔdaye mumua ne ɔnwunle ye wɔ mekɛ mɔɔ ɔnwunle Gyisɛse mɔɔ bɛwulale ye anyunlunyia wɔ anwuma la anwo ɛnyelɛzodeɛnwunlɛ la. Ɛnee ɔle kɛ asɛɛ bɛli ye eni na bɛwo ye anzɛɛ bɛdwazo ye wɔ sunsum nu kolaa na mekɛ mɔɔ bɛbava bɛadwazo menli wɔ sunsum nu la adwu. Noko ngyɛnu ɛhye mɔɔ yɛzuzu nwolɛ bieko la ɛmaa yɛnwu kɛ ɔhyia kɛ yɛkakyi ndelebɛbo mɔɔ yɛlɛ wɔ ngyɛnu ɛhye anwo la.

Nɔhalɛ nu, wɔ ɛke ɛnee Pɔɔlo ɛlɛka mɔɔ zile wɔ mekɛ mɔɔ ɔhakyile ɔrayɛle Kilisienenli la anwo edwɛkɛ. Noko mɔɔ ɔhanle kɛ ye “mekɛ andwu na bɛawo ye la,” ɛnee duzu a ɔlɛkile a? Ɔbahola yeahile ninyɛne ngakyile.

Ye ɛhakyilɛ ne yɛle arɛlevilɛ nu yɛɛ ɛnee ɔyɛ nwanwane. Saa awie mekɛ andwu na bɛwo ye a, ɔta ɔyɛ nwanwane. Mekɛ mɔɔ Sɔɔlo (mɔɔ nzinlii bɛravɛlɛle ye Pɔɔlo) ɛlɛkɔ Damasekɛse kɛ ɔkayɛ Kilisienema ne kpɔdekpɔde la, ɛnee ɔ nye ɛnla kɛ ɔbanwu Gyisɛse mɔɔ bɛdwazo ye la wɔ ɛnyelɛzodeɛnwunlɛ nu. Pɔɔlo ɛhakyilɛ ne yɛle ɔdaye mumua ne nee Kilisienema ne mɔɔ ɛnee ɔlɛkɔ yeayɛ bɛ kpɔdekpɔde wɔ zɔhane suakpole ne azo la noko nwanwane. Eza Pɔɔlo ɛhakyilɛ ne maanle ɔ nye zinli wɔ mekɛ ekyii anu na ɛnee ɔyɛ nwanwane.​—Gyi. 9:1-9, 17-19.

Yeangakyi wɔ “ye mekɛ kpalɛ nu.” Eza bɛkola bɛkile Giliki edwɛkɛkpɔkɛ, “awie mɔɔ ye mekɛ andwu na bɛawo ye la” abo kɛ “awie mɔɔ bɛanwo ye wɔ ye mekɛ kpalɛ nu.” The Jerusalem Bible ne hanle kɛ: “Ɔle kɛ asɛɛ bɛwole me wɔ mekɛ mɔɔ ɛnee awie biala anye ɛnla la.” Mɔɔ Pɔɔlo kahakyi ayɛ Kilisienenli la, ɛnee Gyisɛse ɛzia ɛhɔ anwuma dɛbabɛda. Menli mɔɔ Pɔɔlo hanle bɛ nwo edwɛkɛ wɔ ngyehyɛnu mɔɔ limoa anu la nwunle Gyisɛse kolaa na yeazia yeahɔ anwuma, noko Pɔɔlo ɛdeɛ yeannwu ye. (1 Kɔl. 15:4-8) Mɔɔ Gyisɛse yele ɔ nwo hilele Pɔɔlo wɔ mekɛ mɔɔ ɔ nye ɛnla la yɛɛ ɔnyianle zɔhane nwolɛ adenle ne a ɔnva nwo kɛ ɛnee ɔzɔho kɛ ɔnle “ye mekɛ kpalɛ nu” la.

Ɛnee ɔlɛda mɛlɛbɛnwoaze ali. Mbɔlɔba bie mɔ kile kɛ, edwɛkɛ mɔɔ Pɔɔlo vale lile gyima wɔ ɛke la kile kɛ ɛnee ɔlɛbɔ ɔ nwo aholoba. Saa ɛnee ɛhye a wɔ Pɔɔlo adwenle nu a, ɔkile kɛ ɛnee ɔlɛkile kɛ ɔnfɛta nwolɛ adenle ne mɔɔ bɛvale bɛmaanle ye la. Ɔhanle ɔzɔle zolɛ bɔbɔ kɛ: “Medame a mele ekyi kpalɛ wɔ ɛzoanvolɛma ne anu a, na menfɛta kɛ bɛkɛvɛlɛ me ɛzoanvolɛ ɔluakɛ menyɛle Nyamenle asafo ne kpɔdekpɔde. Noko ɔlua Nyamenle ɛlolɛ kpole ne azo mele kɛ mɔɔ mede la.”​—1 Kɔl. 15:9, 10.

Ɔti, ɔzɔho kɛ ɛnee Pɔɔlo ɛlɛka adenle mɔɔ yɛ nwanwane mɔɔ ɛnee ɔ nye ɛnla mɔɔ Gyisɛse luale zo yele ɔ nwo hilele ye, ye ɛhakyile ne mɔɔ anzi wɔ ye mekɛ kpalɛ nu anzɛɛ yekile ɛhye mɔɔ yɛ nwanwane mɔɔ ɔnwunle ye ɔnva nwo kɛ ɛnee ɔnfɛta wɔ sunsum nu la anwo edwɛkɛ. Kɛzi ɔde biala la, ɔda ali wienyi kɛ ɛnee anwubielɛ ɛhye sonle bolɛ maa Pɔɔlo. Ɔmaanle ɔliele ɔlile bɔkɔɔ kɛ bɛdwazo Gyisɛse. Ɔti ɔnyɛ nwanwane kɛ ɔlɛka Gyisɛse ewudwazo ne anwo edwɛkɛ yeahile awie mɔ a ɔka anwubielɛ ɛhye anwo edwɛkɛ la.​—Gyi. 22:6-11; 26:13-18.