Lele oborẹ ọ ha 1 Corinthians 15:8, Paul ọrhọ ta: “Ọrọkẹta ephian, nọ ji homaphia mẹ jerẹ ohworho rẹ ẹdẹ uvwiẹ ye ọ vwọ gba.” Ọke bi, e djerie taghene ẹmro i Paul na o mevirhọ oborẹ ọye o rhiẹromẹrẹn ọke rọ mẹrẹn emena arudo kpahen Jesu uvuẹn odidi obẹ odjuwu. Nọ họhọre taghene o vwo uphẹn re vwiẹ ye, yanghene rọ rhọmọnuhwu no rhiẹ ohworho ẹhẹn, ọrẹn ọke re verhọ na o ji te-e, nọyẹ ẹgbukpe buebun ina nyavrẹn vwẹre bọmọke aruẹ ẹrhọmọnuhwu ọrana ọnọ ki homaphia. Ọrẹn, ọke re yono riarorhọ kpahen oghwẹmro ọnana, no fori ne ruẹ ewene kpahen oborẹ e vwẹruọ ye bi.

Itiọrurhomẹmro, Paul ọ tẹmro kpahen oborẹ ọ phiare ọke rọ ghwẹriẹ. Ọrẹn, me ọye o mevirhọ ọke ro ta taghene ‘ẹdẹ uvwiẹ ye ọ gba-a’? O vwo iroro sansan.

Ẹghwẹriẹ ọnẹyen ọ havwọ kpregede ji vwo omiamiamo. Uvwiẹ evwan rọ vwọ ji gba ọ phia kpregede. Ọke i Saul (re rhe rhẹ Paul ọke oru) o riẹ Damascus ya kparehaso Ilele Kristi ri ha oboran, ọye o fiẹrorhọ taghene ọnọ mẹrẹn Jesu ra rhọmọren na-a. Ẹghwẹriẹ i Paul o gberie unu, o ji gbe Ilele Kristi ro guọlọ kparahasua uvuẹn amwa ọrana unu. Habaye, oborẹ o rhiẹromẹrẹn na, ọ miameriẹ omamọ te erhirhiẹ ikẹruiẹ e tu uvwre ọke.​—Acts 9:1-9, 17-19.

Ọ ghwẹriẹre uvuẹn “ọke re vwe fiẹrorhọ.” Ẹmro i Greek ra ha se ọrẹ “ẹdẹ uvwiẹ ye ọ vwọ gba,” ana ji sabu rhian ye rhẹ “ohworho re vwiẹre uvuẹn ọke ro vwo serhọ.” The Jerusalem Bible ọrhọ ta ye izede omana: “Nọ họhọre taghene e vwiẹre mẹ uvuẹn ọke ihworho i vwe roro rhọ.” Ọke i Paul ọ ghwẹriẹ, a rhọmọ i Jesu riẹ odjuwu ne. Ọrẹ ovẹnẹ rhẹ ihworho ri Paul ọ ta kpahen uvuẹn eghwẹmro ri vrẹnren e ki te ọnana, ọye ọ mẹrẹn i Jesu ra rhọmọren bọmọke o ki riẹ odjuwu-u. (1 Cor. 15:4-8) Omẹhaphia i Jesu ri Paul o vwo fiẹrorhọ, nọ yẹriẹ uphẹn ọrana rọ mẹrẹn i Jesu ra rhọmọren, dedevwo ọ họhọre taghene uvuẹn “ọke ro vwo serhọ.”

Ọye ọ ta kpahen omayen ọrẹ izede dẹndẹn. Lele oborẹ egba irherhe ezẹko i tare, ẹmro ri Paul ọ ha ruiruo arana, ọnọ sabu rhiẹ ẹmro re ni oma sakamu. Orhianẹ Paul o vwo ọrana rhẹ ẹhẹn, nọyẹ ọ ta taghene ọye o mwuovwan uphẹn re tiobọnu riẹn na-a. Itiọrurhomẹmro, Paul nọ tobọ ta: “Mẹmẹ yẹ ọnyikọ rọ mai kamu, omarana, mie mwuovwan re ne se mẹ ọnyikọ-ọ, fọkime mi kparehaso ukoko Osolobrugwẹ. Ọrẹn, nyoma ẹghẹlẹ ọphẹ Osolobrugwẹ yi me rhiẹ ohworho mi havwọ na.”​—1 Cor. 15:9, 10.

Omarana, ọ họhọre taghene Paul ọ ta kpahen izede kpregede ri Jesu ọ homaphia riẹn, ẹghwẹriẹ ọnẹyen rọ phiare kpregede, yanghene uphẹn ẹga ro vwori ro nirin taghene ọye o mwuovwan ye-en. Oborẹ erhirhiẹ na ọ havwọ ephian, Paul ọ dabu ni oborẹ o rhiẹromẹrẹn na ghanghanren. Nọ dabu yẹ ye imwẹro ọgbogbanhon taghene a ghini rhọmọ i Jesu nuhwu ne. Ọnana yọ soriẹ ọ rionbọrhọ oborẹ o rhiẹromẹrẹn ro vwo fiẹrorhọ ọgbọ buebun, ọke ro ghwoghwo rẹn awọrọ kpahen ẹrhọmọnuhwu i Jesu.​—Acts 22:6-11; 26:13-18.