1 Коринфӕгтӕмӕ 15:8 Павел уӕхӕн дзурдтӕ ниффинста: «Тӕккӕ фӕстаг ба мӕнмӕ фӕззиндтӕй, цума афонӕй раздӕр райгурдтӕн, уотӕ». Ами Павел дзурдта, Киристей уӕлӕрвти ке фӕууидта, уой туххӕй. Павели дзурдтӕ раздӕр куд лӕдӕрун кодтан? Уотӕ нӕмӕ кастӕй, цума Павел уӕхӕн кадӕй исхайгин ӕй, ӕма афонӕй раздӕр райгурдӕй кенӕ райгас ӕй уӕларвон цардмӕ, исӕрститӕ уӕлӕрвтӕмӕ игас кӕнун ку райдӕдтонцӕ, уомӕй дзӕвгарӕ раздӕр. Фал аци стих лӕмбунӕгдӕр ку рартастан, уӕд ӕй балӕдӕрдтан, ӕ гъуди ӕндӕрхузи ке ӕй.

Мадта уӕд Павели ци зӕгъун фӕндадтӕй, уотӕ ку загъта, «афонӕй раздӕр райгурдтӕн», зӕгъгӕ?

Павел киристон иссӕй ӕнӕнгъӕлти ӕма ин е рист дӕр ӕрхаста. Сувӕллон афонӕй раздӕр ку райгуруй, уӕд е ниййергутӕн ӕнӕнгъӕлти фӕууй. Ӕма Савл дӕр (фӕстӕдӕр ӕй хонун райдӕдтонцӕ Павел) Дамаскмӕ ку цудӕй киристӕнтти бафхуӕрунмӕ, уӕд ӕ сӕри къуми дӕр н’ адтӕй, цӕстӕбӕлуайӕни Киристей ке фӕууиндзӕй. Удта Павел киристон ке иссӕй, е айдагъ ӕхецӕн н’ адтӕй ӕнӕнгъӕлти, фал ма Дамаски бафхуӕрунмӕ ке гъавта, еци киристӕнттӕн дӕр. Уомӕй уӕлдай ма Павел Киристей ке фӕууидта, е ин, зӕгъӕн ес, ӕма рист дӕр ӕрхаста, уомӕн ӕма уой фӕсте нихъхъӕрӕу ӕй (Гъуд. 9:1–9, 17–19).

Павел киристон ӕ афонӕбӕл не ’ссӕй. Дзурдбаст «афонӕй раздӕр райгурдтӕн» ци грекъаг дзурдтӕй ратӕлмац кодтонцӕ, уой ма ӕнгъезуй уотӕ ратӕлмац кӕнун: «Ӕ афонӕбӕл нӕ райгурдтӕн». Аци гъуди «Йерусалимаг Библий» уотӕ финст ӕй: «Цума райгурдтӕн, уой ӕнгъӕл ку неке адтӕй, уӕд» (The Jerusalem Bible). Павел цӕстӕбӕлуайӕн фӕууидта, Йесо уӕлӕрвтӕмӕ ку раздахтӕй, уой фӕсте. 1 Коринфӕгтӕмӕ 15:4–7 Павел ке ранимадта, етӕ Киристей фӕууидтонцӕ, ку райгас ӕй, фал уӕлӕрвтӕмӕ ку нӕма раздахтӕй, уӕд. Фал ӕй Павел еци рӕстӕг нӕ фӕууидта. Еци фадуат ин фӕцӕй, Киристе имӕ ӕнӕнгъӕлти ку фӕззиндтӕй, уӕд, кӕд уотӕ зӕгъӕн адтӕй, ӕма еци хабар ӕ афонӕбӕл не ’рцудӕй, уӕддӕр (1 Кор. 15:8).

Павел ӕхе туххӕй бонзонгӕй фӕдздзоридӕ. Еуӕй-еу библиртасгути гъудимӕ гӕсгӕ Павел ци дзурдбастӕй испайда кодта, уомӕй, ӕвӕдзи, ӕ кадӕ дӕлӕмӕ кодта. Кӕд ӕцӕгӕйдӕр уотӕ ’й, уӕд е уобӕл дзорӕг ӕй, ӕма ’й лӕдӕрдтӕй, ци кадӕ имӕ ӕрхаудтӕй, уой аккаг ке нӕй. Ӕма фӕстӕдӕр ци дзурдтӕ загъта, етӕ дӕр уобӕл дзорӕг ӕнцӕ: «Ӕз апостолтӕй се ’гасемӕйдӕр дӕлдӕр дӕн ӕма, апостоли ном хӕссуни аккаг дӕр нӕ дӕн, уомӕн ӕма ӕз ӕфхуардтон Хуцауи ӕмбурд. Фал мӕбӕл аци ихӕс ес Хуцауи ’стур хуарзӕнхи фӕрци» (1 Кор. 15:9, 10).

Мадта Павели ци зӕгъун фӕндадтӕй? Ӕвӕдзи уой, ӕма Киристе ӕ рази ӕнӕнгъӕлти равзурдӕй кенӕ киристон ӕ афонӕбӕл ке не ’ссӕй, кенӕ ба ци дессаги цӕстӕбӕлуайӕн фӕууидта, уой аккаг ке н’ адтӕй. Павели цийфӕнди зӕгъун ма фӕндадтайдӕ, уӕддӕр бӕрӕг ӕй, ци хабар ибӕл ӕрцудӕй, уой ке нӕ иронх кодта ӕма ин устур аргъ ке кодта. Уой фӕсте ибӕл ӕппундӕр нӕбал гурусхӕ кодта, Киристе ӕцӕгӕйдӕр ке райгас ӕй. Ӕма иннетӕн Киристей райгасдзийнади туххӕй ку фӕдздзоридӕ, уӕд син аци хабари кой уомӕ гӕсгӕ ракӕнидӕ (Гъуд. 22:6–11; 26:13–18).