Oniay imbaga nen Pablo ya nabasad 1 Corinto 15:8: “Diad kaunoran, sikatoy nampanengneng met ed siak a singa ed sakey a niyanak a kulang na bulan.” Say tutukoyen dia nen Pablo et samay eksperiensya to ya anengneng toy Jesus ya walad tawen panamegley na pasingawey. Impaliwawa nensaman ed saray publikasyon tayo ya singa ibabaga nen Pablo ya sikatoy naikdan na pribilehyo ya asakbay ya niyanak o pinaoli bilang espiritu, ta diad panaon to et mabayag ni antis ya nagawa so kioli ed tawen. Pero diad impanaral nin maong ed sayan bersikulo, anengneng ya kaukolan tayon i-adjust so pakatalos tayo.

Say tutukoyen dia nen Pablo et say impakakomberte to bilang Kristiano. Pero antoy labay ton ibaga nen inkuan ton sikatoy “niyanak a kulang na bulan”? Walay pigaran posibilidad.

Makapabigla so impakakomberte to. No say sakey ya malukon et mananak ya premature o kulang na bulan, makapabigla itan. Nen manbiabiahe si Saulo (say ngaran nen Pablo nensaman) paonlad Damasco pian pairapen iray Kristiano, biglan anengneng toy Jesus panamegley na pasingawey. Diad sayan agawa, aliwan si Pablo labat so agmakapanisia ed impakakomberte to, ta abigla met iramay Kristiano ed Damasco ya plano ton pairapen. Talagan abigla si Pablo, diad tua, sikatoy taloy agew ya agmakanengneng.—Gawa 9:1-9, 17-19.

Sikatoy akomberte diad “oras ya ag ilaloan.” Diad lenguahen Griego, say salitan impatalos ya “niyanak a kulang na bulan” et nayari met ya ipatalos ya “niyanak ya agto ni panaon.” Oniay patalos na Maung a Balita Biblia: “[Singa ak] nianak ed oras ya ag ilaloan.” Wala lad tawen si Jesus nen akomberte si Pablo. Duma iyay eksperiensya nen Pablo no ikomparad saramay disipulo ya abitla ed inmuunan bersikulo, ta nampanengneng si Jesus ed sikara antis ya pinmawil ed tawen. (1 Cor. 15:4-8) Anengneng balet nen Pablo si Jesus diad “oras ya ag ilaloan.”

Singa to ibabaga ya agto kanepegan so pribilehyon inter ed sikato. Ibabaga na arum ya scholar ya base ed samay salitan inusar nen Pablo, singa to iyaabeba so sarili to. No bilang ta ontan, bibidbiren to ya agto kanepegan so magmaliw ya apostol. Diad tua, oniay nabasa ed ontutumbok iran bersikulo: “Siak so sankaabebaan ed saray apostol, tan agak manepeg a tawagen ya apostol, lapud pinasegsegang koy kongregasyon na Dios. Balet lapud agnaparaan a kaabigan na Dios et niiter ed siak iyan betang.”—1 Cor. 15:9, 10.

On, nayarin say tutukoyen nen Pablo et say makapabiglan impakanengneng tod si Jesus, say impakakomberte to diad ag-iilaloan ya panaon, odino say liknaan to ya agto kanepegan so makanengneng na onman ya pasingawey. Antokaman so tutukoyen to, mapatpatnag ya agton balot nalingwanan iman ya agawa. Aman so akakombinse ed sikato ya talagan inmoli si Jesus. Diad tua, lanang ton iistoryaen itan kada no ipupulong to so inkioli nen Jesus.—Gawa 22:6-11; 26:13-18.