Nan 1 Korint 15:8, Pohl koasoia: “Ahpw keieu mwuhr, e pil ketin pwarohng ie duwehte seri men me ipwidi mwohn ahnsou me e uhdahn pahn ipwidi.” Mahso, kitail kawehwehda me Pohl kin koasoakoasoia duwen ih ahnsou me e kilangada Sises nan kaudiahl ehu sang nanleng. E mwomwen me e alehdi pwais kaselel ehu en ipwidi, de iasada, ong mour nin duwen ngehn emen, sounpar epwiki kei mwohn soangen kaiasada wet eh wiawi. Ahpw mwurin atail onopki mwahu ire wet, e sansal me kitail anahne wekidala kawehwehn ire wet.

E mehlel me Pohl kin koasoakoasoia dahme wiawihong ih ahnsou me e wekila wiahla Kristian men. Ahpw ia wehwehn eh koasoia me e “ipwidi mwohn ahnsou me e uhdahn pahn ipwidi”? Kitail tehkpene ekei kahrepen eh koasoia met.

Eh wekilao uhdahn mwadang oh kapwuriamwei. Ipwidi en emen mwohn ahnsou me e uhdahn pahn ipwidi kin kalapw wia mehkot kapwuriamwei. Ni Sohl (me mwuhr adanekihla Pohl) eh kohkohlahng Damaskus pwehn kaloke Kristian kan wasao, e sohte kasik en kilangada kaudiahl en Sises me ketin iasadahr. En Pohl eh wekilao uhdahn kapwuriamwei kaidehn ong ih kelehpw ahpw pil ong Kristian kan me e pilahn en kohla kaloke nan kahnimwo. Patehng met, dahme wiawihong ih uhdahn kapwuriamwei me kahrehda e maskunla erein ahnsou kis.​—Wiewia 9:1-9, 17-19.

E wekila ni ‘kaidehn uhdahn ahnsawi.’ Lepin lokaiahn Krihs me kawehwehdi ong “ipwidi mwohn ahnsou me e uhdahn pahn ipwidi” pil kak wehwehki “ipwidi ni kaidehn uhdahn ahnsoun eh ipwidi.” Ehu Paipel (The Jerusalem Bible) kawehwehda ireo ni ahl wet: “E mwomwen me I ipwidi ni ahnsou me sohte emen kasik.” Ni ahnsou me Pohl wekila, Sises ketidalahr nanleng. Weksang irail kan me e koasoakoasoia nan iretikitik en mwowe ko, Pohl saikinte kilang Sises me ketin iasada mwohn eh ketidahla nanleng. (1 Kor. 15:4-8) Sises eh ketin pwarohng Pohl ni soh kasikpe kihong Pohl ahnsou mwahu en kilang Sises mwurin eh ketin iasada, mendahki ahnsowo mwomwen ‘kaidehn uhdahn ahnsawi.’

E koasoakoasoia duwen pein ih ni aktikitik. Ekei me saman kan koasoia me lepin lokaia kan me Pohl doadoahngki wasao kak mwomwen me e kauwe ih. Ma ih met me Pohl medemedewe, eri pein ih pohnese me e sohte warohng wiahla wahnpoaron men. Ni mehlel, e doula koasoia: “Ngehi me keieu tikitik nanpwungen wahnpoaron kan oh I sohte warohng adaneki wahnpoaron, pwehki ei kalokeier mwomwohdisohn Koht. Ahpw I kak wia doadoahk wet pwehki sapwellimen Koht kadek sapan.”​—1 Kor. 15:9, 10.

Eri, e mwomwen me Pohl kin koasoakoasoia duwen Sises eh ketin mwadangete pwarohng ih ni soh kasikpe, eh wekila ni ahnsou ehu me e sohte kasik, de duwen eh sohte warohng en kilang kaudiahl uhdahn kapwuriamwei ehu. Sohte lipilipil mehnia, dahme wiawio uhdahn kesempwal ong Pohl. E kadehdehda ni sansal me Sises ketin iasada sang mehla. Ihme kahrehda Pohl kin kalapw koasoia duwen ahnsou kapwuriamweio ni eh kin kalohkihong meteikan duwen iasadahn Sises.​—Wiewia 22:6-11; 26:13-18.