Paulu fala sin na 1 Koríntius 15:8: “Na fin di tudu i parsi pa mi tambi, mesmu ku N sedu suma algin ku padidu fora di tempu.” Na pasadu, no splikaba di kuma Paulu staba na fala di si propi spiriensia, oca ki tene un vison di Jesus na si gloria na seu. I sta suma si daduba privileẑiu di padidu o resusitadu pa vida spiritual antis di tempu, manga di anus antis kes tipu di resureison dibi di kontisi. Ma, dipus di studa mas es versikulu, i parsi kuma i pirsis muda splikason ku dadu pa es versikulu.

I bardadi di kuma, Paulu sta na fala di ke ku kontisi oca i konverti. Ma, ke ki mistiba fala oca i fala di kuma i “padidu fora di tempu”? I ten manga di splikasons.

Si konverson seduba di repenti i afetal ciu. Manga di bias, partu fora di tempu ta sedu di surpresa. Oca Saulu (ku mas tardi bin kunsidu pa Paulu) na baiba pa Damasku pa pirsigi kristons ku staba la, i ka speraba di kuma i na tene un vison di Jesus ku lantandaduba ja di mortu. Konverson di Paulu ka seduba surpresa so pa rel, ma tambi pa kristons ki staba na fasi planu pa pirsigi na ki sidadi. Alen des, es spiriensia afetalba ciu dimas. I pirdi si vison. — Atus 9:1-9, 17-19.

I konverti na “mau tempu.” Palabra di gregu antigu ku traduzidu pa “fora di tempu” pudi tambi traduzidu pa, “algin ku padidu na mau tempu.” Biblia di Jerusalen traduzil des manera: “I suma si N padidu na un tempu ku ningin ka spera.” Oca ku Paulu konverti, Jesus ribaba ja pa seu. Diferenti di kilis ku Paulu falaba del na versikulus ku sta tras, i ka oja Jesus oca i lantandadu antis di bai pa seu. (1 Kor 15:4-8) Jesus parsi di repenti pa Paulu, kila dal oportunidadi di ojal dipus ki resusitadu, mesmu si kontra i parsi kuma i na “mau tempu.”

I staba na fala di si kabesa di un manera umildi. Di akordu ku alguns piskisaduris, palabras ku Paulu usa li pudi parsi kuma i staba na kritika si kabesa. Si Paulu staba na pensa nes, i staba na rikuñisi di kuma i ka mersiba tene privileẑiu ki dadu. Na bardadi, i ciga di fala sin: “Ami N mas ka ten importansia di ki tudu apostolus, nin N ka mersi pa N comadu asin, pabia N pirsigi igreẑa di Deus. Ma fabur di Deus fasin kil ku N sedu.” — 1 Kor 15:9, 10.

Asin, i parsi kuma Paulu staba na fala di manera ku Jesus parsi pa rel di repenti, sin i spera, na mumentu ku ka speradu di si konverson, o i staba na fala kuma i ka mersiba tene kil tipu di vison garandi. Di un manera o di utru, es spiriensia teneba balur garandi pa Paulu. Sin duvida, es dalba prova di kuma Jesus lantandadu di mortu. I ka di dimira di oja di kuma, manga di bias ora ki na prega utrus aserka di resureison di Jesus, i ta papia des spiriensia ki ka spera. — At 22: 6-11; 26:13-18.