1 Corintios 15:8 nisqanpim Pablo nirqa: “Llapanmanta qipallatañam ñuqamanpas rikuriykuwarqa, ñuqaqa kani manaraqpas tiemponpi naceq wawa hinam”, nispa. Chayna nisqanwanmi Pabloqa rimachkarqa sueñoyninpi hina hanaq pachapi Jesus kachkaqta rikusqanmanta. Chaytam ñawpaqta nirqanchik manaraq tiempo chayamuchkaptin nacechkaq hina utaq hanaq pachapaq pipas manaraq kawsarichkaptin kawsarichisqa hina kasqanta. Ichaqa allinta qawapaykuptinchikqa manam chaynachu kasqa.

Pabloqa rimachkarqa Jesus rikuriykuptin paypa qatiqninña kasqanmantam. Ichaqa, ¿ima niytataq munachkarqa “ñuqaqa kani manaraqpas tiemponpi naceq wawa hinam” nispanqa? Yaqachusmi rimachkarqa kaykunamanta.

Qunqayllamanta Jesuspa qatiqnin rikurirusqanmanta. Qunqayllamantam wawaqa manaraq tiemponpi nacerunman. Saulomanpas utaq Pablomanpas Jesuspa qatiqninkunata presochananpaq Damasco llaqtaman richkaptinmi qunqayllamanta Jesusqa rikuriykurqa. Chaynatamá Pabloqa qunqayllamanta Jesuspa qatiqninña rikurirurqa. Damascopi Jesuspa qatiqninkunapaqpas Pabloqa qunqayllamantam Jesuspa qatiqninña rikurirurqa. Pabloman Jesuspa rikuriykusqanqa admirakuypaqchá karqa, chaychá ñawsayarurqaraq (Hech. 9:1-9, 17-19).

Llapallanmanta qipallataña Jesuspa qatiqnin kasqanmanta. Griego rimaypi “ñuqaqa kani manaraqpas tiemponpi naceq wawa hinam” nisqantaqa niqkutaqmi “tiemponmanta qipaman naceq” nispapas. Traducción Kadosh Israelita Mesiánica de estudio bibliapipas ninmi: “Mana tantiasqan tiempopim nacerurqani”, nispa. Pablo Jesusta qatikuyta qallaykuptinqa Jesusqa hanaq pachapiñam kachkarqa. Pabloqariki manam wakinkuna hinachu qawarqa Jesustaqa kawsariramuspan kay pachapiraq kachkaptinqa (1 Cor. 15:4-8). Jesus Pabloman qunqayllamanta rikurirusqanraykum Pabloqa llapallanmanta qipallataña iñikurqa.

Mana kaqpaq hina hapikusqanmanta. Yachaysapa runakunapa nisqanman hinaqa kikillansi mana kaqpaq hapikunman kasqa, chayna kaptinqa Pabloqa nichkarqa yaqa kaynatam: “Manam Jesuspa apostolnin kanaypaq hinachu kani”, nispa. Bibliapipas Pabloqa kikinmi nirqa: “Ñuqaqa lliw apostolkunamantapas menosmi kani, chaymantapas ñuqaqa manam ‘apostol’ nispa sutichasqa kanaypaq hinachu kallani Diospi iñiqkunata ñakarichisqayrayku. Ichaqa, mana kuyasqa kanaypaq hina kachkaptiypas Diosqa anchata kuyawasqanraykum kay ruwasqaytaqa ruwani”, nispa (1 Cor. 15:9, 10).

Chaynaqa, yaqachusmi Pabloqa rimachkarqa qunqayllamanta Jesus rikurirusqanmantam, llapallanmanta qipallataña Jesuspa qatiqnin kasqanmanta hinaspa mana kaqpaq hina hapikusqanmanta. Imaynaña kaptinpas chay pasasqanqa allinninpaqmi karqa. Yanaparqam Jesus kawsarirusqanmanta mana iskayrayananpaq. Chayraykuchá Diosmanta willakuspanqa Jesus kawsarirusqanmanta sapa kuti rimarqa (Hech. 22:6-11; 26:13-18).