Ka 1 Ba-le-Korinte 15:8 Pawulo a te: ‘Hi vugamu, a ti vonekisi ku mine, lweyi ingiki ni belekiwi na nkama wu nga si tlhasa.’ Mabuku yezru ma tlhamuxele leswaku swi tikomba ingi Pawulo a a vulavula hi loko a vone Yesu a ku phatimeni kwake ka le tilweni. A swi fana ni loko a pswaliwile kumbe ku pfuxiwa akuva a ya hanya matilweni na nkama wu nga si tlhasa wa kuva leswo swi yentxeka. Kambe ntsrhaku ka loko hi yi kambisise hahombe ndzrimana leyi, hi vone swi fanela kuva hi yampswisa matwisisela yezru.

Nakunene, Pawulo a a vulavula hi xivono lexi a viki na xone xa Yesu, nkama lowu a a ya Damaska. Kambe a a djula ku hlaya yini loko a ku a ‘belekiwe na nkama wu nga si tlhasa’? Vona leswi nga ha tlhamuxelaka swone.

Pawulo a ndzruluke Mukriste swa kola ni kola ni hi ndlela leyi hlamalisaka. Hakanyingi loko mhunu a pswaliwa na nkama wu nga si tlhasa swi yentxeka hi ndlela ya xitxhuketa kumbe na swi nga laviseliwanga. Hi leswi yentxekeliki Sawulo (lweyi hi ku famba ka nkama a vitaniwiki leswaku i Pawulo). Loko a ya Damaska akuva a ya xanisa vamakwezru, a a nga swi yimelanga ku vona xivono xa Yesu lweyi a pfuxiwiki. Ku va Pawulo a ndzruluke Mukriste a swi hlamalisanga yene ntsena kambe swi hlamalise ni Vakriste hinkwavu va le Damaska. Xivono lexi Pawulo a viki na xone xi ve xa kola ni kola xi tlhela xi txhavisa, nakone xi yentxe leswaku Pawulo a fa matihlo ku dzringana nkama wa kukazri.—Min 9:1-9, 17-19.

Pawulo a ndzruluke Mukriste hi nkama lowu a wu nga yimeliwanga. Zritu dzra xigriki ledzri ndzruluteliwiki dzri va “ku pswaliwa na nkama wu nga si tlhasa”, dzri nga ha tlhamuxela ku pswaliwa na swi nga yimeliwanga. A Biblia de Jerusalem dzri ndzrulutela hi ndlela leyi: “A swo fana ni loko ni belekiwe na swi nga yimeliwanga.” A nkama lowu Pawulo a ndzrulukiki Mukriste, Yesu kutani a a tlhantukele matilweni. Lava a vulavulaka ha vone ka tindzrimana ta le henhla va mu vonile Yesu na a pfuxiwile kambe a a nga si na tlhantukela matilweni. (1Ko 15:4-8) Kambe na swi nga yimeliwanga, Yesu a nyike ndjombo Pawulo ya ku va a mu vona na kutani a li matilweni, nambileswi a swi yentxa ingiki hi loko ‘a nkama a wu nga si tlhasa’.

Pawulo a a kombisa leswaku a a dzringanisela ka ndlela leyi a a tivona ha yone. Zritu ledzri Pawulo a dzri tizrisiki ka ndzrimana leyi dzri nga kombisa leswaku a a tidzrela. Loko lowo wu ve nkongometo wa Pawulo, a a kombisa leswaku a a titwa na a nga faneleki kuva mupostola. Nakone Pawulo a te: ‘Hikusa ndzri lwentsrongo ku vapostola, mfuzri a swi ndzri fanelanga ku nha ndzri txhuliwa muapostola, hikusa ndzra xanisi [bandla] dzra Xikwembu Nkulukumba. Kambe hi timpswalu ta Xikwembu Nkulukumba ndzri leswi ndzri nga swone.’ —1Ko 15:9, 10.

Kutani swi tikomba na Pawulo a a vulavula hi mintxhumu yizrazru. Wa ku sungula, ndlela leyi Yesu a humeleliki ha yone kwake hi ndlela ya ku hlamalisa. Wa wubidzri, ndlela leyi a ndzrulukiki Mukriste ha yone na swi nga yimeliwanga. Wa wuzrazru, kuva a vona na swi nga mu faneli kuva mupostola. A hi swi tivi ha hombe leswi Pawulo a a djula ku hlaya swone, kambe hi nga tiyiseka leswaku Pawulo a a xi nyika lisima xivono lexi a viki na xone, hikusa hi xone xi mu tiyisekisiki leswaku Yesu a a pfuxiwile ku feni. A swi hlamalisi leswi Pawulo a a vulavula hi xivono lexo loko a zrezrela van’wana hi ta ku pfuxiwa ka Yesu.—Min 22:6-11; 26:13-18.