Pa lemba ya 1 Akorinto 15:8 Paulu alonga: “Pakumalisa, iye aonekerambo kuna ine, wakuti ndine ninga mwana adabalwa ntsiku yace mbidzati kukwana.” Kale tikhafokotoza kuti Paulu akhalonga pinthu pidancitikira mu ndzidzi udaonekera Yezu kuna iye m’masomphenya. Pikhali ninga iye akhadapaswa mwai wakubalwa peno wakulamuswa muli akufa mwauzimu mbudzati kufika ndzidzi wa ntundu unoyu wakulamuswa muli akufa. Mbwenye pakumala kupfundza mwadidi pyaoneka kuti tisafunika kusasanyira njira ikhafokotoza ife vesi ineyi.

Ndimomwene kuti pa vesi ineyi Paulu akhalonga pinthu pidancitikira mu ndzidzi udacinja iye makhaliro ace. Mphapo mafala adalonga iye kuti akhali ninga “mwana adabalwa ntsiku yace mbidzati kukwana” asabvekanji? Pisaoneka kuti mafala anewa asabveka pinthu pinango.

Paulu acinja makhaliro ace mwakukhonda dikhira. Mwana anabalwa ntsiku yace mbidzati kukwana kazinji kene asabalwa mwakututumusa. Saulo, (wakuti mukupita kwa ndzidzi adzacemerwa Paulu) acita ulendo toera kuenda katcinga Akristu a ku Dhamasku. Mbwenye iye nee akhadikhira kuti mbadaona Yezu m’masomphenya. Paulu adzumatirwa kakamwe na njira idacinja iye makhaliro ace, pontho Akristu akhafuna iye kutcinga adzumatirwambo kakamwe. Kusiyapo pyenepi, pinthu pidancitikira pikhali pyakudzumatirisa kakamwe thangwi iye nee akwanisa kuona mu ndzidzi ungasi.—Mabasa 9:1-9, 17-19.

Iye acinja pa “ndzidzi wakukhonda thema.” Fala Yacigerego idathumburuzwa kuti ‘kubalwa ntsiku yace mbidzati kukwana’ inakwanisambo kuthumburuzwa ‘kubalwa pa ndzidzi wakukhonda thema.’ A Bíblia de Jerusalém isalonga tenepa: “Pikhali ninga ndabalwa pa ndzidzi wakuti nee munthu m’bodzi akhadikhira.” Ndzidzi udacinja Paulu makhaliro ace, Yezu akhadaenda kale kudzulu. Mwakusiyana na anthu adalonga Paulu m’mavesi akutoma, iye nee aona Yezu mbadzati kuenda kudzulu. (1 Akor. 15:4-8) Pidaonekera Yezu m’masomphenya kuna Paulu, iye akhafuna kumpasa mwai wa kumuona pakumala kulamuswa muli akufa, maseze pisaoneka ninga ukhali “ndzidzi wakukhonda thema.”

Paulu akhalonga mwakucepeseka thangwi ya iye. Mwakubverana na anyakufufudza anango, mafala adaphatisira Paulu pa vesi ineyi, asabveka kuti iye akhali wakucepeseka. Khala Paulu akhali na manyerezero anewa, iye akhadzindikira kuti nee athema kukhala na mwai udapaswa iye, wakutumikira ninga mpostolo. Na thangwi ineyi, iye alonga: “Ine ndine wang’ono kakamwe pakati pa apostolo, pontho nee ndathema kucemerwa mpostolo, thangwi ndikhatcinga mpingo wa Mulungu. Mbwenye thangwi ya kukoma ntima kukulu kwa Mulungu, ine ndine mpostolo.”—1 Akor. 15:9, 10.

Natenepa pisaoneka kuti Paulu akhalonga thangwi ya njira yakukhonda dikhira idaonekera Yezu kuna iye m’masomphenya, peno thangwi ya kucinja makhaliro ace mwandzidzidzi peno thangwi yakukhonda kukhala wakuthema kuona masomphenya anewa akudzumatirisa. Mwakukhonda tsalakana mathangwi adancitisa kulonga mafala anewa, masomphenya adaona Paulu akhali akufunika kakamwe kuna iye. Masomphenya anewa ampasa cinyindiro cakuti mwandimomwene Yezu alamuswa muli akufa. Na thangwi ineyi, mu ndzidzi ukhamwaza iye mphangwa thangwi ya kulamuswa kwa Yezu, kazinji kene iye akhalonga pinthu pidancitikira.—Mabasa 22:6-11; 26:13-18.