Paulosu bi taki a 1 Kolenti 15:8 taa: „Tee kaba fëën, hën a ko a mi tu. Biga mi da di lasiti wan u dee apösutu di si ën. Hën i si miseei ko a di wooko vau sö kuma wan mii de pai bifö ten fëën kisi.” Fosufosu u bi ta taki taa kandë Paulosu bi ta taki u di wojolimbo sunjan ka a bi si Jesosi a liba ala. A bi dë kuma Paulosu bi weki ko a libi baka kuma wan jeje höndöhöndö jaa a fesi ufö di ten dou ka sëmbë bi sa go libi a liba ala. Ma di u bi öndösuku di vers aki, hën u bi ko si taa a bi dë fanöudu fuu tooka di fasi fa u bi ta fusutëën.

A dë sö tuu taa Paulosu bi ta taki u di soni di bi miti ën di a bia libi. Ma andi a bi kë taki di a bi taki taa a bi dë kuma „wan mii de pai bifö ten fëën kisi”? Di soni aki sa kë taki sömëni soni.

Di bia di a bi bia libi bi pasa wan pasi vau sö, söseei an bi dë wan kösökösö soni. Sëmbë an ta dë ku di mëni taa de o pai wan mii ufö di juu fëën kisi. Di Saulosu (di u ko sabi bakaten kuma Paulosu) bi dë a pasi nango a Damasikusi u go du ku dee Keesitu sëmbë fu ala, nöö an bi dë ku di mëni taa a bi o si wan wojolimbo sunjan. A bi si Jesosi di Gadu bi weki ko a libi baka, a liba ala. Paulosu an bi dë ku di mëni taa a bi o bia libi, söseei dee Keesitu sëmbë dee a bi nango du ku de seei, an bi dë ku ën mëni tu. Boiti di dë, di soni di bi miti Paulosu an bi dë wan kösökösö soni dëën, u di wojo fëën bi dungu piii u wan kölö pisiten.​—Tjab. 9:1-9, 17-19.

An bi bia libi a di „soifi ten”. Di Giiki wöutu di de puu ko „wan mii de pai bifö ten fëën kisi” sa kë taki tu taa „wan mii di de an pai a di soifi ten”. Di Bëibel de kai The Jerusalem Bible ta taki ën sö: „A bi dë kuma de pai mi a wan juu di na wan sëmbë bi dë ku ën mëni.” Jesosi bi toona go a liba ala kaa di Paulosu bi bia libi. A dee vers a fesi, Paulosu bi taki u dee sëmbë dee bi si Jesosi ufö a toona go a liba ala. Ma hën an bi si ën (1 Kol. 15:4-8). Di wojolimbo sunjan di Paulosu bi si bi dëën di okasi faa si Jesosi di a bi weki ko a libi baka, hii fa a bi sa djei kuma di soni aki an pasa a di „soifi ten”.

Di fasi fa a bi ta taki fu hënseei bi ta lei taa an bi abi gaanfasi. So könima taki taa di soni di Paulosu bi taki aki, bi ta djei kuma a bi ta kuutu hënseei. Ee so a bi dë tuu, nöö kandë a bi ta si kuma an bi fiti u dë wan apösutu. Hënseei bi taki taa: „Fa mi dë aki mi dë di möön lagi wan a dee tjabukama u Masa Jesosi mindi. Ma bumbuu tjika u de kai mi wan tjabukama fëën seei, biga mi bi du hogi ku dee biibima u Gadu a fesi. Ma fu di Gadu abi gaan bunuhati, hën mbei i si mi ko dë di sëmbë di i si mi dë tide aki.”​—1 Kol. 15:9, 10.

Wë, a djei kuma Paulosu bi ta taki u di fasi fa Jesosi bi ko nëën vau sö, nasö di bia di a bi bia libi a wan ten di an bi mëni, nasö taa a bi ta fii kuma an bi fiti u si sö wan wojolimbo sunjan. Aluwasi unfa soni bi dë, Paulosu bi ta si di soni di bi miti ën aki, kuma wan gaan soni. Di soni aki bi lei ën gbelingbelin taa Gadu bi weki Jesosi ko a libi baka. Fëën mbei an ta bigi da u taa a bi lo’ u taki u di soni di bi miti ën, te a bi ta konda soni u di weki di Jesosi weki ko a libi baka da sëmbë.​—Tjab. 22:6-11; 26:13-18.