Hi ku ya hi 1 Vakorinto 15:8, Pawulo u te: “Eku heteleleni u humelele ni le ka mina, onge hiloko ku ri eka munhu loyi a velekiweke nkarhi wu nga si fika.” Khale a hi hlamusela leswaku swi vonaka onge Pawulo a a vulavula hi xivono lexi a xi voneke xa Yesu loko a ri etilweni. A swi fana ni loko a tswariwile kumbe a pfuxiwile leswaku a ta hanya etilweni nkarhi wakwe wu nga si fika naswona a swa ha ta teka malembe yo tala leswaku ku pfuxiwa ko tano ku endleka. Hambiswiritano, ndzavisiso lowu endliweke hi ndzimana leyi wu swi veka erivaleni leswaku nhlamuselo ya ndzimana leyi yi lava ku antswisiwa.

I ntiyiso leswaku laha Pawulo u vulavula hileswi endlekeke loko a hundzuka Mukreste. Kambe a a vula yini loko a ku u ‘velekiwe nkarhi wu nga si fika’? Ku ni swivangelo swo hlayanyana leswi kumbexana swi endleke a vula sweswo.

U hundzuke hi xitshuketa naswona hi ndlela yo vava. Loko n’wana a velekiwa nkarhi wu nga si fika, mikarhi yo tala swi va swi nga rindzeriwanga. Sawulo (loyi hi ku famba nkarhi a tiviweke tanihi Pawulo) u ye eDamaska leswaku a ya xanisa Vakreste va kwalaho naswona a a nga swi rindzelanga leswaku a nga kombiwa xivono xa Yesu la pfuxiweke. Ku hundzuka ka Pawulo ku hlamarise ni Vakreste lava a a hlele ku va xanisa emutini wolowo. Leswi humeleleke Pawulo a swi chavisa lerova a a nga ha voni swa xinkarhana.—Mit. 9:1-9, 17-19.

U hundzuke hi “nkarhi lowu hoxeke.” Rito ra Xigriki leri hundzuluxeriweke ri va “munhu loyi a velekiweke nkarhi wu nga si fika” ri nga tlhela ri vula “loyi a velekiweke hi nkarhi lowu hoxeke.” The Jerusalem Bible yi ri: “A swi fana niloko ndzi velekiwe swi nga languteriwanga.” Yesu se a a ri etilweni loko Pawulo a hundzuka. Pawulo a nga n’wi vonanga Yesu la pfuxiweke loko a tlhelela etilweni ku hambana ni lava a vulavuleke ha vona eka tindzimana leti hundzeke. (1 Kor. 15:4-8) Loko Yesu a humelela eka Pawulo a a nga swi rindzelanga, swi endle leswaku a kota ku n’wi vona hambileswi a swi vonaka onge a ku ri hi “nkarhi lowu hoxeke.”

A a vulavula hi yena n’wini hi ndlela yo titsongahata. Hi ku ya hi swidyondzeki swin’wana, xiga lexi Pawulo a xi tirhiseke laha xi nga ha kombisa ku titekela hansi. Loko swi ri tano, Pawulo a a kombisa leswaku nkateko lowu a nyikiweke wona a wu nga n’wi faneli. U te: “Hi mina lontsongo eka vaapostola naswona a swi ndzi faneli ku vuriwa muapostola, hikuva ndzi xanise vandlha ra Xikwembu. Kambe ndzi leswi ndzi nga swona hikwalaho ka musa lowukulu wa Xikwembu.”—1 Kor. 15:9, 10.

Hikwalaho, swi vonaka onge Pawulo a a vulavula hileswi Yesu a humeleleke eka yena a nga swi langutelanga, ku hundzuka kakwe hi xitshuketa kumbe hileswi a veke ni nkateko wo kombiwa xivono xo hlamarisa swi nga n’wi faneli. Swi nga ri na mhaka xivangelo xa kona, swi le rivaleni leswaku Pawulo a a swi tlangela sweswo. A a nga kanakani nikatsongo leswaku Yesu u pfuxiwile eku feni. A swi hlamarisi leswi mikarhi yo tala a a vulavula hi xiendlakalo lexi loko a chumayela van’wana hi ku pfuxiwa ka Yesu.—Mit. 22:6-11; 26:13-18.