Ka 1 Vakorinto 15:8, Pawulo a vule leswi: “Hi wugamu a humelele ni le ka mina, mina ni fanaka ni n’wana lweyi a nga psaliwa na nkama wu nge se fika.” Khale a hi twisisa swaku ka ndzimana leyi, Pawulo a vulavula hi leswi swi nga mu yentxekela nkama a nga vonisiwa Yesu na a phatima a li tilweni. A swi fana ni loko a nyikiwe lunghelo la ku psaliwa kumbe ku pfuxiwa swaku a ya hanya tilweni na nkama wu nga se fika. Kambe, loko hi yi djondze kahle ndzimana leyi, swi lave hi yampsisa matwisiselo lawa a hi li na wona.

I ntiyiso swaku ka ndzimana leyi, Pawulo a a vulavula hi leswi swi nga yentxeka nkama a nga txintxa. Kambe, a a lava ku vula yini loko a ku ‘a psaliwe na nkama wu nga se fika’? A hi voneni leswi marito lawa ma nga ha vulaka swona.

Ku txintxa ka Pawulo ku yentxeke swa kola na kola. Hi ntolovelo, loko xin’wanana xi psaliwa na nkama wu nga se fika, swi va na swi nga nyimeliwanga. Nkama Sawulo (lweyi a nga gama a vitaniwa Pawulo) a nga ya Damaxka swaku a ya hlupha Vakreste, a a nga swi nyimelanga ku vona xivono xa Yesu lweyi se a a pfuxiwe ku feni. Ku txintxa ka Pawulo ku mu hlamalisile yena, ku tlhela ku hlamalisa ni Vakreste lava a a yela ku ya va hlupha. Leswi nga yentxeka siku leliyani swi yentxe swaku Pawulo a fa matihlo swa nkamanyana. — Mint. 9:1-9, 17-19.

Pawulo a txintxe “na swi nga nyimeliwanga.” Rito la Xiheberu leli nga hundzuluxeliwa li va “ku psaliwa na nkama wu nga se fika”, li nga ha tlhela li vula “ku psaliwa na swi nga nyimeliwanga”. Bibele la Jerusalema li veka mhaka leyi hi ndlela leyi: “A swi fana ni loko ni psaliwe na swi nga nyimeliwanga.” Nkama lowu Pawulo a nga txintxa hi wona, Yesu se a a file a tlhela a ya matilweni. Ku hambana ni lava mupostolo Pawulo a nga vulavula hi vona ka tindzimana 5-7, yena a nga mu vonanga Yesu nkama na wa ha li lani misaveni. (1 Kor. 15:4-8) Pawulo a ve ni lunghelo la ku vona Yesu hambileswi “a a nga swi nyimelanga.”

Pawulo a a vulavula hi ndlela ya ku tiveka hansi. Vadjondzi van’wana va vula swaku kuva Pawulo a veke marito hi ndlela leyi, swi kombisa swaku a a tivona na a nga faneleki. Loko ku li swaku leswo i ntiyiso, Pawulo a a titwa na li nga mu faneli lunghelo leli a nga nyikiwa lona la ku va mupostolo. Leswo swa twala hikusa a game a ku: “Hi mina wa mutsongo ka vapostolo naswona a swi ni faneli ku vitaniwa mupostolo, hikusa ni hluphe bandla la Xikwembu. Kambe hi mhaka ya timpsalu ta tikulu ta Xikwembu, ni leswi ni nga swona.” — 1 Kor. 15:9, 10.

Swi nga ha yentxeka Pawulo a vule marito lawa hi mhaka ndlela ya ku hlamalisa leyi Yesu a nga humelela ka yena. Kumbe hi mhaka ku txintxa ka yena loku nga yentxeka swa kola na kola, kumbe hi mhaka leswi a nga tivona swi nga mu faneli ku kombiwa xivono lexiyani. Ku nga na mhaka swaku i yini leswi nga mu yentxa a vula marito lawa, leswi nga yentxeka siku leliyani, swi mu khumbile. Swi mu yentxe a kholwa swaku Yesu a pfuxiwile ka lava nga fa. A swi hlamalisi leswi a a swi rhandza hintamu ku chumayela hi ta ku pfuxiwa ka Yesu. — Mint. 22:6-11; 26:13-18.