Mwakuyana na 1 Ŵakorinte 15:8, Paulosi wakati: “Paumaliro wakawonekeraso kwa ine nga bonda uyo wababika muteta.” Kumasinda, tikalongosoranga kuti pa vesi ili Paulosi wakayowoyanga ivyo vikamuchitikira apo wakawona mboniwoni ya Yesu mu uchindami kuchanya. Vikaŵa nga wapika mwaŵi wakubabika panji kuwuskikira ku umoyo wauzimu pambere nyengo ya chiwuka chanthena ichi yindakwane, icho kukaŵa kuti kwakhala vyaka vinandi kuti chichitike. Ndipouli, pamanyuma pakuti talisandaso makora vesi ili tawona kuti ntchakwenelera kulilongosoraso makora.

Mbunenesko kuti apa Paulosi wakayowoyanga ivyo vikachitika pakusintha kwake. Kweni kasi wakang’anamurangachi apo wakayowoya kuti wali nga ni “bonda uyo wababika muteta”? Pali vinandi ivyo wakang’anamuranga.

Wakasintha mwaluŵiro kweniso mwakuzizwiska. Kanandi vikuzizika para mwana wababika muteta. Apo Saulosi (uyo pamanyuma wakazgoka Paulosi) wakalutanga ku Damaseko kukatambuzga Ŵakhristu, wakakhazganga yayi kuti wangawona mboniwoni ya Yesu uyo wakawuskika. Kusintha kwa Paulosi kukamuzizika iyo pera yayi, kweni kukazizikaso Ŵakhristu awo wakakhumbanga kukaŵatambuzga mu msumba wura. Kweniso ivyo vikachitika apa vikaŵa vyakuzizika chifukwa kwanyengo yichoko waka Paulosi wakaleka kulaŵiska.—Mil. 9:1-9, 17-19.

Wakasintha “panyengo yake yayi.” Lizgu la Chigiriki lakung’anamurika kuti “bonda uyo wababika muteta” lingang’anamuraso “bonda uyo wababika panyengo yake yayi.” Baibolo la Jerusalem likuyowoya kuti: “Vikaŵa nga kuti nkhababika panyengo iyo waliyose wakakhazganga yayi.” Apo Paulosi wakasinthanga, Yesu wakaŵa kuti wawelera kale kuchanya. Mwakupambana na ŵanthu awo Paulosi wakaŵazunura mu mavesi ghakumasinda, iyo wakamuwona yayi Yesu wati wawuskika pambere wandakwelere kuchanya. (1 Kor. 15:4-8) Umo Yesu wakawonekera kwa Paulosi mwamabuchi, vikamupa mwaŵi Paulosi kuti wamuwone nangauli vikawoneka nga kuti “pakaŵa panyengo yake yayi,” panji kuti panyengo yakwenelera yayi.

Wakayowoyanga za iyo mweneko, kweni mwakujiyuyura. Ŵanthu ŵanyake ŵakusambira chomene ŵakuyowoya kuti mazgu agho Paulosi wakayowoya apa ghakaŵa ghakunyoza. Para ndivyo Paulosi wakang’anamuranga, ndikuti wakayowoyanga kuti iyo ngwakwenelera yayi kuŵa mpositole. Nakuti iyo wakayowoya kuti: “Ndine muchoko chomene pa ŵapositole, ndipo nili wakwenelera yayi kuchemeka mpositole, chifukwa nkhatambuzganga mpingo wa Chiuta. Kweni sono nili nthena chifukwa cha lusungu lukuru lwa Chiuta.”—1 Kor. 15:9, 10.

Ntheura vikuwoneka kuti Paulosi wakayowoyanga zakuwonekera kwamabuchi kweniso kwakuzizika uko Yesu wakawonekera kwa iyo, kusintha kwake uko wakakhazganga yayi. Panji wakayowoyanga vyakuti wakaŵa wambura kuzirwa kuti wamuvumbulire vinthu vyakuzizika ivi. Mulimose umo vingaŵira, ivyo vikachitika apa vikaŵa vyakuzirwa chomene kwa Paulosi. Vikamupa ukaboni wakukwana wakuti Yesu wakawuskika nadi ku ŵakufwa. Lekani kanandi apo wakapharazgiranga ŵanji za kuwuka kwa Yesu wakayowoyanga za chakuchitika ichi icho wakakhazganga yayi kuti chingamuchitikira.—Mil. 22:6-11; 26:13-18.