Te na ô ra Paulo i roto i te Korinetia 1, 15:8: “I te hopea roa râ, fa atoa maira oia ia ˈu mai te hoê aiû aita â i tia ˈtura te taime ia fanauhia mai.” Na mua ˈˈe, ua manaˈohia e o te tupuraa tera o Paulo a ite orama ˈi oia ia Iesu i roto i to ˈna hanahana i te raˈi. Mai te huru ra e o ˈna tei fanauhia aore ra tei faatiahia i te raˈi ei varua i te hoê taime aita â tera huru tia-faahou-raa i tupu. E titauhia râ ia faatano i te faataaraa o teie irava.

Te faahiti ra Paulo i tei tupu i to ˈna fariuraa i te Atua. Eaha râ te tumu o ˈna i parau ai “mai te hoê aiû [o ˈna] aita â i tia ˈtura te taime ia fanauhia mai”?

E tupuraa maere mau to ˈna fariuraa i te Atua. E nehenehe te hoê aiû e fanauhia i te taime aita â i tia ˈtura ia fanauhia o ˈna. Ua haere Saulo (o Paulo ïa i muri aˈe) i Damaseko no te hamani ino i te mau Kerisetiano. Aita râ o ˈna i manaˈo e e ite orama o ˈna ia Iesu tei faatiahia mai. I to Paulo fariuraa i te Atua, e tupuraa maere mau teie no ˈna e no te mau Kerisetiano ta ˈna i opua na e hamani ino. Hau atu, ua pohia to ˈna mata e toru mahana te maoro.​—Ohi. 9:1-9, 17-19.

Ua tupu te reira i “te hoê taime manaˈo-ore-hia.” E nehenehe te taˈo Heleni hurihia “te hoê aiû aita â i tia ˈtura te taime ia fanauhia mai” e huri-atoa-hia “te hoê aiû tei fanauhia i te hoê taime manaˈo-ore-hia.” Ia au i te huriraa La Bible de Jérusalem: “Mai te huru ra e ua fanauhia vau i te taime aita te taata i ite.” Tei te raˈi aˈena Iesu a fariu ai Paulo i te Atua. Aita ïa o ˈna i ite ia Iesu tei faatiahia mai hou o ˈna a hoˈi ai i te raˈi. (Kor. 1, 15:4-8) Ua fa mai râ Iesu ia Paulo i “te hoê taime manaˈo-ore-hia.”

Ua faahaehaa o ˈna ia ˈna. Ia au i te tahi mau aivanaa, e au ra e te haafaufaa ore ra Paulo ia ˈna a manaˈo atu ai e aita e tia ia ˈna ia fanaˈo i tera toroa. Inaha, ua parau o ˈna: “O vau hoi te aposetolo haihai roa ˈˈe, e eita e au ia parauhia vau e aposetolo, no te mea i hamani ino na vau i te amuiraa o te Atua. Tera râ, ua fanaˈo vau i teie toroa maoti te hamani maitai rahi o te Atua.”​—Kor. 1, 15:9, 10.

Peneiaˈe, te faataa ra Paulo i te tupuraa maere mau ta ˈna i ite a fa mai ai Iesu ia ˈna ra aore ra to ˈna fariuraa i te Atua i te hoê taime manaˈo-ore-hia aore ra to ˈna manaˈoraa e aita e tia ia ˈna ia fanaˈo i tera toroa. Noa ˈtu eaha te tumu, ua haafaufaa mau Paulo i teie tupuraa. Maoti te reira, ua papu ia ˈna e ua faatiahia Iesu mai te pohe mai e pinepine atoa o ˈna i te faahiti i te reira a faataa ˈi ia vetahi ê i te tia-faahou-raa o Iesu.​—Ohi. 22:6-11; 26:13-18.