1 Коринфичилерге 15:8-те Павел мынча дээн: «Адак соонда меңээ — элекке төрүттүнген барасканга дег — көзүлген». Мында ол дээрде алдар-аттыг Иисусту көргенин бижээн. Павелдиң сөстерин ооң мурнунда канчаар тайылбырлап турган бис? Дээрге диргизиишкин эгелевээнде-ле, Павел чүс-чүс чылдар бурунгаар-ла, дээрге чурттаары-биле элекке төрүттүнген, азы дирлип келген, деп тайылбырлап турган бис. Ынчалза-даа бо шүлүктү хандыр шинчилээш, ооң утказы өске деп билип каан бис.

Павел бодун кандыг уткалыг «элекке төрүттүнген» дээнил?

Павел хеп-хенертен база аар-берге байдалга таварышкаш, христиан апарган. Өпеяның эрте төрүттүнери ада-иеге манавааны болуушкун болур. Савл (соонда Павел деп ады-биле билдингир апарган) Дамаскыда христианнарны истеп сүрери-биле чоокшулап бар чыткаш, дирлип келген Иисусту көөр мен деп бодаваан. Павелдиң христиан апарганы чүгле ооң бодунга эвес, а ооң Дамаскыда истеп сүрер деп турганы христианнарга база манавааны болуушкун болган. Оон аңгыда, дирлип келген Иисус-биле ужурашкаш, ону кемдей берген деп болур, чүге дизе ол согурарып каан болгай (Аж.-ч. 9:1—9, 17—19).

Павел «таарымча чок үеде» христиан апарган. «Элекке төрүттүнген» кылдыр очулдурган грек сөстү «таарымча чок үеде төрүттүнген» деп база очулдуруп болур. «Иерусалим Библияда» ол бодалды мынчаар дамчыткан: «кымның-даа манавааны үеде төрүттүнген» (The Jerusalem Bible). Павел Иисусту, ол дээрже дедир эглип келген турган үеде, көстүүшкүнге көрген. Павел чагаазында бижээн христианнарга бодаарга, Иисусту ооң дээрже көдүрлүп үне бергениниң мурнунда көрбээн (1 Кор. 15:4—8). Павел Дамаскыдан ырак эвес черге Иисус-биле «таарымча чок үеде» хенертен ужуражып келген-даа болза, ону ийи караа-биле көөр аргалыг болган.

Павел бодунуң дугайында биче сеткилдиг чугаалап турган. Чамдык шинчилекчилерниң саналы-биле алырга, Павелдиң бо шүлүкте ажыглаан сөстери куду көрген уткалыг бодалды дамчыдып турар. Бир эвес Павел шак ындыг утканы дамчыдыксаан болза, ол аңаа көргүскен алдар-хүндүге төлеп чогун миннип турган. Ооң улаштыр бижээн сөстери ону бадыткап турар: «Мен хамык элчиннерниң эң бичиизи болгай мен, христиан ниитилелди истеп-сүрүп турган болгаш, безин чадаарда элчин деп адаттырарынга төлеп чок мен. Ынчалза-даа мен Бурганның авыралы-биле, ам кандыг-дыр мен, ындыг кижи болганым ол-дур» (1 Кор. 15:9, 10).

Түңнептээлиңер. Павел 1 Коринфичилерге 15:8-те Иисустуң ооң мурнунга хенертен көстүп келгенин, «таарымча чок үеде» христиан апарганын азы ындыг кайгамчык көстүүшкүн алырынга төлеп чогун бижээн чадавас. Ол сөстерниң утказы кандыг-даа бол, Павел ол болуушкуннуң дугайында сактыышкыннарын үнелеп чораан. Иисус дирлип келген деп, ол ыяк бүзүрей берген. Ынчангаш Павел Иисустуң дирлип келгенин чугаалап тургаш, ол ужуражылганың дугайында чаңгыс эвес удаа демдеглээн (Аж.-ч. 22:6—11; 26:13—18).